ຮອງປະທານ ຄະນະ ສສຊ ເພດຍິງ ເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນ

18/04/2019 00:00 -

(ສພຊ) ໃນລະຫວ່າງວັນທີ 24-30 ມີນາຜ່ານມາ, ທ່ານ ນາງ ທະວີໄສ ພະສະຖານ ຮອງປະທານຄະນະສະມາຊິກສະພາແຫ່ງຊາດ (ສສຊ) ເພດຍິງ ທັງເປັນ ສສຊ ປະຈໍາເຂດເລືອກຕັ້ງທີ 15 ແຂວງຈໍາປາສັກ ພ້ອມດ້ວຍຄະນະ ໄດ້ເຄື່ອນໄຫວຈັດຕັ້ງ, ຜັນຂະຫຍາຍ ແລະ ໂຄສະນາເຜິຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ VIII ແລະ ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ (ສພຂ) ຊຸດທີ I ຢູ່ເມືອງປາກຊ່ອງ ແຂວງຈໍາປາສັກ ເຊິ່ງປະກອບມີ 9 ບ້ານ ແລະ 1 ສຳນັກເມືອງ ຄື: ບ້ານຄົດນ້ອຍ, ໂນນສູງ, ໜອງກິນ, ນໍ້າປົດ, ຫ້ວຍຫວາຍ, ໜອງສໍາພັນ, ກະຕວດ, ພູໂອຍ, ຫລັກ 48 ແລະ ສໍານັກງານປົກຄອງເມືອງປາກຊ່ອງ ເຊິ່ງໄດ້ສົມທົບກັບ ສພຂ ໂດຍມີທ່ານ ບຸນທຽນ ທອງແກ້ວ, ຮອງປະທານ ສພຂ ຈໍາປາສັກ, ທ່ານ ແກ້ວອຸດອນ ພິລາແດງ ຫົວໜ້າໜ່ວຍງານກໍ່ສ້າງຮາກຖານການເມືອງ, ຜູ້ຕາງໜ້າຈາກຫ້ອງວ່າການປົກຄອງເມືອງປາກຊ່ອງ, ບັນດາທ່ານເລຂາພັກກຸ່ມບ້ານ, ອົງການປົກຄອງຂັ້ນບ້ານພະນັກງານ-ລັດຖະກອນ, ທະຫານ-ຕໍາຫລວດ ຕະຫລອດຮອດປະຊາຊົນແຕ່ລະບ້ານກໍໄດ້ເຂົ້າຮ່ວມ ເຊິ່ງມີຜູ້ເຂົ້າຮ່ວມທັງໝົດ ຈໍານວນ 805 ຄົນ ຍິງ 439 ຄົນ.

          ການເຄື່ອນໄຫວໂຄສະນາເຜີຍແຜ່ຜົນສໍາເລັດກອງປະຊຸມໃນຄັ້ງນີ້, ຜູ້ເຂົ້າຮ່ວມໄດ້ຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ VIII ໂດຍໄດ້ນໍາເອົາບັນດາເນື້ອໃນຈິດໃຈສໍາຄັນຂອງກອງປະຊຸມນໍາໄປຈັດຕັ້ງຜັນຂະຫຍາຍ ເປັນຕົ້ນເຜີຍແຜ່ທີ່ຕັ້ງ, ພາລະບົດບາດ ແລະ ໜ້າທີ່ຂອງ ສພຊ; ມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 9  ເດືອນ, ແຜນຄາດຄະເນປະຕິບັດໝົດປີ 2018 ແລະ ແຜນການປະຈໍາປີ 2019; ມະຕິວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານກວດສອບ ປະຈໍາປີ 2018, ທິດທາງແຜນການເຄື່ອນໄຫວວຽກງານກວດສອບ ປະຈໍາປີ 2019, ບົດລາຍງານຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2017 ແລະ ບົດລາຍງານຂອງອົງການກວດກາລັດຖະບານກ່ຽວກັບຜົນການກວດກາຕາມຜົນຂອງການກວດສອບ; ການຮັບຮອງເອົາການຊີ້ແຈງຂອງລັດຖະບານຕໍ່ກັບຄໍາຊັກຖາມຂອງ ສພຊ ກ່ຽວກັບສະພາບການຂອງການກໍ່ສ້າງ ແລະ ສ້ອມແປງຖະໜົນຫົນທາງ ໃນໄລຍະຜ່ານມາ ແລະ ທິດທາງແກ້ໄຂໃນຕໍ່ໜ້າ; ມະຕິວ່າດ້ວຍການຮັບຮອງເອົາການຊີ້ແຈງຂອງລັດຖະບານ ກ່ຽວກັບຄຸນນະພາບການບໍລິການປິ່ນປົວຢູ່ໂຮງໝໍ, ສຸກສາລາ ແລະ ທິດທາງແກ້ໄຂໃນຕໍ່ໜ້າ;  ການຮັບຮອງເອົາບົດລາຍງານການເຄື່ອນໄຫວວຽກງານກາງສະໄໝຂອງແຜນການ 5 ປີ (2016-2020), ວຽກງານປະຈໍາປີ 2018 ແລະ ວຽກງານຈຸດສຸມ ປີ 2019 ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ມະຕິວ່າດ້ວຍການຮັບຮອງເອົາການຊີ້ແຈງຂອງອົງການໄອຍະການປະຊາຊົນສູງສຸດ ຕໍ່ຄໍາຊັກຖາມຂອງ ສພຊ ກ່ຽວກັບການລະເມີດສັນຍາກູ້ຢືມທີ່ມີຫລັກຊັບຄໍ້າປະກັນ ແຕ່ນໍາມາດຳເນີນເປັນຄະດີອາຍາ ໃນຂໍ້ຫາສໍ້ໂກງຊັບພົນລະເມືອງ; ມະຕິວ່າດ້ວການຮັບຮອງເອົາການແຕ່ງຕັ້ງ ລັດຖະມົນຕີກະຊວງປ້ອງກັນຄວາມສະຫງົບ; ຮັບຮອງເອົາການແຕ່ງຕັ້ງຜູ້ວ່າການທະນະຄານ ແຫ່ງ ສປປລາວ; ຮັບຮອງເອົາຊົນເຜົ່າບຣູ ເປັນອີກໜຶ່ງຊົນເຜົ່າຂອງ  ສປປລາວ;  ການຮັບຮອງເອົາການຈັດຕັ້ງປະຕິບັດສິດ ແລະ ໜ້າທີ່ຕິດຕາມກວດກາໃນໄລຍະຜ່ານມາ ແລະ ແຜນການຕິດຕາມກວດກາ ປະຈໍາປີ 2019 ຂອງ ສພຊ; ການຮັບຮອງເອົາບົດລາຍງານການເຄື່ອນໄຫວວຽກງານກາງສະໄໝ (2016-2020) ແລະ ປີ 2018 ແລະ ແຜນວຽກງານຈຸດສຸມ ປະຈໍາປີ 2019 ຂອງ ສພຊ ຊຸດທີ VIII ແລະ ບັນດາກົດໝາຍທີ່ ສພຊ ໄດ້ພິຈາລະນາຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 9 ສະບັບ, ສ້າງໃໝ່ 7 ສະບັບ, ປັງປຸງ 1 ສະບັບ ແລະ ທາບທາມ 1 ສະບັບ ນໍາໄປເຜີຍແຜ່ເພື່ອໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈເຖິງເນື້ອໃນຕົ້ນຕໍຂອງບັນດາກົດໝາຍດັ່ງກ່າວ; ຈາກນັ້ນ, ກໍໄດ້ຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງ ສພຂ ຈໍາປາສັກ ຊຸດທີ I ໂດຍການນໍາເອົາບັນດາເນື້ອໃນສໍາຄັນຂອງກອງປະຊຸມດັງກ່າວລົງເຜີຍແຜ່ ເປັນຕົ້ນ: ທີ່ຕັ້ງ, ພາລະບົດບາດ ແລະ ໜ້າທີ່ຂອງ ສພຂ; ມະຕິຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2018 ແລະ ແຜນການປີ 2019 ຂອງແຂວງ ແລະ ມະຕິການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2018 ແລະ ທິດທາງວຽກງານ ປະຈໍາປີ 2019 ຂອງແຂວງ; ຂໍ້ຕົກລົງຂອງເຈົ້າແຂວງ  ຈໍານວນ 2 ສະບັບ ຄື:  ຂໍ້ຕົກລົງວ່າດ້ວຍການປະຕິບັດການທົດແທນຄ່າເສຍຫາຍ ແລະ ການຈັດສັນຍົກຍ້າຍປະຊາຊົນທີ່ຖືກໂຄງການພັດທະນາຂອງລັດ ແລະ ເອກະຊົນ, ຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງ ແລະ ພັດທະນາທີ່ດິນປ່າໄມ້ທົົ່ວແຂວງ; ເນື້້ອໃນຂອງບົດລາຍງານກ່ຽວກັບການເຄື່ອນໄຫວກວດສອບໃນປີ 2018, ທິດທາງແຜນການເຄື່ອນໄຫວກວດສອບ ປະຈໍາປີ 2019; ບົດລາຍງານຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດແຂວງ ປະຈໍາປີ 2017 ແລະ ບົດລາຍງານກ່ຽວກັບການຈັດຕັ້ງປະຕິບັດຜົນການກວດສອບຂອງພະແນກກວດກາລັດ ປະຈໍາປີ 2018 ແລະ ທິດທາງແຜນການປະຈໍາປີ 2019; ບົດລາຍງານກ່ຽວກັບການຈັດຕັ້ງປະຕິບັດວຽກງານຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ປະຈໍາປີ 2018 ແລະ ທິດທາງແຜນການປີ 2019; ຂໍ້ຕົກລົງວ່າດ້ວຍການຮັບຮອງເອົາການສະເໜີແຕ່ງຕັ້ງຫົວໜ້າພະແນກການຂັ້ນແຂວງ ແລະເອກະສານຮັບຮອງເອົາການສະເໜີແຕ່ງຕັ້ງຫົວໜ້າອົງການໄອຍະການປະຊາຊົນແຂວງ, ປະທານສານປະຊາຊົນແຂວງ, ປະທານສານປະຊາຊົນເຂດ I ແລະ ປະທານສານປະຊາຊົນເຂດ III.

          ພ້ອມດຽວກັນນັ້ນ, ຄະນະຍັງໄດ້ຮັບຟັງການປະກອບຄໍາຄິດເຫັນ ແລະ ຄໍາສະເໜີຂອງພໍ່ແມ່ປະຊາຊົນ ທີ່ໄດ້ສະເໜີໃຫ້ບັນດາພາກສ່ວນທີ່ກ່ຽວຂ້ອງຊ່ວຍຄົ້ນຄວ້າ, ແກ້ໄຂຈຸດຄ້າງຄາຕ່າງໆ ເພື່ອເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂື້ນເທື່ອລະກ້າວ ເປັນຕົ້ນ:  ບັນຫາລາຄາກາເຟຕົກຕໍ່ໍາ, ບັນຫາຜົນກະທົບຂອງການໃຊ້ຢາຂ້າຫຍ້າເຂົ້າໃນການປູກຝັງຂອງຊາວສວນກາເຟ ເຊິ່ງໄດ້ສົ່ງຜົນສະທ້ອນຕໍ່ສຸຂະພາບຂອງປະຊາຊົນໃນເຂດໃກ້ຄຽງ,  ສະພາບເສັ້ນທາງເຂົ້າບ້ານບາງບ້ານທຽວໄດ້ແຕ່ລະດູແລ້ງ, ການອອກໃບຕາດິນໃຫ້ປະຊາຊົນບາງບ້ານ ແມ່ນຍັງບໍ່ທັນໄດ້ເຮັດເທື່ອ ສະເໜີໃຫ້ພາກສ່ວນກ່ຽວຂ້ອງອອກໃບຕາດິນ ເພື່ອສະດວກໃນການນໍໍາໃຊ້ເນື້ອທີ່ດິນຢ່າງຖືກຕ້ອງ,  ຢູ່ບາງກຸ່ມບ້ານຍັງມີຫລາຍຄອບຄົວທີ່ຍັງບໍ່ທັນມີປຶ້ມສໍາມະໂນຄົວ, ການເກັບຄ່າພັກເຊົາຈາກຄົນຕ່າງແຂວງທີ່ມາອອກແຮງງານເກັບກາເຟ ເຫັນວ່າເກັບຄ່າພັກເຊົາຂ້ອນຂ້າງສູງຫລາຍ, ການຊົມໃຊ້ນໍ້າລິນຂອງບາງບ້ານຍັງບໍ່ໍທັນພຽງພໍເນື່ອງຈາກຂະໜາດຂອງທໍ່ນໍ້າລິນນ້ອຍເກີນ ແລະ ບັນຫາການຖີ້ມຂີ້ເຫຍື້ອຊະຊາຍຕາມແຄມທາງ ຊຶ່ງມັນໄດ້ສົ່ງຜົນກະທົບຕໍ່ສິ່ງແວດລ້ອມ ລວມທັງຄວາມເປິະເປື້ອນ ແລະ ສົ່ງກີ່ນເໝັນຢູ່ບໍລິເວັນດັ່ງກ່າວຢູ່ລຽບຕາມເສັ້ນທາງໃຫຍ່ ເຊັ່ນ: ແຕ່ເມືືອງປາກຊ່ອງ ຫາ ນະຄອນປາກເຊ; ຈາກນັ້ນ, ຄະນະກໍໄດ້ຊີ້ແຈງອະທິບາຍ, ແນະນໍາຕາມກົດໝາຍ, ລະບຽບການ ເພື່ອໃຫ້ປະຊາຊົນເຂົ້າໃຈ, ທັງໄດ້ຊຸກຍູ້, ປຸກລະດົມໃຫ້ປະຊາຊົນມີສ່ວນຮ່ວມຢ່າງກວ້າງຂວາງ ເຂົ້າໃນການພັດທະນາເສດຖະກິດ-ສັງຄົມ, ມີພັນທະໃນການສ້າງສາ ແລະ ພັດທະນາປະເທດຊາດ  ພ້ອມທັງສະເໜີໃຫ້ບັນດານາຍບ້ານນໍາເອົາບາງມາດຕາຂອງກົດໝາຍທີ່ກ່ຽວຂ້ອງມາເຜີຍແຜ່ໃຫ້ປະຊາຊົນພາຍໃນບ້ານຂອງຕົນ ໂດຍສະເພາະແມ່ນການປະມວນກົດໝາຍແພ່ງ, ປະມວນກົດໝາຍອາຍາ, ກົດໝາຍວ່າດ້ວຍທີ່ດິນ ໃຫ້ປະຊາຊົນກໍາໄດ້, ຮັບຮູ້ເຖິງສິດ, ພັນທະຂອງຕົນ ເພື່ອປະກອບສ່ວນເຂົ້າໃນການຈັດຕັ້ງປະຕິບັດກົດໝາຍໃຫ້ເກີດດອກອອກຜົນຢ່າງແທ້ຈິງ.