ປະທານ ກປຊສ ເຄື່ອນໄຫວເຮັດວຽກຍູ່ແຂວງຄໍາມ່ວນ.

08/04/2019 00:00 -

(ສພຊ) ໃນວັນທີ 27-28 ມີນາ 2019 ທ່ານ ພົວ.  ຄໍາສຸກ ວີອິນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ກວດກາ, ຊຸກຍູ້ ແລະ ເກັບກໍາຂໍ້ມູນ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ຢູ່ 4 ຈຸດ ຄື: ສະພາປະຊາຊົນແຂວງ (ສພຂ), ບັນດາບໍລິສັດບໍລິສັດຈໍານວນໜຶ່ງ, ກອງບັນຊາການ ປກຊ ແລະ ກອງບັນຊາການ ປກສ ແຂວງຄໍາມ່ວນ.

ໃນໂອກາດເຄື່ອນໄຫວເຮັດວຽກຄັ້ງນີ້, ໄດ້ຮ່ວມເຮັດວຽກກັບ ສພຂ ຄໍາມ່ວນ ເຊິ່ງໄດ້ຮັບຟັງການລາຍງານໂດຍຫຍໍ້ກ່ຽວກັບການເຄື່ອນໄຫວວຽກງານໃນໄລຍະຜ່ານມາຂອງ ສພຂ, ບົດລາຍງານຂອງຄະນະກຳມະການຍຸຕິທຳ ແລະ ປກຊ-ປກສ ແລະ ລາຍງານກ່ຽວກັບການແກ້ໄຂຄໍາຮ້ອງຂໍຄວາມເປັນທໍາ ແລະ ກົນໄກການປະສານງານລະຫວ່າງຄະນະກໍາມະການກັບພາກສ່ວນກອງກໍາລັງ ປກຊ-ປກສ ເຊິ່ງຈາກການລາຍງານໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານໃນໄລຍະຜ່ານມາ ພ້ອມທັງແລກປ່ຽນບົດຮຽນບາງບັນຫາໃນການແກ້ໄຂຄໍາຮ້ອງຂໍຄວາມເປັນທໍາ ແລະ ຂອດການປະສານງານ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າດີຂຶ້ນເລື້ອຍໆ; ພ້ອມນັ້ນ, ສພຂ ຍັງໄດ້ສະເໜີແລກປ່ຽນບົດຮຽນຫລາຍບັນຫາຕໍ່ຄະນະທີມງານສະພາແຫ່ງຊາດ ເປັນຕົ້ນແມ່ນສະເໜີໂຄງປະກອບການກຳນົດຕໍາແໜງງານຂອງຫົວໜ້າຂະແໜງ ປກສ ຊັ້ນຂັ້ນຕໍາແໜ່ງ; ທ່ານປະທານ ກປຊສ ໄດ້ໃຫ້ທິດຊີ້ນໍາແລກປ່ຽນຄໍາຄິດຄໍາເຫັນ, ມີຄໍາຖາມເຈາະຈີ້ມຕໍ່ພາກສ່ວນພະແນກການທີ່ເຂົ້າຮ່ວມ; ຈາກນັ້ນ, ຄະນະໄດ້ລົງເຄື່ອນໄຫວພົບປະຢ້ຽມຢາມ ແລະ ຊຸກຍູ້ຟຶ້ນນຖານການຜະລິດຫີນຜາ ທີ່ບໍລິສັດຫຸ້ນສ່ວນສີລາຄໍາມ່ວນ ຈຳກັດ ເພື່ອຮັບຟັງການລາຍງານໂດຍສັງເຂບ ເຊິ່ງທາງບໍລິສັດໄດ້ໃຫ້ຮູ້ວ່າປັດຈຸບັນໃນການຜະລິດຫີນ ຂະໝາດຂອງຫີນທີຜະລິດ 0-5 mm ຮອດຂະໝາດ 0-40 mm ເພື່ອເປັນສິນຄ້າ ສົ່ງອອກພາຍໃນ ແລະຕ່າງປະເທດ ພາຍຫັຼງຮັບຟັງການລາຍງານ ຈາກຫົວໜ້າສໍານັກງານ ບໍລິສັດ ທ່ານ ປະທານ ໄດ້ຊົມເຊີຍຕໍ່ຜົນງານການບໍລິຫານ ໃນການດຳເນີນທຸລະກິດ ແລະການປະກອບສ່ວນ ຕໍ່ການພັດທະນາເສດຖະກິດ-ສັງຄົມ ເຊິ່ງທ່ານເນັ້ນໃຫ້ສຶບຕໍ່ເອົາໃຈໃສ່ນໍາເອົາບົດຮຽນ ແລະ ປະສົບການຜັນຂະຫຍາຍກິດການຂອງຕົນເອງໃຫ້ ກ້ວາຂື້ນ,ພ້ອມນັ້ນເອົາໃຈໃສ່ສົ່ງເສີມໃຫ້ ປະຊາຊົນອ້ອມຂ້າງມີສ່ວນຮ່ວມໃນການຜະລິດ ສອນຄວາມຮູ້ຄວາມສາມາດໃຫ້ປະຊາຊົນລາວມີວຽກເຮັດງານທຳເພີມຂື້ນ.         

ຈາກນັ້ນ, ຄະນະ ໄດ້ລົງເຄື່ອນໄຫວພົບປະຢ້ຽມຢາມ ແລະ ເຮັດວຽກຢູ່ກອງບັນຊາກອງທະຫານແຂວງ ໄດ້ຮັບຟັງການລາຍງານສະພາບລວມການເຄື່ອນໄຫວຂອງກໍາລັງປະກອບອາວຸດທ້ອງຖິ່ນຂອງແຂວງຄໍາມ່ວນໃນໄລຍະຜ່ານມາ ເຊິ່ງເຫັນໄດ້ວ່າທົ່ວແຂວງມີຄວາມສະຫງົບ, ມີ ການຫັນລົງກໍ່ສ້າງຮາກຖານ ແລະ ເຄື່ອນໄຫວຕິດຕາມກວດກາຕາມຄວາມຮັບຜິດຊອບເປັນຫລັກ, ໄດ້ເອົາໃຈໃສ່ປັບປຸງກໍ່ສ້າງກໍາລັງໃຫ້ມີຄວາມໜັກແໜ້ນທາງດ້ານການເມືອງແນວຄິດເປັນຕົ້ນຕໍ, ໄດ້ເອົາໃຈໃສ່ປັບປຸງກໍ່ສ້າງ ແລະ ຂະຫຍາຍໜ່ວຍພັກໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ສາມາດປະຕິບັດລະບຽບກົດໝາຍ ກໍຄືຂໍ້ກໍານົດຂອງກອງທັບໄດ້ດີ ໂດຍຖືເອົາກົດໝາຍຂອງລັດ, ວິໄນຂອງພັກຕິດພັນຢ່າງແໜ້ນກັບຂໍ້ກໍານົດກົດລະບຽບຂອງກອງທັບເປັນບ່ອນອີງທີ່ຂາດບໍ່ໄດ້ໃນການຊີ້ນໍາ-ບັນຊາກໍາລັງປະກອບອາວຸດ ແລະ ໄດ້ລາຍງານກ່ຽວກັບແຜນການຕໍ່ໜ້າໃຫ້ທ່ານປະທານ ກປຊສ ໄດ້ຮັບຊາບ.

      ທ່ານ ພົວ. ຄໍາສຸກ ວິອິນທະວົງ ໄດ້ມີຄໍາເຫັນໂອ້ລົມ ແລະ ແລກປ່ຽນຕໍ່ກອງປະຊຸມ ເຊິ່ງ ທ່ານກໍໄດ້ສະແດງຄວາມຊົມເຊີຍຕໍ່ກອງບັນຊາການ ປກຊ-ປກສ ທີ່ໄດ້ສະໜອງຂໍ້ມູນຮອບດ້ານໃຫ້ຄະນະທີມງານໃນຄັ້ງນີ້ ເຊິ່ງການເຄື່ອນໄຫວຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດວຽກງານ ປກຊ-ປກສ ແມ່ນເພື່ອສືບຕໍ່ປັບປຸງຄຸນນະພາບຂອງການນໍາໃຫ້ນັບມື້ນັບດີຂຶ້ນເລື້ອຍໆ ເພາະເປັນກໍາລັງທີ່ຕັດສິນຄວາມໝັ້ນຄົງຂອງຊາດ ແມ່ນສອງກໍາລັງນີ້ ເຊິ່ງໄລຍະຜ່ານມາສາມາດກໍາໄດ້ສັດຕູ, ກຸ່ມຄົນບໍ່ຫວັງດີທີ່ຫວັງຈະສ້າງຄວາມປັ່ນປ່ວນ, ຄວາມບໍ່ສະຫງົບໃນທຸກດ້ານ ແລະຕໍ່ໄປໃຫ້ສືບຕໍ່ເຮັດໃຫ້ດີຕື່ມອີກ, ກໍາແໜ້ນໃຫ້ໄດ້, ວາງແຜນໃຫ້ຖືກຕ້ອງ, ກໍາແໜ້ນແນວຄິດຊີ້ນໍາແນວທາງນະໂຍບາຍຂອງພັກໃນການຈັດຕັ້ງປະຕິບັດວຽກງານ, ເອົາໃຈໃສ່ດ້ານຄຸນທາດການເມືອງ, ອຸດົມການຂອງພັກ, ອຸດົມການຂອງກໍາລັງປະກອບອາວຸດ ຕິດພັນກັບບັ້ນດໍາເນີນຊີວິດການເມືອງປັບປຸງປົວແປງພາຍໃນກໍາລັງ ໃນນາມທີ່ເປັນກໍາລັງປ້ອງກັນຊາດປ້ອງກັນຄວາມສະຫງົບເພື່ອຮັບໃຊ້ປະຊາຊົນ.

 

(ເອື້ອ ມະໂນສິງ)