ສສຊ ແລະ ສສຂ ເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນ ຢູ່ແຂວງສາລະວັນ

18/04/2019 00:00 -

(ສພຊ) ເພື່ອເຮັດໃຫ້ປະຊາຊົນຜູ້ມີສິດເລືອກຕັ້ງພາຍໃນເມືອງ ແລະ ບັນດາກຸ່ມບ້ານ ໄດ້ຮັບຮູ້ ແລະ ເຂົ້າກ່ຽວໃຈກ່ຽວກັບບັນດາເນື້ອໃນມະຕິສໍາຄັນຕ່າງໆທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII  ແລະ ຂອງ ສພຂ ສາລະວັນ ຊຸດທີ I; ໃນລະຫວ່າງວັນທີ 1-5 ເມສາ 2019 ທີ່ເມືອງວາປີ ແລະ ເມືອງສາລະວັນ ແຂວງສາລະວັນ, ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 14 ແຂວງສາລະວັນ, ທ່ານ ຄໍາເຫລັກ ອິນດາວົງ ປະທານສະພາປະຊາຊົນແຂວງ (ສພຂ) ສາລະວັນ ແລະ ທ່ານ ນາງ ສູນໄຖ ໄຊຍະແສງ ຮອງປະທານ ສພຂ, ບັນດາທ່ານສະມາຊິກສະພາປະຊາຊົນແຂວງ (ສສຂ) ປະຈໍາເຂດເລືອກຕັ້ງເມືອງ ພ້ອມດ້ວຍຄະນະ ໄດ້ເຄື່ອນໄຫວພົບປະປະຊາຊົນ ກໍຄືຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ VIII ແລະ ສພຂ ຊຸດທີ I; ໃນນັ້ນ, ໄດ້ລົງພົບປະ ແລະ ເຄື່ອນໄຫວຢູ່ເມືອງວາປີ ມີ 4 ບ້ານຄື: ນາລັນ ກຸ່ມ 6, ນາຊັນ ກຸ່ມ2, ໜອງໂງ້ງ ກຸ່ມ 3, ນາກາງ ກຸ່ມ 4 ແລະ ຈຸດເທດສະບານເມືອງ ສ່ວນເມືອງສາລະວັນ ມີ 4 ບ້ານ ຄື: ສຸດຕະວະລີ ກຸ່ມ 5, ແບ່ງວັງຈັນ ກຸ່ມ 13, ນາດອນບົງ ກຸ່ມ 7, ບ້ານຜັກຂະ ກຸ່ມ 12 ແລະ ຈຸດເທສະບານເມືອງ; ເຂົ້າຮ່ວມມີບັນດາຄະນະພັກ-ອຳນາດການປົກຄອງເມືອງ, ພະນັກງານອາວຸໂສບໍານານ, ພະນັກງານ-ລັດຖະກອນ, ຄູອາຈານ, ທະຫານ, ຕໍາຫລວດ, ຄະນະພັກຮາກຖານກຸ່ມບ້ານ, ເລຂາໜ່ວຍພັກນາຍບ້ານ, ພໍ່ແມ່ປະຊາຊົນຜູ້​ມີສິດເລືອກຕັ້ງ ເຂົ້າຮ່ວມ​ຮັບຟັງທັງໝົດ 2 ພັນກວ່າຄົນ.

ໃນການເຄື່ອນໄຫວຄັ້ງນີ້, ໄດ້ຮັບຟັງການລາຍງານໂດຍສັງເຂບ ກ່ຽວກັບສະພາບແຜນພັດທະນາເສດຖະກິດ-ສັງຄົມຂອງເມືອງ ແລະ ກຸ່ມບ້ານພັດທະນາ ພ້ອມທັງຮັບຟັງຂໍ້ສະດວກ, ຂໍ້ຫຍຸ້ງຍາກຂອງການດໍາລົງຊີວິດຕົວຈິງຂອງປະຊາຊົນແຕ່ລະບ້ານ; ຈາກນັ້ນ, ບັນດາທ່ານ ສສຊ ແລະ ສສຂ ກໍໄດ້ພັດປ່ຽນກັນເຜີຍແຜ່ບັນດາມະຕິສໍາຄັນຕ່າງໆທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII  ແລະ ຂອງ ສພຂ ສາລະວັນ ຊຸດທີ I; ພ້ອມທັງເປີດໂອກາດໃຫ້ປະຊາຊົນໄດ້ມີຄໍາຄິດຄໍາເຫັນ ແລະ ຄໍາສະເໜີດ້ວຍເຫດ ແລະ ຜົນ ເຊິ່ງມີຂໍ້ຫຍຸ້ງຍາກຫລາຍດ້ານທີ່ຈະຕ້ອງປັບປຸງແກ້ໄຂ ໂດຍສະເພາະປາກົດການຫຍໍ້ທໍ້ທາງສັງຄົມ, ບັນຫາພື້ນຖານໂຄງລ່າງຖະໜົນຫົນທາງ ແລະ ບັນຫາແກ້ໄຂຄວາມທຸກຍາກຂອງປະຊາຊົນ ແລະ ບັນຫາອື່ນໆ; ຈາກນັ້ນ, ບັນດາທ່ານ ສສຊ ແລະ ສສຂ ກໍໄດ້ຊີ້ແຈງອະທິບາຍຕໍ່ກັບຂໍ້ສະເໜີກັບທີ່ໃນເບື້ອງຕົ້ນ ແລະ ໄດ້ສັງລວມຄໍາສະເໜີໄວ້ ເພື່ອນໍາສະເໜີຕໍ່ພາກສ່ວນທີ່ກ່ຽວຂ້ອງຂັ້ນແຂວງ ແລະ ຂັ້ນເມືອງ ເພື່ອຄົ້ນຄວ້າ, ພິຈາລະນາແກ້ໄຂໃຫ້ແທດເໝາະກັບສະພາບຄວາມເປັນຈິງ;

ໃນໂອກາດດຽວກັນ, ບັນດາທ່ານ ສສຊ ແລະ ສສຂ ຍັງໄດ້​ນຳເຄື່ອງ​ຊ່ວຍ​​ເຫລືອທີ່​ລະດົມ​ໄດ້​ຈາກ​ພາກສ່ວນຕ່າງໆ ມອບໃຫ້ແກ່ປະຊາຊົນຜູ້ທຸກຍາກຂາດເຂີນໃຫ້ບັນດາກຸ່ມບ້ານດັ່ງກ່າວ ເຊິ່ງປະກອບມີ: ເຄື່ອງອຸປະໂພກ, ອຸປະກອນການຮຽນ ແລະ ເຄື່ອງກິລາ ລວມມູນຄ່າ 19 ລ້ານກວ່າກີບ.