ກວດກາເນື້ອໃນຮອບດ້ານຂອງຮ່າງກົດໝາຍວ່າດ້ວຍປ່າໄມ້ (ສະບັບປັບປຸງ)

06/05/2019 00:00 -

 

          (ສພຊ) ເພື່ອ​ເປັນ​ການກຽມຄວາມ​ພ້ອມ​ໃນ​ດ້ານຕ່າງໆຂອງຮ່າງ​ກົດໝາຍທີ່​ຈະ​ນໍາ​ເຂົ້າ​ພິຈາລະນາ​ໃນ​ກອງປະ ຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ທີ່​ຈະ​ຈັດ​ຂຶ້ນ​ໃນ​ມໍ່ໆນີ້;ກໍາມາ​ທິການກົດໝາຍ,ກໍາມາ​ທິການ​ເສດຖະກິດ ​ເຕັກ​ໂນ​ໂລ​ຊີ ​ແລະສິ່ງ​ແວດ​ລ້ອມ ສະພາແຫ່ງຊາດຮ່ວມ​ກັບກະຊວງ​ກະສິກໍາ ​ແລະປ່າ​ໄມ້ໄດ້ຈັດກອງປະຊຸມກວດກາເນື້ອໃນຮອບດ້ານຂອງຮ່າງກົດໝາຍວ່າດ້ວຍປ່າ​ໄມ້(ສະບັບ​ປັບປຸງ)ຂຶ້ນທີ່​ໂຮມ​ແຮມ​ດອນ​ຈັນ​ພາ​ເລດ, ນະຄອນຫລວງວຽງຈັນໃນລະຫວ່າງ​ວັນ​ທີ 3-5​ ເມສາ 2019 ​ ​ ໂດຍການເປັນຄະນະປະທານ​ຂອງທ່ານສາຍທອງ ​ແກ້ວ​ດວງ​ດີປະທານ​ກໍາມາ​ທິການ​ກົດໝາຍ,ທ່ານບຸນ​ປອນສີ​ສຸລາ​ດປະທານ​ກໍາມາ​ທິການ​ເສດຖະກິດ ​ເຕັກ​ໂນ​ໂລ​ຊີ ​ແລະສິ່ງ​ແວດ​ລ້ອມ ​ແລະທ່ານວົງ​ພັດມະ​ນິວົງຮອງລັດຖະມົນຕີ​ກະຊວງ​ກະສິກໍາ ​ແລະປ່າ​ໄມ້;ເຂົ້າຮ່ວມມີບັນດາຮອງ​ປະທານ​ກໍາມາ​ທິການທີ່​ກ່ຽວຂ້ອງ​ຂອງສະພາ​ແຫ່ງ​ຊາດ,ຮອງ​ລັດຖະມົນຕີ​ກະຊວງຍຸຕິ​ທໍາ, ພະນັກງານບໍານານ, ຜູ້ຕາງໜ້າຈາກພາກສ່ວນ​ທີ່​ກ່ຽວຂ້ອງ, ບັນດາທ່ານຫົວໜ້າ-ຮອງ​ຫົວໜ້າກົມ, ຫົວໜ້າ-ຮອງຫົວໜ້າພະແນກ ພ້ອມດ້ວຍພະນັກງານ-ລັດຖະກອນທີ່ກ່ຽວຂ້ອງຈາກສະພາແຫ່ງຊາດ ແລະ  ກະຊວງກະສິກໍາແລະປ່າ​ໄມ້ຈໍານວນໜຶ່ງ.

​ກົດໝາຍສະບັບນີ້ ​ເປັນ​ກົດໝາຍສະບັບ​ປັບປຸງປະກອບ​ມີ16 ພາກ, 16 ໝວດ ແລະ 180 ມາດຕາ;ໃນ​ນັ້ນປັບ​ປຸງ90ມາດຕາ ​ແລະສ້າງ​ໃໝ່ 59 ມາດຕາເ​ຊິ່ງ​ມີຈຸດປະສົງເພື່ອ​ເຮັດ​ໃຫ້​ຊັບພະຍາກອນ​ປ່າ​ໄມ້​ມີ​ຄວາມ​ອຸດົມສົມ​ບຸນ, ​ເປັນ​ແຫລ່ງທໍາ​ມາ​ຫາ​ກິນ ​ແລະນໍາ​ໃຊ້​ຂອງ​ປະຊາຊົນ​ໂດຍ​ບໍ່​ບົກ​ແຫ້ງ, ຮັບປະກັນ​ການ​ປົກ​ປັກ​ຮັກສາ​ຄຸນ​ນະພາ​ບຂອງ​ດິນ, ​ແຫລ່ງນໍ້າ, ຊີວະ​ນາໆພັນ, ສິ່ງ​ແວດ​ລ້ອມຕາມ​ທິດ​ສີຂຽວ ​ແລະຍຶນຍົງ;ພ້ອມ​ດຽວກັນ​ນັ້ນ, ຜູ້ເຂົ້າຮ່ວມກອງປະຊຸມຍັງໄດ້ສຸມ​ສະຕິ​ປັນຍາ​ເຂົ້າ​ໃນ​ການປະກອບຄໍາຄິດຄໍາເຫັນຢ່າງກົງໄປກົງມາຕໍ່ບັນດາມາດຕາ​ ເພື່ອເຮັດໃຫ້ມີເນື້ອໃນຈະ​ແຈ້ງ, ຮັດ​ກຸມ ​ແລະສອດ​ຄ່ອງ​ກັບ​ກົດໝາຍອື່ນ​ທີ່​ກ່ຽວຂ້ອງ​ ພາຍຫລັງສໍາເລັດການກວດກາ​ເນື້ອ​ໃນຮອບດ້ານແລ້ວ ຈະໄດ້ລາຍງານຕໍ່ກອງ​ປະຊຸມຄະນະປະຈໍາສະພາແຫ່ງຊາດ ພິຈາລະນາຕົກລົງນໍາເຂົ້າໃນວາລະກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ພິຈາລະນາຮັບຮອງເອົາ​.

 

(ກົມໂຄສະນາ ແລະ ຕີຄວາມໝາຍກົດໝາຍ)