ມອບເຄື່ອງຊ່ວຍເຫລືອຄອບຄົວຜູ້ເຄາະຮ້າຍໄຟໃໝຢູ່ບ້ານນາພູຄໍາ

07/05/2019 00:00 -

(ສພຊ) ຍ້ອນ​ຄວາມ​ເປັນ​ຫ່ວງ​ເປັນ​ໃຍ​ຂອງ​ຄະນະ​ປະ​ຈໍາສະພາ​ແຫ່ງ​ຊາດ ​ແລະ​ ສະພາ​ປະຊາຊົນ​ແຂວງ​ຈໍາປາ​ສັກ​ທີ່​ມີຕໍ່ຄອບຄົວ​ປະຊາຊົນຜູ້​ຖືກ​ເຄາະ​ຮ້າຍ​ຈາກ​ອັກຄີ​ໄພ(​ໄຟ​ໃໝ້) ຈໍານວນ 22 ຄອບຄົວ ​ໃນ​ຄືນ​ວັນ​ທີ 14 ​ເມສາຜ່ານມາ ຢູ່​ທີ່ບ້ານນາ​ພູ​ຄໍາ ​ເມືອ​ງຊະນະ​ສົມບູນ ​ແຂວງ​ຈໍາປາ​ສັກ.ຈາກ​ເຫດການ​ດັ່ງກ່າວໃນວັນທີ 22 ເມສາ 2019, ທ່ານ ນາງ ປິ່ງ​ຄໍາ ລາດຊະ​ສິມ​ມາ ຮອງ​ປະທານ​ກໍາມາ​ທິການ​ເສດຖະກິດ ​ເຕັກ​ໂນ​​ໂລ​ຊີ ​ແລະ ສິ່ງ​ແວດ​ລ້ອມ ທັງ​​ເປັນສະມາຊິກສະພາແຫ່ງຊາດ(ສສຊ) ປະ​ຈໍາ​ເຂດ​ເລືອກ​ຕັ້ງ ໄດ້ສົມທົບກັບຄະນະ​ນໍາ​ຂອງ​ສະພາ​ປະຊາຊົນ​ແຂວງຈໍາປາ​ສັກນໍາ​ໂດຍ​ທ່ານ ​ເມກ​ສະຫວັນ ພົມ​ພິທັກ ປະທານ​ສະພາ​ປະຊາຊົນ​ແຂວງພ້ອມດ້ວຍ​ຄະນະ​​ໄດ້ເຄື່ອນ​ໄຫວ​ຢ້ຽມ​ຢາມ​ຄອບ​ຄົວ​ຜູ້ຖືກ​ເຄາະ​ຮ້າຍຈາກ​ອັກຄີ​ໄພ​(ໄຟ​ໃໝ້) ດັ່ງກ່າວ, ​ເຊິ່ງໄດ້ຮັບການຕ້ອນຮັບຈາກ​​ທ່ານຮອງ​ເຈົ້າ​ເມືອງ​ຊະນະ​ສົມບູນ​ ແລະອໍານາດການປົກຄອງບ້ານທີ່ກ່ຽວຂ້ອງ; ຈາກນັ້ນ, ຄະນະ​ກໍໄດ້ເດີນທາງໄປ​ເບິ່ງ​ສະຖານ​ທີ່​ເກີດ​ເຫດ​ຕົວ​ຈິງພ້ອມທັງຮັບ​ຟັງ​ການ​ລາຍ​ງານໂດຍ​ຫຍໍ້ກ່ຽວກັບສະພາບ​ເຫດການໄຟໃໝ້​ຈາກ​ອໍານາດ​ການ​ປົກຄອງ​ບ້ານດັ່ງກ່າວ.

ໃນໂອກາດດຽວກັນນີ້, ຄະນະ ໄດ້ຮ່ວມກັນມອບເຄື່ອງ​ຊ່ວຍ​ເຫລືອໃຫ້ປະຊາຊົນຜູ້​ຖືກ​ເຄາະ​ຮ້າຍຈາກເຫດການໄຟໃໝ້​ດັ່ງກ່າວ​ເພື່ອ​ບັນ​ເທົາ​ທຸກຄອບຄົວຜູ້ຖືກຜົນກະທົບໃນເບື້ອງຕົ້ນ ກ່າວມອບໂດຍທ່ານ ເມກສະຫວັນ ພົມພິທັກ ກ່າວຮັບແມ່ນນາຍບ້ານໆນາພູຄໍາພ້ອມດ້ວຍອໍານາດການປົກຄອງບ້ານກ່ຽວຂ້ອງເຂົ້າຮ່ວມເປັນສັກຂີພະຍານ ເຊິ່ງເຄື່ອງທີ່ນຳໄປມອບໃນຄັ້ງນີ້ປະກອບມີຄື: ​ແຟັບ 300ຖົງ, ສະບູ 300ກ້ອນ, ປາ​ປ່ອງ 20​ແກັດ, ນໍ້າ​ດື່ມຊູ​ກໍາ​ລັງ 100​ແກັດ, ຢາຖູ​ແຂ້ວ 300 ຫລອດ, ​ແປງ​ສີ​ແຂ້ວ 1.000ອັນ, ​ເຂົ້າໜົມ 50ແກັດ, ສາລີ​ກະ​ປອງ 50​ແກັດ, ອາຫານ​ສໍ​າ​ເລັດ​ຮູບ 100ແກັດ, ​ເຄື່ອງນຸ່ງ​ຫົ່ມ 500ຖົງ, ​ເກືອ 200 ຖົງ ແລະ ນໍ້າຕານ 200ຖົງ​ ລວມມູນ​ຄ່າເປັນ​ເງິນໝົ​ດ​ທັງ 50 ລ້ານກວ່າກີບ.

​ໃນການລົງຢ້ຽມຢາມຄັ້ງນີ້, ປະທານ​ສະພາ​ປະຊາຊົນ​ແຂວງ ຍັງ​ໄດ້​​ໂອ້​ລົມ​ຕໍ່ຄອບຄົວຜູ້​ຖືກ​ຜົນ​ກະທົບ​ເພື່ອ​ເຮັດ​ໃຫ້​ຈິດ​ໃຈ​ເຂົາ​ເຈົ້າ​ມີ​ຄວາມ​ທຸນທ່ຽງອຸ່ນ​ອຽງເວລາໃດການ​​ຈັດ​ຕັ້ງ​ພັກ-ລັດ ກໍເຫັນໄດ້ຄວາມໝາຍຄວາມສໍາຄັນຊີວິດການເປັນຢູ່ຂອງປະຊາຊົນ ຈາກເຫດການດັ່ງກ່າວບໍ່ວ່າຈະເປັນເບື້ອງການນໍາຂອງແຂວງ, ການຈັດຕັ້ງທຸກພາກສ່ວນກໍໄດ້ເອົາໃຈໃສ່ໃຫ້ການຊ່ວຍເຫລືອຢ່າງສຸດກົກສຸດປາຍ; ເວົ້າລວມ,ເວົ້າສະເພາະ ກໍຄືສະພາປະຊາຊົນແຂວງຈໍາປາສັກກໍມີຄວາມເສຍໃຈກັບເຫດການໃນຄັ້ງນີ້ ແລະ ເປັນຫ່ວງເປັນໃຍຕໍ່ຊີວິດການເປັນຢູ່ຂອງປະຊາຊົນໃນຈໍານວນ 22 ຄອບຄົວທີ່ຂາດທີ່ພັກພາອາໄສ; ສະເໜີໃຫ້ອໍານາດການປົກຄອງກ່ຽວຂ້ອງເອົາໃຈໃສ່ຮີບຮ້ອນບຸກເບີກຈັດສັນທີ່ດິນປຸກສ້າງ, ທີ່ດິນທໍາການຜະລິດໃຫ້ແຕ່ລະຄອບຄົວຕາມຄວາມເໝາະສົມໂດຍໄວ ເພື່ອເປັນການຟື້ນຟູຊີວິດກໍຄືທາງດ້ານຈິດໃຈເຂົາເຈົ້າໃຫ້ດໍາເນີນຊີວິດຢ່າງເປັນປົກກະຕິ; ພ້ອມນັ້ນ, ທ່ານຍັງໄດ້ຮຽກຮ້ອງທຸກພາກສ່ວນຂອງສັງຄົມ ທີ່ມີນໍ້າໃຈເພື່ອແຜ່ຢາກປະກອບສ່ວນຊ່ວຍເຫລືອຄອບຄົວຈາກເຫດການໄຟໃໝ້ ບໍ່ວ່າຈະເປັນວັດຖຸ, ສິ່ງຂອງເຄື່ອງນຸ່ງຫົ່ມ ແລະ ອື່ນໆ ກໍສາມາດປະກອບສ່ວນຊ່ວຍເຫລືອໄດ້ຕາມຄວາມເໝາະສົມ.

(ຄໍາຜ່ອນ)