ສສຊ ແລະ ສສຂ ເຊກອງ ພົບປະປະຊາຊົນເມືອງດາກຈຶງ

23/02/2018 00:00 -

     (ສພຊ) ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ ການເງິນ ແລະ ການກວດສອບ ສະພາແຫ່ງຊາດ, ສະມາຊິກສະພາແຫ່ງຊາດ (ສສຊ) ເຂດເລືອກຕັ້ງທີ 16 ແຂວງເຊກອງ ​ແລະ ທ່ານ ພອນເພັດ ຄິວລະວົງ ປະທານຄະນະ ສສຊ ປະຈຳ​ເຂດ​ເລືອກຕັ້ງ ທັງ​ເປັນ​ປະທານສະພາປະຊາຊົນແຂວງ (ສພຂ) ເຊກອງ ພ້ອມດ້ວຍຄະນະ ໄດ້​​ພົບ​ປະຢ້ຽມຢາມປະຊາຊົນ 3 ຈຸດ​ຄື: ບ້ານດາກດໍ, ດາກເອີຍ ແລະ ດາກຊາ ເມືອງດາກຈຶງ ໃນລະຫວ່າງວັນທີ 12-14 ກຸມພາ 2018 ໂດຍມີທ່ານ ໜູເພັດ ຈັນທະມາດ ຮອງເລຂາພັກເມືອງໆດາກຈຶງ ພ້ອມດ້ວຍຄະນະພັກຮາກຖານ, ອຳນາດການປົກຄອງບ້ານ ແລະ ປະຊາຊົນໃຫ້ການຕ້ອນຮັບຢ່າງອົບອຸ່ນ.

ໃນການ​ຢ້ຽມຢາມ ​ແລະ ພົບ​ປະແຕ່ລະຈຸດ, ຄະນະໄດ້ຮັບຟັງການລາຍງານສະພາບລວມການພັດທະນາເສດຖະກິດ-ສັງຄົມຂອງບ້ານ ຈາກເລຂາໜ່ວຍພັກບ້ານ-ນາຍບ້ານຂອງແຕ່ລະບ້ານ. ຫລັງຈາກນັ້ນ ບັນດາທ່ານ ສສຊ ແລະ ສະມາຊິກສະພາປະຊາຊົນແຂວງ (ສສຂ) ໄດ້ມີ​ຄຳ​ເຫັນໂອ້ລົມ ໂດຍໄດ້ນຳເອົາເນື້ອໃນຈິດໃຈຂອງຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ (ສພຊ) ຊຸດທີ VIII ແລະ ຂອງ ສພຂ ເຊກອງ ຊຸດທີ I ເຊິ່ງກອງປະຊຸມສະໄໝສາມັນເທື່ອທີ 4 ຂອງ ສພຊ ຊຸດທີ VIII ດຳເນີນໃນລະຫວ່າງວັນທີ 16 ຕຸລາ-17 ພະຈິກ 2017 ມີ ສສຊ ເຂົ້າຮ່ວມທັງໝົດ 140 ກວ່າທ່ານ ໂດຍກອງປະຊຸມໄດ້ພິຈາລະນາຮັບຮອງບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປີ 2017 ແລະ ທິດທາງແຜນການປີ 2018; ການຈັດຕັ້ງປະຕິບັດການເຄື່ອນໄຫວວຽກງານປີ 2017 ແລະ ແຜນການປີ 2018 ຂອງອົງການກວດສອບແຫ່ງລັດ, ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ແລະ ບັນຫາສຳຄັນອື່ນໆຂອງຊາດ.

         ພ້ອມນັ້ນ, ຍັງໄດ້ເຜີຍແຜ່ມະຕິກອງປະຊຸມສະໄໝສາມັນເທື່ອທີ 4 ຂອງ ສພຂ ເຊກອງ ຊຸດທີ I ວ່າດ້ວຍການຮັບຮອງເອົາບົດສະຫລຸບຜົນສຳເລັດການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ປະຈຳປີ 2017 ແລະ ທິດທາງແຜນການ ປະຈຳປີ 2018; ; ບົດລາຍງານກ່ຽວກັບການຈັດຕັ້ງປະຕິບັດແຜນການປີ 2017 ແລະ ທິດທາງແຜນການປີ 2018 ຂອງອົງການໄອຍະການປະຊາຊົນ ແລະ ສານປະຊາຊົນ; ບົດລາຍງານຂອງພະແນກຍຸຕິທຳກ່ຽວກັບການຈັດຕັ້ງປະຕິບັດຄຳຕັດສິນຂອງສານທີ່ໃຊ້ໄດ້ຢ່າງເດັດຂາດໃນໄລຍະຜ່ານມາ ແລະ ທິດທາງແກ້ໄຂໃນຕໍ່ໜ້າ; ບົດສະຫລຸບກ່ຽວກັບການຈັດຕັ້ງປະຕິບັດແຜນການປີ 2017 ແລະ ທິດທາງແຜນການປະຈໍາປີ 2018 ຂອງ ສພຂ.

          ການເຄື່ອນໄຫວຄັ້ງນີ້, ສສຊ ແລະ ສສຂ ຍັງໄດ້ຮັບຟັງຄຳສະເໜີຈາກຜູ້ເຂົ້າຮ່ວມ ເປັນຕົ້ນແມ່ນບັນຫາການພັດທະນາພື້ນຖານໂຄງລ່າງ, ບັນຫາການສຶກສາ, ການຈັດແບ່ງຕົວເລກໄປຮຽນຢູ່ສະຖາບັນຕ່າງໆທັງພາຍ ແລະ ຕ່າງປະເທດ ແລະ ອື່ນໆ ​ເຊິ່ງ ສສຊ,  ສສຂ ກໍໄດ້ຊີ້ແຈ້ງບາງບັນຫາ ແລະ ​ໄດ້​ຮັບ​ເອົາຂໍ້​ສະ​ເໜີ​ຈຳນວນ​ໜຶ່ງ​ໄປພິຈາລະນາແກ້ໄຂ ແລະ ສະເໜີຕໍ່ພາກສ່ວນ​ກ່ຽວຂ້ອງ​ຕື່ມ​ອີກ.

        ພ້ອມນີ້, ຄະນະຍັງໄດ້ລົງຊຸກຍູ້ຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍສະເພາະແມ່ນການຈັດຕັ້ງປະຕິບັດໂຄງການລົງທຶນຂອງລັດ ຢູ່ເມືອງກະລຶມ ໂດຍມີທ່ານ ບຸນໄຫລ ບຸດຕະວົງ ເຈົ້າເມືອງໆກະລຶມ ພ້ອມຄະນະນຳຂອງເມືອງໃຫ້ການຕ້ອນຮັບຢ່າງອົບອຸ່ນ.