ປະທານ ກກໝ ເຄື່ອນໄຫວ ແລະ ເຮັດວຽກຢູ່ເມືອງໄຊຍະບູລີ

08/04/2019 00:00 -

(ສພຊ) ເພື່ອ​ຍົກ​ລະ​ດັບ​ຄວາມ​ຮູ້​, ຄວາມ​ສາ​ມາດທາງ​ດ້ານ​ກົດ​ໝາຍ ໃນ​ຂົງ​ເຂດ​ຄວາມ​ຮັບ​ຜິດ​ຊອບ​ຂອງ​ສະ​ພາ​ແຫ່ງ​ຊາດ (ສພຊ) ແລະ ສະ​ພາ​ປະ​ຊາ​ຊົນ​ແຂວງ (ສພຂ) ໃຫ້​ພະ​ນັກ​ງານຫລັກ​ແຫລ່ງ​ອ້ອມ​ຂ້າງ​ເມືອງ ແລະ ບ້ານ​ເທສະ​ບານ​ເມືອງ​ໄຊ​ຍະ​ບູ​ລີ ໃຫ້ມີ​ຄວາມ​ເຂົ້າ​ໃຈ​ຕໍ່​ວຽກ​ງານ​ຂອງ​ ສພຊ ແລະ ສພຂ, ​ແນ​ໃສ່​ສ້າງ​ສະ​ຕິ​ເຄົາ​ລົບ, ປະ​ຕິ​ບັດ​ລະ​ບຽບ​ກົດ​ໝາຍ​ໃນ​ສັງ​ຄົມໃຫ້​ນັບ​ມື້ນັບ​ສູງ​ຂື້ນ, ປະ​ກອບ​ສ່ວນ​ເຮັດ​ໃຫ້​ສັງ​ຄົມ​ມີ​ຄວາມ​ສະ​ຫງົບ​ ແລະ ເປັນ​ລະ​ບຽບ​ຮຽບ​ຮ້ອຍ; ໃນ​ວັນ​ທີ 29 ມີ​ນາ 2019 ກຳ​ມາ​ທິການ​ກົດ​ໝາຍ​ (ກກໝ) ສະ​ພາ​ແຫ່ງ​ຊາດ ໄດ້​ຈັດ​ກອງ​ປະ​ຊຸມ​ໂຄ​ສະ​ນາ​ເຜີຍ​ແຜ່​ກົດ​ໝາຍ ໂດຍ​ການ​ເປັນ​ປະ​ທານ​ຂອງ​ ທ່ານ ສາຍ​ທອງ ແກ້ວດວງ​ດີ ກຳ​ມະ​ການ​ຄະ​ນະ​ປະ​ຈຳ, ປະ​ທານ ​ກກໝ ເຂົ້າ​ຮ່ວມ​ມີທ່ານ ບຸນ​ທຽມ​ ນັນທະ​ກອນ ຮອງ​ປະ​ທານ ສພຂ; ບັນ​ດາ​ທ່ານຮອງ​ປະ​ທານ​ກຳ​ມາ​ທິ​ການ; ຄະ​ນະ​ປະ​ຈຳ​ ສພຂ; ຫົວ​ໜ້າ-ຮອງ​ຫົວ​ໜ້າ​ກົມ; ສ​ສ​ຂ ປະ​ຈຳ​ເມືອງ; ພະ​ນັກ​ງານ​-ວິ​ຊາ​ການ​ຈາກ​ ສພຊ ແລະ  ສພຂ; ​ຫົວ​ໜ້າ-ຮອງ​ຫົວ​ໜ້າ​ຫ້ອງ​ການ, ກົມ​ກອງ ພ້ອມ​ດ້ວຍອຳ​ນາດ​ການ​ປົ​ກ​ຄອງບ້ານອ້ອມ​ຂ້າງ​ເມືອງໄຊ​ຍະ​ບູ​ລີ​ ແຂວງໄຊຍະບູລີ ເຂົ້າ​ຮ່ວມ 44 ທ່ານ, ຍິງ 11 ທ່ານ.

          ໃນ​ກອງ​ປະ​ຊຸມ​ຄັ້ງ​ນີ້, ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ສະ​ເໜີ​ກ່ຽວ​ກັບກົດ​ໝາຍ​ວ່າ​ດ້ວຍ​ ສພຊ; ກົດ​ໝາຍ​ວ່າ​ດ້ວຍ ສພຂ; ກົດ​ໝາຍ​ວ່າ​ດ້ວຍ​ການ​ຕິດ​ຕາມກວດ​ກາຂອງ​ ສພຊ ແລະ ສພຂ; ກົດ​ໝາຍ​ວ່າ​ດ້ວຍ​ການ​ແກ້​ໄຂ​ຄຳ​ຮ້ອງ​ທຸກ; ຈາກນັ້ນ, ຜູ້​ເຂົ້າ​ຮ່ວມໄດ້​ມີ​ການ​ສົນ​ທະ​ນາ​ແລກ​ປ່ຽນ​ປະ​ກອບ​ຄຳ​ຄິດ​ຄຳ​ເຫັນ ແລະ​ ຕອບ​ຂໍ້​ຂ້ອງ​ໃຈ​ໃນ​ການ​ປະ​ຕິ​ບັດ​ກົດ​ໝາຍ ແລະ ນິ​ຕິ​ກຳ​ຕ່າງໆ ຢ່າງ​ກົງ​ໄປ​ກົງ​ມາ.

          ທ່ານ ສາຍ​ທອງ ແກ້ວດວງ​ດີ ໄດ້​ກ່າວ​ໃນ​ຕອນ​ທ້າຍ​ວ່າ: ກອງ​ປະ​ຊຸມ​ໂຄ​ສະ​ນາ​ເຜີຍ​ແຜ່​ກົດ​   ໝາຍ​ໃນຄັ້ງ​ນີ້ ແມ່ນກອງ​ປະ​ຊຸມ​ທີ່​ມີ​ຄວາມ​ໝາຍ​ຄວາມ​ສຳ​ຄັນ​ທີ່​ສຸດ ເປັນ​ສ່ວນ​ໜື່ງ​ໃນ​ການ​ຍົກ​ລະ​ດັບ​ຄວາມ​ຮູ້, ຄວາມ​ສາ​ມາດ​ທາງ​ດ້ານ​ກົດ​ໝາຍ, ບັນ​ດາ​ກົດ​ໝາຍ​ທີ່​ນຳ​ມາ​ເຜີຍ​ແຜ່​ໃນຄັ້ງ​ນີ້ ລ້ວນ​ແລ້ວ​ແຕ່​ຕິດ​ພັນ​ກັບ​ໜ້າ​ທີ່​ວຽກ​ງານ​ຕົວ​ຈິງ ແລະ ຕິດ​ພັນ​ກັບ​ການ​ດຳ​ລົງ​ຊີ​ວິດ​ປະ​ຈຳ​ວັນ​ຂອງ​ພໍ່​ແມ່​ປະ​ຊາ​ຊົນ​ ແລະ ທ່ານ​ຍັງ​ໄດ້​ຮຽກ​ຮ້ອງ​ໃຫ້​ຜູ້​ເຂົ້າ​ຮ່ວມຈົ່ງ​ນຳ​ເອົາ​ເນື້ອ​ໃນ​ຈິດ​ໃຈກອງ​ປະ​ຊຸມ ໄປ​ເຜີຍ​ແຜ່​ຜັນ​ຂະ​ຫຍາຍ​ເຂົ້າ​ໃນ​ໜ້າ​ທີ່​ວຽກ​ງານ​ຕົວ​ຈິງ ຕາມ​ຂອບ​ເຂດ​ຄວາມ​ຮັບ​ຜິດ​ຊອບ​ຂອງ​ຕົນ ໃຫ້​ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ.

          ໃນ​ໂອ​ກາດ​ເຄື່ອນ​ໄຫວ ແລະ ເຮັດ​ວຽກ​ຢູ່​ເມືອງ​ໄຊ​ຍະ​ບູ​ລີ, ທ່ານ ສາຍ​ທອງ ແກ້ວດວງ​ດີ ພ້ອມ​ດ້ວຍ​ຄະ​ນະ ຍັງ​ໄດ້​ເຂົ້າ​ຢ້ຽມ​ຊົມ​ໂຄງ​ການກໍ່​ສ້າງ​ເຂື່ອນ​ໄຟ​ຟ້າ​ພະ​ລັງ​ງ​ານ​ນ້ຳ​ໄຊ​ຍະ​ບູ​ລີ (ເຂື່ອນ​ນ້ຳ​ຂອງ).

(ຂ່າວ: ນີ່​ຕູ່ ປະ​ສິດ​ທິ​ພົງ)