ປະທານ ກປຊສ ເຄື່ອນໄຫວເຮັດວຽກຢູ່ແຂວງຈໍາປາສັກ

25/04/2019 00:00 -

​(ສພຊ) ວັນທີ 1 ເມສາຜ່ານມາ, ທ່ານ ພົຈ. ຄໍາ​ສຸກ ວີ​ອິນ​ທະ​ວົງ ປະທານ​ກໍາມາ​ທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ສະພາ​ແຫ່ງ​ຊາດ ພ້ອມ​ດ້ວຍ​ຄະນະ​ ໄດ້ເຄື່ອນ​ໄຫວ​ເຮັດວຽກຢູ່​ແຂວງ​ຈໍາປາ​ສັກ ​ເພື່ອຕິດຕາມກວດກາ​ການຈັດ​ຕັ້ງ​ປະຕິບັດ​​ວຽກ​ໃນ​ຂົງ​ເຂດວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ຢູ່​ບັນດາ​ແຂວງ​ພາກ​ໃຕ້.

​          ໃນການ​ເຄື່ອນ​ໄຫວຄັ້ງນີ້, ​ຄະນະຍັງ​ໄດ້​​ເຂົ້າ​ພົບປະກັບທ່ານ​ເຈົ້າ​ແຂວງໆຈໍາປາ​ສັກ ​ເພື່ອ​ລາຍ​ງານ​ກ່ຽວກັບແຜນການ​ເຄື່ອນ​ໄຫວ​ເຮັດ​ວຽກ​ຕິດຕາມກວດກາ​ການຈັດ​ຕັ້ງ​ປະຕິບັດ​​ວຽກ​ໃນ​ຂົງ​ເຂດ ປກຊ-ປກສ ຢູ່​ແຂວງ​ຈໍາປາ​ສັກ ​ໂດຍ​ຫຍໍ້; ຈາກ​ນັ້ນ, ໄດ້ເຂົ້າພົບປະກັບ​ທ່ານ​ປະທານ​ສະພາ​ປະຊາຊົນ​ແຂວງ​ ກ່ຽວກັບ​ແຜນການ​ເຄື່ອນ​ໄຫວ​​ຂອງ​ຄະນະດັ່ງກ່າວ ​ແລະ ​ເຮັດ​ວຽກຮ່ວມກັບ​ຄະນະ​ກໍາມະການ​ຍຸຕິ​ທໍາ ແລະ ປກຊ-ປກສ ຂອງສະພາ​ປະຊາຊົນ​ແຂວງ​ ເຊິ່ງໄດ້ຮັບ​ຟັງ​ການ​ລາຍ​ງານສະພາບລວມ​ຂອງຂະ​ແໜງ ປກຊ-ປກສ ເຊິ່ງແມ່ນຂະແໜງໜຶ່ງທີ່ຂື້ນກັບຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງຈໍາປາສັກ ມີພາລະບົດບາດຕົ້ນຕໍໃນການເປັນເສນາທິການຊ່ວຍວຽກໃຫ້ຄະນະກໍາມະການຍຸຕິທໍາ ແລະ ປກຊ-ປກສ ໂດຍສະເພາະວຽກງານ ປກຊ-ປກສ ​ເອົາ​ໃຈ​ໃສ່ປະຕິບັດ​ຕາມ​ທິດ​ຊີ້ນໍາ​ຂອງ​ຂັ້ນ​​ເທິງມອບໝາຍ; ​ໃນ​ນັ້ນ, ເອົາໃຈໃສ່ສຶກສາອົບການເມືອງ-ແນວຄິດໃຫ້ພະນັກງານ-ລັດຖະກອນພາຍໃນຂະແໜງການຂອງຕົນເປັນປະຈໍາອາທິດ, ປະຈໍາເດືອນ ດ້ວຍ​ການ​ຫັນ​ເອົາ​ແນວທາງ​ນະ​ໂຍບາຍ​ຂອງ​ພັກ-ລັດຖະບານ​ວາງ​ອອກ​ ເປັນ​ຕົ້ນ: ມະຕິ, ຄໍາສັ່ງຕ່າງໆຂອງຂັ້ນສູນ​ກາງ ​ແລະ ທ້ອງ​ຖິ່ນ ຜັນຂະຫຍາຍເພື່ອເຮັດໃຫ້ເຂົາເຈົ້າມີ​ທັດສະນະຫລັກໝັ້ນ​ກໍາ​ແໜ້ນແນວທາງ​ຂອງ​ພັກໃນແຕ່ລະໄລຍະ; ດ້ານໂຄງປະກອບກົງຈັກ ແລະ ບຸກຄະລາກອນ ປະກອບ​ມີ 4 ສະຫາຍ, ຍິງ 1 ສະຫາຍ, ມາ​ຈາກ 2 ກໍາລັງ ຄື: ກອງ​ບັນຊາ​ການ ປກຊ ​ແຂວງຈໍາ​ປາ​ສັກ ຕໍາ​ແໜ່ງ ພັທ ມີ 1 ສະຫາຍ, ກອງ​ບັນຊາ​ການ ປກສ ​ແຂວງ​ຈໍາປາ​ສັກ ຕໍາ​ແໜ່ງ ພັທ ມີ 1 ສະຫາຍ ​ແລະ ​ວິຊາ​ການ 2 ສະຫາຍ; ການຈັດ​ຕັ້ງ​ປະຕິບັດ​ວຽກງານວິຊາ​ສະ​ເພາະ ປກຊ-ປກສ ​​​ຜ່ານ​ມາ: ວຽກ ປກຊ ເຄື່ອນໄຫວພົບປະຢູ່ 2 ກົມກອງທະຫານຊາຍແດນ ຄື: ຄຊດ 521 ແລະ ຄຊດ 522 ຊາຍແດນລາວ-ໄທ ຂອບເຂດເມືອງຊະນະສົມບູນ ແລະ ເມືອງໂພນທອງ; ຮັບຟັງການລາຍງານວຽກງານຂອງກົມກອງໃນໄລຍະ 1 ປີຜ່ານມາ ເປັນຕົ້ນ: ດ້ານການເມືອງ-ແນວຄິດຂອງສະມາຊິກພັກ, ພະນັກງານນັກຮົບນາຍ ແລະ ພົນທະຫານ, ດ້ານວຽກງານປະຈໍາການກຽມພ້ອມສູ້ຮົບ, ອົບຮົມຫັດແອບເຄື່ອນໄຫວສະລະເວຕິດຕາມອັດປ່ອງຂ້າມລອຍເລາະລຽບຕາມຊາຍແດນ ສະກັດກັ້ນບໍ່ໃຫ້ກຸ່ມຄົນບໍດີ, ການລັກລອບຄ້າຂາຍເຖື່ອນໃນຂອບເຂດຊາຍແດນ, ວຽກງານພະລາທິການເຕັກນິກ ຮັບປະກັນໄດ້ສ້າງພະລາທິການກັບທີ່ການປູກຝັງ-ລ້ຽງສັດຂອງກົມກອງ, ສົມທົບກັບອໍານາດການປົກຄອງທີ່ກ່ຽວຂ້ອງ​ແກ້​ໄຂ​ກ່ຽວກັບ​ທີ່​ດິນ​ປ້ອງ​ກັນຊາ​ດຂອງຄອບຄົວນາຍ ແລະ ພົນທະຫານ ກັບບຸກຄົນທີ່່ກ່າວອ້າງສິດໃນເມື່ອກ່ອນ​ໄດ້​ສໍາ​ເລັດ; ສຳລັບວຽກງານ ປກສ ຕິດຕາມກວດການຄ້າຍຄຸມຂັງດັດສ້າງ ປກສ ແຂວງ ຕໍ່ກັບການເສຍຄ່າທໍານຽມເຂົ້າຢ້ຽມຜູ້ຕ້ອງຫາຕາມ​ຫາງ​ສຽງຂອງ​ສັງຄົມມີລາຄາແພງ ປັດຈຸບັນໄດ້ຮັບການແກ້ໄຂ​ແລ້ວ, ແກ້​ໄຂຜົນກະທົບນໍ້າເສຍຈາກຄ້າຍຄຸມຂັງດັດສ້າງທີ່ໄຫລຜ່ານທີ່ຢູ່ອາໄສຂອງພໍ່-ແມ່ປະຊາຊົນທີ່ຢູ່ອ້ອມຂ້າງ ມາຮອດປັດຈຸບັນຍັງດໍາເນີນການແກ້ໄຂບໍ່ທັນ​ສໍາ​ເລັດ​ເທື່ອ, ຕິດຕາມກວດກາບັນຫາຄໍາສະເໜີຂອງປະຊາຊົນຜ່ານໂທລະສັບສາຍດ່ວນ 031156 ກ່ຽວກັບເຈົ້າໜ້າທີ່ ຕມ ດ່ານ​ສາກົນ​ວັງ​ເຕົ່າ ເກັບຄ່າທໍານຽມເອກະສານໃບຜ່ານແດນຊົ່ວຄົວ, ປື້ມຜ່ານແດນເກີນລະບຽບການທີ່ກໍານົດໄວ້ ປັດຈຸບັນສາມາດ​ແກ້​ໄຂ​ໄດ້ສໍາ​ເລັດ ​ແລະ ບັນຫາ​ອື່ນໆ. ດ້ານກົນໄກປະສານງານລະຫວ່າງສະພາປະຊາຊົນແຂວງ ກັບສອງກອງບັນຊາການ ​ຖື​ເອົາ​ຜູ້​ຕາງໜ້າຂອງສອງກໍາລັງປ້ອງກັນຊາດ ແລະ ປ້ອງກັນຄວາມສະຫງົບ ເປັນຜູ້ປະສານສົມ​ທົບໂດຍກົງແຕ່ລະບັນຫາ​ ເຊັ່ນ: ດ້ານຄວາມໝັ້ນຄົງ, ສະພາບບັນຫາທີ່ເກີດຂື້ນໃນ 9 ຕົວເມືອງ, 1 ນະຄອນ ຖືເອົາລະບອບສ່ອງແສງລາຍງານປະ​ຈໍາອາທິດ, ປະ​ຈໍາ​​ເດືອນປົກກະຕິ​ ເພື່ອລາຍ​ງານ​ຂັ້ນ​ເທິງ​ໃນ​ການເກັບກໍາສະພາບການຮອບດ້ານຂອງ​ສອງ​ກໍາລັງ, ສະພາບສັດຕູ, ສະພາບກຸ່ມຄົນບໍດີ, ການເຄື່ອນ ໄຫວໃນຂອບເຂດພື້ນຖານກຸ່ມບ້ານເປັນຕົ້ນ: ລັກລອບຄ້າຂາຍເຖື່ອນຢູ່ຕາມຂອບເຂດຊາຍແດນ, ຢາເສບຕິດ ແລະ ອື່ນໆ. ​

ໂອກາດ​ດຽວກັນນີ້, ຄະນະ ຍັງໄດ້ສຶບ​ເຄື່ອນ​ໄຫວ​ເຮັດ​ວຽກກັບກອງ​ບັນຊາ​ການ​ທະຫານ​ແຂວງ​ຈໍາປາ​ສັກ, ກອງ​ພົນ​ທີ 5 ​ແລະ ກອງ​ບັນຊາ​ການ ປກສ ​ແຂວງ​ຈໍາປາ​ສັກ ​ເພື່ອ​ຮັບ​ຟັງ​ການ​ລາຍ​ງານສະພາບລວມຂອງ​ທັງ​ສາມ​ກໍາລັງ​​ໂດຍ​ຫຍໍ້; ຈາກນັ້ນ, ທ່ານ ພົຈ. ຄໍາ​ສຸກ ວິີອິນ​ທະ​ວົງ ປະທານ​ ກປຊສ ພ້ອມດ້ວຍ​ຄະນະ ຍັງໄດ້ສຶບຕໍ່​ເຄື່ອນ​ໄຫວ​ເຮັດ​ວຽກຢູ່​ແຂວງ​ເຊ​ກອງ ​ແລະ ​ແຂວງ​ອັດຕາ​ປື ຕື່ມອີກ.