ປະທານກຳມາທິການບັນດາເຜົ່າເຄື່ອນໄຫວຕິດຕາມກວດກາ

26/02/2018 00:00 -

     (ສພຊ) ວັນທີ22-23 ກຸມພາ 2018 ທີ່ຫ້ອງວ່າການນະຄອນຫລວງວຽງຈັນ ໄດ້ມີການຕິດຕາມກວດກາກ່ຽວກັບຜົນກະທົບຈາກາກນນຳໃຊ້ສານເຄມີເກີນຄ່າມາດຕະຖານຕໍ່ສິ່ງແວດລ້ອມ-ສັງຄົມ ແລະ ທຳມະຊາດ ຕາມມະຕິເລກທີ 018/ສພຊ, ລົງວັນທີ 28 ພະຈິກ 2016 ນຳໂດຍທ່ານ ນາງ ບົວພັນ ລີໄກຢາ ປະທານກຳມາທິການບັນດາເຜົ່າ ເຂົ້າຮ່ວມມີທ່ານຮອງເຈົ້າຄອງນະຄອນຫລວງ, ຮອງປະທານຄະນະກຳມະການວັດທະນະທຳສັງຄົມ ແລະ ບັນດາເຜົ່າ ສະພາປະຊາຊົນນະຄອນຫລວງວຽງຈັນ(ສພນວ), ຮອງເລຂາທິການ ສພນວ, ຕາງໜ້າຈາກກະຊວງຊັບພະຍາກອນທຳມະຊາດ  ແລະ ສິ່ງແວດລ້ອມ, ກະຊວງກະສິກຳ  ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ພະແນກກະສິກຳ  ແລະ ປ່າໄມ້ ນະຄອນຫລວງວຽງຈັນ(ນວ), ພະແນກອຸດສາຫະກຳ ແລະ ການຄ້າ ນວ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນວ; ພ້ອມດ້ວຍແຂກຖືກເຊີນ ແລະ ພະນັກງານຕິດຕາມເຂົ້າຮ່ວມ.

     ຈຸດປະສົງ, ເພື່ອເປັນການຈັດຕັ້ງປະຕິບັດຕິດຕາມກວດກາ ບັນດາມະຕິທີ່ກອງປະຊຸມສະພາແຫ່ງຊາດທີ່ໄດ້ຮັບຮອງເອົາ ໂດຍສະເພາະແມ່ນມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາແຜນການຕິດຕາມກວດກາກ່ຽວກັບການອອກນິຕິກຳລຸ່ມກົດໝາຍ ແລະ ຜົນກະທົບຈາກການນຳໃຊ້ສານເຄມີເກີນຄ່າມາດຕະຖານຕໍ່ກັບສິ່ງແວດລ້ອມ, ສັງຄົມ ແລະ ທຳມະຊາດ ສະບັບເລກທີ018/ສພຊ, ລົງວັນທີ 28 ພະຈິກ 2016 ແນ່ໃສ່ການແກ້ໄຂຜົນກະທົບຈາກການນຳໃຊ້ສານເຄມີອັນຕະລາຍຢ່າງຊະຊາຍ ແລະເກີນຄ່າມາດຕະຖານ ຕໍ່ກັບສິ່ງແວດລ້ອມ, ທຳມະຊາດ ແລະ ສັງຄົມ; ເພື່ອຮັບປະກັນໃຫ້ແກ່ການຈັດຕັ້ງປະຕິບັດມະຕິດັ່ງກ່າວໃຫ້ໄດ້ຮັບຜົນດີ, ທັງຮັບປະກັນຄວາມຖືກຕ້ອງ ແລະ ຄວາມສອດຄ່ອງໃນການອອກນິຕິກຳລຸ່ມກົດໝາຍ ເພື່ອໄດ້ນຳໃຊ້ເຂົ້າໃນການຈັດຕັ້ງປະຕິບັດວຽກງານຂອງຂະແໜງການຕ່າງໆທັງສູນກາງ ແລະ ທ້ອງຖິ່ນ ແນໃສ່ຫລີກລ່ຽງຜົນກະທົບທາງລົບແກ່ຊີວິດ, ສຸຂະພາບແລະ ຊັບສິນຂອງປະຊາຊົນລາວບັນດາເຜົ່າລວມທັງຮັບປະກັນການຄຸ້ມຄອງການນຳເຂົ້າ ແລະ ການນຳໃຊ້ສານເຄມີເຂົ້າໃນທຸລະກິດການບໍລິການ ແລະ ການຜະລິດຕ່າງໆຜ່ານມາ ຈາກການນຳໃຊ້ສານເຄມີອັນຕະລາຍຊະຊາຍເກີນຄ່າມາດຕະຖານ ທີ່ຕິດພັນກັບຊີວິດການເປັນຢູ່ຂອງປະຊາຊົນບັນດາເຜົ່າໃນຂອບເຂດທົ່ວປະເທດ

     ໃນການຕິດຕາມກວດກາຄັ້ງນີ້, ໄດ້ຮັບຟັງການລາຍງານຈາກພະແນກກະສິກຳ ແລະ ປ່າໄມ້ ນວ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນວ; ພ້ອມນັ້ນ, ຍັງໄດ້ຮັບຟັງຄຳຄິດຄຳເຫັນຈາກທ່ານເຈົ້າຄອງ ນວ ແລະ ການປະກອບຄຳຄິດຄຳເຫັນຕໍ່ບົດລາຍງານດັ່ງກ່າວຢ່າງກົງໄປກົງມາ.

     ໂອກາດດຽວກັນນີ້, ຍັງໄດ້ລົງຕິດຕາມກວດກາສະຖານທີຕົວຈິງຢູ່ສວນປູກຜັກ ບ້ານຫ້ອມ ເມືອງຫາດຊາຍຟອງ ແລະ ຈະລົງຕິດຕາມການລ້ຽງໝູຂອງຟາມໝູ ບ້ານຂຸດສາມບາດ , ໂຮງງານສະບູຝຸ່ນ ບ້ານພູຄຳ ແລະ ການລ້ຽງປາກະຊັງ ບ້ານແກ້ງໄຄ້ ເມືອງໄຊທານີ ແລະ ສວນປູກກ້ວຍ ຂອງບໍລິສັດ ຄົງເຊິນ ບ້ານໄຮ່ ເມືອງປາກງື່ມ.

(ນາງ ອາລິນ ສຸພິມມະປະດິດ)