ສອງກຳມາທິການຂອງ ສພຊ ສປປ ລາວ ແລະ ລາຊະອານາຈັກກຳປູເຈຍ ພົບປະ ແລະ ແລກປ່ຽນບົດຮຽນ

08/04/2019 00:00 -

(ສພຊ) ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມື ຖານບ້ານໃກ້ເຮືອນຄຽງທີ່ເປັນມູນເຊື້ອອັນດີງາມມາແຕ່ບູຮານນະການ ລະຫວ່າງສອງຊາດ ແຫ່ງ ສປປລາວ-ລາຊະອານາຈັກ ກໍາປູເຈຍ ເວົ້າລວມ, ເວົ້າສະເພາະ ລະຫວ່າງສອງກໍາມາທິການ ກໍຄືສອງສະພາແຫ່ງຊາດ (ສພຊ) ແລະ ເພື່ອປະຕິບັດຕາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມືລະຫວ່າງ ສພຊ ແຫ່ງ ສປປລາວ ແລະ  ສພຊ ແຫ່ງລາຊະອານາຈັກ ກໍາປູເຈຍ ໃນວັນທີ 14 ມັງກອນ 2019 ທີ່ສຽມຮຽບ, ລາຊະອານາຈັກ ກໍາປູເຈຍ; ວັນທີ 28 ມີນາ 2019 ທີ່ ສພຊ, ຄະນະຜູ້ແທນຄະນະກໍາມາທິການໂຍທາທິການ-ຂົນສົ່ງ, ໂທລະຄົມມະນາຄົມ, ໄປສະນີ, ອຸດສະຫະກໍາ, ບໍ່ແຮ່, ພະລັງງານ, ການຄ້າ, ຈັດສັນທີ່ດິນ, ຜັງເມືອງ ແລະ ກໍ່ສ້າງ (ກໍາມາທິການທີ 9) ຂອງ ສພຊ ແຫ່ງລາຊະອານາຈັກ ກໍາປູເຈຍ ເຊິ່ງນໍາໂດຍທ່ານ ນາງ ນິນ ສຸພົນ ປະທານກໍາມາທິການທີ 9 ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງ ໃນໂອກາດເດີນທາງມາຢ້ຽມຢາມ ສປປລາວ ໃນລະຫວ່າງວັນທີ 27-30 ມີນາ 2019 ເຊິ່ງທ່ານຮອງປະທານສະພາແຫ່ງຊາດ ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການເດີນທາງມາຢ້ຽມຢາມ ສປປລາວ ໃນຄັ້ງນີ້.

ໃນວັນດຽວກັນ, ຄະນະ ຍັງໄດ້ເຂົ້າຮ່ວມກອງປະຊຸມພົບປະສອງຝ່າຍລະຫວ່າງສອງກໍາມາທິມາທິການ ເຊິ່ງຝ່າຍລາວນໍາໂດຍທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຂອງ ສພຊ ແຫ່ງ ສປປລາວ, ຝ່າຍກໍາປູເຈຍນໍາໂດຍທ່ານ ນາງ ນິນ ສຸພົນ ພ້ອມດ້ວຍຄະນະກໍາມາທິການທີ 9; ກອງປະຊຸມຕ່າງຝ່າຍຕ່າງກໍໄດ້ລາຍງານກ່ຽວກັບພາລະບົດບາດຂອງຕົນ ແລະ ສະພາບລວມຂອງການຈັດຕັ້ງປະຕິບັດວຽກງານຂອງຕົນໃຫ້ກັນ ແລະ ກັນຊາບ, ພ້ອມນັ້ນ ຍັງໄດ້ປຶກສາຫາລື ວາງແຜນທິດທາງແຜນການໃນຕໍ່ໜ້າ.

          ໃນໂອກາດດັ່ງກ່າວ, ຄະນະຜູ້ແທນຄະນະກໍາມາທິການທີ 9 ຍັງໄດ້ເດີນທາງໄປຢ້ຽມຊົມສະຖານທີ່ສໍາຄັນຂອງ ສປປລາວ ເຊັ່ນ: ຫໍພິພິຕະພັນທ່ານ ໄກສອນ ພົມວິຫານ, ທ່ຽວຊົມ ແລະ ນະມັດສະການພະທາດຫລວງວຽງຈັນ; ຈາກນັ້ນ, ຄະນະຍັງໄດ້ເດີນທາງໄປເຂື່ອນໄຟຟ້ານໍ້າງື່ມ 1 ແຂວງວຽງຈັນ ເຊິ່ງໃຫ້ການຕ້ອນຮັບໂດຍທ່ານ ສົມດີ ແກ້ວດາລາວິນ ຮອງປະທານສະພາປະຊາຊົນແຂວງວຽງຈັນ ພ້ອມດ້ວຍຄະນະອໍານວຍການເຂື່ອນໄຟຟ້ານໍ້າງື່ມ 1 ແລະ ໄດ້ພາທ່ຽວຊົມອ້ອມຮອບສະຖານທີ່ດັ່ງກ່າວ ແລະ ຂັ້ນຕອນຂອງການຜະລິດໄຟຟ້າຂອງເຂື່ອນດັ່ງກ່າວ.

(ທຸງໄຊ ວິໄລພອນ)