ສະຖາບັນຄົ້ນຄວ້ານິຕິກໍາ ສພຊ ເຮັດວຽກຢູ່ ສພຂ ຊຽງຂວາງ

18/04/2019 00:00 -

(ສພຊ) ​ວັນ​ທີ 3 ​ເມສາ 2019 ​ທີ່​ຫ້ອງ​ປະຊຸມ​ສະພາ​ປະຊາຊົນ​ແຂວງ​ (ສພຂ) ຊຽງ​ຂວາງ ​ໄດ້​ເປີດ​ກອງ​ປະຊຸມ​ປຶກສາ​ຫາລື, ​ຄົ້ນຄວ້າ​, ຕິດຕາມ​ກວດກາ​ການ​ເຄື່ອນ​ໄຫວ​ວຽກ​ງານ 6 ​ເດືອນ​ຕົ້ນ​ປີ 2019 ຂອງ​ ສພຂ ​​ໂດຍ​ການ​ເປັນ​ປະທານ​ຂອງ​ທ່ານ ຄໍາ​ເຜີຍ ປານ​ມະ​ໄລ​ທອງ ຫົວໜ້າ​ສະ​ຖາ​ບັນ​ຄົ້ນຄວ້າ​ນິຕິ​ກໍາ ​ສະພາ​ແຫ່​ງຊາດ (ສພຊ) ​​ເຂົ້າ​ຮ່ວມມີ​ທ່ານ ນາງ ​ແສງ​ຄໍາ ຊົ່ງຊະນະ ປະທານ​ ສພຂ, ​ທີ​ມງານ​ທີ່​ມາ​ຈາກ​ສະ​ຖາ​ບັນ​ຄົ້ນຄວ້າ​ນິຕິ​ກໍາ​ ສພຊ, ຄະນະ​ປະ​ຈໍາ​ສະພາ​ປະຊາຊົນ​ແຂວງ, ສະມາຊິກ​ສະພາ​ແຫ່ງ​ຊາດປະ​ຈໍາ​ເຂດ​ເລືອກ​ຕັ້ງ, ສະມາຊິກ​ສະພາ​ປະຊາຊົນ​ແຂວງ, ຄະນະ​ເລຂາ​ທິການ ​ແລະ ພະນັກງານ-ລັດຖະກອນຈາກ ​ສພຂ ​ເຂົ້າ​ຮ່ວມ.

          ທັງນີ້, ເພື່ອ​​ຄົ້ນຄວ້າ, ປຶກສາ​ຫາລື, ​ແລກປ່ຽນບົດຮຽນເຊິ່ງກັນ ​ແລະ ກັນ ​ລະຫວ່າງສະ​ຖາ​ບັນ​ຄົ້ນຄວ້າ​ນິຕິ​ກໍາ​ ສພຊ ​ແລະ ສພຂ, ຕິດຕາມ​ກວດກາ​ການ​ເຄື່ອນ​ໄຫວ​ວຽກ​ງານ 6 ​ເດືອນ​ຕົ້ນ​ປີ 2019 ກ່ຽວ​ກັບ​ການຈັດ​ຕັ້ງ​ປະຕິບັດ​ພາລະ​ບົດບາດ, ສິດ ​ແລະ ໜ້າ​ທີ່ ຂອງ​ຄະນະ​ສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ ​ແລະ  ສພຂ ກ່ຽວ​ກັບ​ກົງຈັກ​ການຈັດ​ຕັ້ງ ​ແລະ ບຸກຄາ​ລາກ​ອນ ຊ່ວຍ​ວຽກ​ຂອງ​ຄະນະ​ສະມາຊິກ​ສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ ​ແລະ ສພຂ, ໜ່ວຍ​ສະມາຊິກ​ສະພາ​ປະຊາຊົນ​ແຂວງ ປະ​ຈໍາ​ເຂດ​ເລືອກ​ຕັ້ງ​ເມືອ​ງ, ການ​ສ້າງ ​ແລະ ປັບປຸງ​ນິຕິ​ກໍາ, ການຈັດ​ຕັ້ງ​ປະຕິບັດ​ນິຕິ​ກໍາ​ຂອງ​ແຂວງ ​ແລະ ຂອງ​ພາຍ​ໃນ​ຄະນະ​ສະມາຊິກສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ ​ແລະ ສພຂ, ຜົນ​ໄດ້​ຮັບ​ຈາກ​ການ​ເຝຶກ​ອົບຮົມ​, ສໍາ​ມະນາ, ການ​ນໍາ​ໃຊ້​ງົບ​ປະມານ​ໃນ​ໄລຍະ​ຜ່ານ​ມາ; ນອກຈາກ​ນັ້ນ, ​ຍັງ​ໄດ້​ປຶກສາ​ຫາລື​ກ່ຽວ​ກັບ​ກົງຈັກ​ການຈັດ​ຕັ້ງ ​ແລະ ບຸກຄາ​ລາກ​ອນ ຂອງ​ ສພຂ ຊຸດ​ທີ II  ​ແລະ ຄະນະ​ສະມາຊິກ​ສະພາ​ແຫ່ງ​ຊາດ ຊຸດ​ທີ IX  ປະ​ຈໍາ​ເຂດ​ເລືອກ​ຕັ້ງ. ​

ໃນ​ທີ່​ປະຊຸມ​ຍັງ​ຍົກ​ໃຫ້​ເຫັນ​ບັນດາ​ຜົນງານ​ການ​ເຄື່ອນ​ໄຫວວຽກ​ງານ​ຂອງຄະນະສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງທີ 9 ​ແລະ ສພຂ ເຖິງຂໍ້​ສະດວກ, ຂໍ້​ຫຍຸ້ງຍາກ ​ໃນ​ການຈັດ​ຕັ້ງ​ປະຕິບັດ​ພາລະ​ບົດບາດ​ຂອງ​ຕົນ​​ໃນ​ໄລຍະ​ຜ່ານ​ມາ ​ໃຫ້​ທີ່​ປະຊຸມ​ໄດ້​ຮັບ​ຟັງ ພ້ອມ​ທັງ​ປະກອບ​ຄໍາ​ຄິດຄໍາເຫັນ ​ແລະ ​ແລກ​ປ່ຽນ​ເຊິ່ງກັນ ​ແລະ ກັນ ​ເພື່ອ​ເປັນ​ທິດ​ທາງ​ແກ້​ໄຂໃນ​ຕໍ່ໜ້າ​ເພື່ອ​ໃຫ້​ວຽກ​ງານ​ຂອງ​ຄະນະສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ ​ແລະ ສະພາ​ປະຊາຊົນ​ແຂວງ ​ມີ​ປະສິດທິພາບ ​ແລະ ປະສິດທິ​ຜົນ​ດີຂຶ້ນກ​ວ່າ​ເກົ່າ.

 (ນາງ ສຸກ​ສະຫວັນ ອິນທະ​ແສງ)