ກມຍທ ສ້າງຄວາມຊໍານານ ການພິຈາລະນາຄຳຮ້ອງຂໍຄວາມເປັນທຳ ແລະ ການຕິດຕາມກວດກາຜູ້ພິພາກສາ

02/04/2019 00:00 -

(ສພຊ) ໃນລະຫວ່າງວັນທີ 28-30 ມີນາ 2019 ທີ່ຫ້ອງປະຊຸມເຮືອນພັກແຄມງື່ມ ເມືອງແກ້ວອຸດົມ ແຂວງວຽງຈັນ, ກຳມາທິການຍຸຕິທຳ (ກມຍທ) ສະພາແຫ່ງຊາດ  ໄດ້ຈັດກອງປະຊຸມສ້າງຄວາມເຂັ້ມແຂງກ່ຽວກັບການຕິດຕາມກວດກາ, ຄົ້ນຄວ້າ, ພິຈາລະນາຄຳຮ້ອງຂໍຄວາມເປັນທຳ ແລະ ການຕິດຕາມກວດກາຜູ້ພິພາກສາໃຫ້ແກ່ພະນັກງານ-ລັດຖະກອນພາຍໃນກຳມາທິການຍຸຕິທຳ ແລະ ພາກສ່ວນກ່ຽວຂ້ອງ ໂດຍການເປັນປະທານຂອງທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳ; ເຂົ້້າຮ່ວມມີບັນດາທ່ານຮອງປະທານກຳມາທິການ, ປະທານ-ຮອງປະທານຄະນະກຳມະການຍຸຕິທຳ ແລະ ກຳມາທິການປ້ອງກັນຊາດ-ປ້ອງກັນຄວາມສະຫງົບ ຂອງສະພາປະຊາຊົນແຂວງ (ສພຂ) ໃນທົ່ວປະເທດ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ພ້ອມດ້ວຍພະນັກງານ-ວິຊາການຈາກພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ ເຊິ່ງກອງປະຊຸມຄັ້ງນີ້ໄດ້ຮັບການສະໜັບສະໜູນດ້ານງົບປະມານຈາກມູນນິທິແວສມິນສເຕີ (WFD).

          ຈຸດປະສົງແມ່ນເພື່ອສ້າງຄວາມຮັບຮູ້ໃຫ້ແກ່ພະນັກງານຂອງ ກມຍທ ສະພາແຫ່ງຊາດ ແລະ ພະນັກງານຂອງ ສພຂ ກ່ຽວກັບການຄົ້ນຄວ້າ ແລະ ພິຈາລະນາຄຳຮ້ອງຂໍຄວາມເປັນທຳ ຕາມກົດໝາຍວ່າດ້ວຍການແກ້ໄຂຄຳຮ້ອງທຸກ ສະບັບປີ 2016; ວິທີການຄົ້ນຄວ້າ, ວິເຄາະ, ວິໄຈ ແລະ ສະຫລຸບລາຍງານ ພ້ອມທັງເປັນການແລກປ່ຽນບົດຮຽນກ່ຽວກັບການຕິດຕາມກວດກາ, ການຄົ້ນຄວ້າບັນຈຸຊັບຊ້ອນ, ຍົກຍ້າຍ, ແຕ່ງຕັ້ງ ແລະ ປົດຕຳແໜ່ງ ຜູ້ພິພາກສາ ແລະ ລັດຖະກອນຕຸລາການ ຂອງ ກມຍທ ສະພາແຫ່ງຊາດ ແລະ ສພຂ.

          ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການສະເໜີບົດຮຽນກ່ຽວກັບວິທີການຄົ້ນຄວ້າຄຳຮ້ອງຂໍຄວາມເປັນທຳຂອງ ສພຊ ແລະ  ສພຂ ຈາກທ່ານ ສຈ. ດາວອນ ຫວ່າງວິຈິດ ອະດີດປະທານກຳມາທິການກົດໝາຍ ສະພາແຫ່ງຊາດ ຊຸດທີ VII; ວິທີການຄົ້ນຄວ້າ, ວິເຄາະ, ວິໄຈ ແລະ ສັງລວມເນື້ອໃນຄຳຮ້ອງຂໍຄວາມເປັນທຳຂອງວິຊາການຕໍ່ກົມ, ກຳມາທິການ ແລະ ຄະນະປະຈຳສະພາແຫ່ງຊາດ ຈາກທ່ານ ແສງແກ້ວ ວົງນະລາດ ຫົວໜ້າກົມຄຳຮ້ອງຂໍຄວາມເປັນທຳ; ກົນໄກ ແລະ ວິທີການຕິດຕາມກວດກາຜູ້ພິພາກສາຂອງສານແຕ່ລະຂັ້ນຂອງ ກມຍທ ສະພາແຫ່ງຊາດ ແລະ ສພຂ ຈາກທ່ານ ໄກມະນິນ ເທບບົວລີ ຮັກສາການຫົວໜ້າກົມຕິດຕາມກວດກາຂົງເຂດຍຸຕິທຳ ແລະ ບົດຮຽນການຕິດຕາມກວດກາຜູ້ພິພາກສາ ແລະ ການຄົ້ນຄວ້າແຕ່ງຕັ້ງ, ຍົກຍ້າຍ ແລະ ປົດຕຳແໜ່ງຜູ້ພິພາກສາ ແລະ ລັດຖະກອນຕຸລາການ ຈາກທ່ານ ນາງ ຄອນສະຫວັນ ທຳມະວົງ ວ່າການຫົວໜ້າພະແນກຕິດຕາມກວດກາ.  ຈາກນັ້ນ, ບັນດາຜູ້ເຂົ້າຮ່ວມກອງປະຊຸມໄດ້ແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ຢ່າງກົງໄປກົງມາ ເຊິ່ງໄດ້ຍົກໃຫ້ເຫັນເຖິງບັນຫາຕ່າງໆ ເພື່ອເປັນການຖອດຖອນບົດຮຽນກັບນັກວິທະຍາກອນ ແນໃສ່ເປັນການປັບປຸງ ແລະ ແກ້ໄຂວຽກງານຕ່າງໆ ເປັນຕົ້ນແມ່ນການຄົ້ນຄວ້າຄຳຮ້ອງທຸກຂອງພໍໍ່ແມ່ປະຊາຊົນ ແລະ ການຕິດຕາມກວດກາຜູ້ພິພາກສາໃນແຕ່ລະຂັ້ນ ແລະ ອື່ນໆ ດ້ວຍບັນຍາກາດຟົດຟື້ນ ແລະ ມີເນື້ອໃນທີ່ຄົບຖ້ວນສົມບູນ.

          ໂອກາດດັ່ງກ່າວ, ປະທານກອງປະຊຸມຍັງໄດ້ຮຽກຮ້ອງໃຫ້ບັນດານັກສຳມະນາກອນທຸກຄົນນຳເອົາບົດຮຽນທີ່ໄດ້ເຝິກອົບຮົມໃນຄັ້ງນີ້ ໄປຄົ້ນຄວ້າຢ່າງເລິກເຊິ່ງກ່ຽວກັບເຕັກນິກການຄົ້ນຄວ້າແກ້ໄຂຄຳຮ້ອງຂໍຄວາມເປັນທຳ, ກົນໄກການວິເຄາະ, ວິໄຈ ແລະ ສັງລວມເນື້ອໃນ ເພື່ອຂຽນບົດລາຍງານຂອງກົມ ຕໍ່ກໍາມາທິການ ແລະ ບົດລາຍງານຂອງກໍາມາທິການ ຕໍ່ຄະນະປະຈໍາສະພາແຫ່ງຊາດ ເພື່ອຮັບປະກັນໃຫ້ມີຄວາມເປັນເອກະພາບ ໃນການຈັດຕັ້ງປະຕິບັດຕົວຈິງ ແລະ ພ້ອມກັນຈັດຕັ້ງຜັນຂະຫຍາຍເຂົ້າໃນວຽກງານໂຕຈິງໃຫ້ເກີດດອກອອກຜົນ ແລະ ມີປະສິດທິພາບສູງ; ພ້ອມນັ້ນ, ທ່ານຍັງໄດ້ເນັ້ນໜັກໃຫ້ພະນັກງານທຸກທ່ານເອົາໃຈໃສ່ໃນການສຶກສາ, ຊອກຮູ້ຊ່ອງທາງໃນການພັດທະນາຕົນເອງໃຫ້ເປັນຄົນທີ່ມີຄວາມຮູ້ຄວາມສາມາດ ເພື່ອເຮັດໃຫ້ການປະຕິບັດໜ້າທີ່ວຽກງານມີປະສິດທິພາບ-ປະສິດທິຜົນ ສູງຂຶ້ນ ຢ່າງບໍ່ຢຸດຢັ້ງ.

 

(ນາງ ອານິຕາ ມ່ວນສະຫວັດ)