18/04/2019 00:00 -

(ສພຊ) ສະພາ​ແຫ່ງ​ຊາດ ໄດ້ຈັດກອງປະຊຸມກວດກາເນື້ອໃນຮອບດ້ານຂອງຮ່າງກົດໝາຍວ່າດ້ວຍການ​ຄຸ້ມ​ຄອງ​ໄພພິບັດ ທີ່​ເມືອງ​ແກ້ວ​ອຸດົມ, ແຂວງ​ວຽງຈັນ ໃນລະຫວ່າງ​ວັນ​ທີ 29-30 ມີນາ 2019 ​ເພື່ອ​ເປັນ​ການກະກຽມຄວາມ​ພ້ອມ​ທາງ​ດ້ານ​ເນື້ອ​ໃນ​ຂອງຮ່າງ​ກົດໝາຍທີ່​ຈະ​ນໍາ​ເຂົ້າ​ພິຈາລະນາ​ໃນ​ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII, ​ ໂດຍການເປັນປະທານຂອງທ່ານ ສົມ​ພັນ ​ແພງ​ຄໍາ​ມີ ກໍາມະການ​ສູນ​ກາງ​ພັກ, ຮອງ​ປະທານ​ສະພາ​ແຫ່ງ​ຊາດ ເຂົ້າຮ່ວມມີທ່ານລັດຖະມົນຕີ​ປະ​ຈໍາ​ຫ້ອງ​ວ່າການ​ສໍານັກງານ​ນາຍົກລັດຖະມົນຕີ, ບັນດາທ່ານປະທານ-ຮອງປະທານກໍາມາທິການທີ່​ກ່ຽວຂ້ອງ​ຂອງ​ສະພາ​ແຫ່ງ​ຊາດ, ຮອງ​ລັດຖະມົນຕີ​ກະຊວງ​ແຮ​ງານ ​ແລະ ສະຫວັດດີ​ການ​ສັງຄົມ, ພະນັກງານບໍານານ, ຜູ້ຕາງໜ້າຈາກພາກສ່ວນ​ທີ່​ກ່ຽວຂ້ອງ, ບັນດາ​ຫົວໜ້າ-ຮອງ​ຫົວໜ້າກົມ, ລັດຖະກອນທີ່ກ່ຽວຂ້ອງຈາກສະພາແຫ່ງຊາດ ແລະ  ກະຊວງ​​ແຮງ​ງານ ​ແລະ ສະຫວັດດີ​ການ​ສັງຄົມ ຈໍານວນໜຶ່ງ.

​ກົດໝາຍສະບັບ​ດັ່ງກ່າວ, ​ເປັນ​ກົດໝາຍທີ່​ສ້າງ​ໃໝ່​ ປະກອບ​ມີ 11 ພາກ, 8 ໝວດ ແລະ 82 ມາດຕາ ເຊິ່ງ​ມີຈຸດປະສົງ​ເພື່ອ​ເຮັດ​ໃຫ້​ວຽກງານ​ການ​ຄຸ້ມ​ຄອງ​ໄພພິບັດ​ໄດ້​ຮັບ​ການ​ເຝົ້າ​ລະວັງ, ຫລຸດ ຜ່ອນ​ຜົນ​ກະທົບ​ທີ່​ເກີດ​ຈາກ​ໄພພິບັດ​ຕໍ່ສຸຂະພາບ, ຊີວິດ, ຊັບ​ສິນ​ຂອງ​ລັດ, ລວມໝູ່, ປະຊາຊົນ, ສິ່ງແວດ​ລ້ອມ ​ແລະ ​ໂຄງ​ລ່າງ​ພຶ້ນຖານ ພ້ອມ​ທັງ​ຟຶ້ນຟູ, ບູລະນະ ​ແລະ ກໍ່ສ້າງ​ຄືນ​ໃໝ່; ພ້ອມ​ດຽວກັນ​ນັ້ນ, ຜູ້ເຂົ້າຮ່ວມກອງປະຊຸມຍັງໄດ້ສຸມ​ໃສ່ສະຕິ​ປັນຍາ​ເຂົ້າ​ໃນ​ການປະກອບຄໍາຄິດຄໍາເຫັນຢ່າງກົງໄປກົງມາຕໍ່ບັນດາມາດຕາ​ ເພື່ອເຮັດໃຫ້ມີເນື້ອໃນຊັດ​ເຈນ, ຈະ​ແຈ້ງ, ຮັດ​ກຸມ, ສອດ​ຄອງ​ກັບ​ກົດໝາຍອື່ນ​ທີ່​ກ່ຽວຂ້ອງ​ ແລະ ສາມາດ​ຈັດ​ຕັ້ງ​ປະຕິບັດ​ໄດ້ ພາຍຫລັງສໍາເລັດການກວດກາ​ເນື້ອ​ໃນຮອບດ້ານແລ້ວ ຈະໄດ້ລາຍງານຕໍ່ກອງ​ປະຊຸມຄະນະປະຈໍາສະພາແຫ່ງຊາດ ພິຈາລະນາຕົກລົງ ແລະ ນໍາເຂົ້າໃນວາລະກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ພິຈາລະນາຮັບຮອງເອົາ​.

 

(ກົມໂຄສະນາ ແລະ ຕີຄວາມໝາຍກົດໝາຍ)