ເຝິກອົບຮົມທັກສະການຕິດຕາມ-ກວດກາ, ການຊັກຖາມ ແລະ ການລົງພົບປະຜູ້ມີສິດເລືອກຕັ້ງ

13/05/2019 00:00 -

(ສພຊ) ວັນທີ 6-7 ພຶດສະພາ 2019 ທີ່ຫ້ອງວ່າການປົກຄອງແຂວງຫລວງພະບາງ, ສະຖາບັນຄົ້ນຄວ້ານິຕິກຳສະພາແຫ່ງຊາດ ໄດ້ຈັດກອງປະຊຸມເຝິກອົບຮົມທັກສະການຕິດຕາມກວດກາ, ການຊັກຖາມແລະ ການລົງພົບປະຜູ້ມີສິດເລືອກຕັ້ງໃຫ້ແກ່ສະມາຊິກສະພາປະຊາຊົນແຂວງ (ສສຂ) ໂດຍການເປັນປະທານຂອງສະຫາຍ ຄໍາເຜີຍ ປານມະໄລທອງ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ; ມີຜູ້ຕາງໜ້າຈາກຄະນະວຽກງານຜູ້ແທນປະຊາຊົນ, ຄະນະປະຈຳແຫ່ງຊາດຫວຽດນາມ ນຳໂດຍສະຫາຍ ຫວຽນ ຕ໋ວນ ແອັງ ສະມາຊິກສະພາແຫ່ງຊາດແຂວງບິ່ງເຟືອກ, ຮອງຫົວໜ້າຄະນະຊ່ວຍວຽກງານຜູ້ແທນປະຊາຊົນສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍວິທະຍາກອນຈາກ ສສ.ຫວຽດນາມ; ເຂົ້າຮ່ວມມີສະມາຊິກສະພາປະຊາຊົນແຂວງ (ສສຂ) ຈາກ 7 ແຂວງພາກເໜືອ, ຕາງໜ້າຄະນະເລຂາທິການສະພາປະຊາຊົນແຂວງຈາກແຂວງພາກເໜືອ, ເປົ້າໝາຍທີ່ຈະສ້າງເປັນຄູເຝິກທີ່ມາຈາກສະພາແຫ່ງຊາດ ແລະ ພະນັກງານທີ່ກ່ຽວຂ້ອງ 200 ກວ່າທ່ານ.

          ຈຸດປະສົງແມ່ນເພື່ອເປັນການຍົກລະດັບທັກສະ ແລະ ຂີດຄວາມສາມາດໃນການຕິດຕາມກວດກາ ໃຫ້ແກ່ ສສຂ ໄດ້ຢ່າງທົ່ວເຖິງ ແລະ ເລິກເຊິ່ງກວ່າເກົ່າ; ເພື່ອເປັນການແລກປ່ຽນບົດຮຽນ, ທັກສະ ການຊັກຖາມຂອງ ສສຂ;  ທັງເປັນການສ້າງໃຫ້ມີວິທະຍາກອນປະຈຳສະພາແຫ່ງຊາດ ທີ່ມີຄວາມຮູ້ທາງດ້ານວຽກງານຕິດຕາມ-ກວດກາ ແລະ ຊັກຖາມ ສືບຕໍ່ຜັນຂະຫຍາຍໄປສູ່ ສສຂ ປະຈຳຢູ່ແຕ່ລະທ້ອງຖິ່ນ.

ໃນໂອກາດນີ້, ສະຫາຍ ຄຳເຜີຍ ປານມະໄລທອງ ໄດ້ມີຄໍາເຫັນວ່າ: ການເຝິກອົບຮົມຄັ້ງນີ້ແມ່ນແນໃສ່ຍົກລະດັບໃຫ້ຜູ້ແທນໃນດ້ານທັດສະນະອັນຈຳເປັນຈຳນວນໜຶ່ງເປັນຕົ້ນແມ່ນໃນການລົງຕິດຕາມ-ກວດກາ ຂອງ ສສຂໃນການຊັກຖາມແລະການລົງພົບປະຜູ້ມີສິດເລືອກຕັ້ງ; ກອງປະຊຸມຄັ້ງນີ້ເປັນການລະດົມຄືນຂັ້ນຕອນ, ວຽກທີ່ຕ້ອງເຮັດເພື່ອໃຫ້ບັນດາສະຫາຍກຳແໜ້ນຕື່ມ ທັງເປັນການປັບປຸງຍົກລະດັບຄວາມຮູ້ຂອງຜູ້ແທນໃຫ້ສູງຂຶ້ນຕື່ມ; ພ້ອມດຽວກັນນັ້ນ, ສະຫາຍ ຫວຽນ ຕ໋ວນ ແອັງກໍໄດ້ມີຄຳເຫັນວ່າ: ການເຝິກອົບຮົມຄັ້ງນີ້ເພື່ອເປັນການຍົກສູງປະສິດທິຜົນໃຫ້ແກ່ການເຄື່ອນໄຫວພົບປະປະຊາຊົນ ຂອງ ສສຂ ແລະ ບັນດາທັກສະສຳຄັນຕ່າງໆທີ່ບໍ່ສາມາດເບິ່ງຂ້າມໄດ້ ພ້ອມທັງເປັນການເສີມຂະຫຍາຍສາຍພົວພັນຮ່ວມມືພິເສດຂອງສອງຊາດລາວ-ຫວຽດນາມ ກໍຄືສະພາຂອງສອງປະເທດ; ພ້ອມນັ້ນ, ຍັງຮຽກຮ້ອງໃຫ້ສຳມະນາກອນເຂົ້າໃຈ ແລະ ກຳໄດ້ເນື້ອໃນຈິດໃຈຂອງກອງປະຊຸມ ແລ້ວນຳໄປຈັດຕັ້ງປະຕິບັດໃຫ້ເກີດດອກອອກຜົນ.

          ໃນກອງປະຊຸມຄັ້ງນີ້,ຜູ້ເຂົ້າຮ່ວມຈະໄດ້ຮັບຟັງບົດຮຽນກ່ຽວກັບທັກສະການຕິດຕາມ-ກວດກາ ຈາກສະຫາຍ ເລືອງ ແອັງ ເຕ້ ສະມາຊິກສະພາປະຊາຊົນ ແຂວງຫາຍເຢືອງ ສະໄໝປີ 2011-2016, ຮອງປະທານສະມາຄົມມິດຕະພາບຫວຽດນາມ-ລາວ ແຂວງຫາຍເຢືອງ; ທັກສະການຊັກຖາມ ຈາກສະຫາຍ ຫງວຽນ ມິງ ຖ້ຽດ ອະດີດຮອງປະທານກຳມາທິການວັດທະນະທຳ, ການສຶກສາ, ຊາວໝຸ່ມ, ເຍົາວະຊົນ ແລະ ອານຸຊົນ ແລະ ທັກສະການລົງພົບປະຜູ້ມີສິດເລືອກຕັ້ງ ຈາກສະຫາຍ ນາງ ຫງວຽນ ທິ ງາ ຫົວໜ້າສູນບຳລຸງຜູ້ແທນປະຊາຊົນ ຫ້ອງວ່າການສະພາແຫ່ງ ສສ.ຫວຽດນາມ; ພ້ອມນັ້ນ, ກອງປະຊຸມຍັງໄດ້ມີການຈັດແບ່ງກຸ່ມຄົ້ນຄວ້າ, ສົນທະນາແລກປ່ຽນຄຳຄິດຄຳເຫັນ, ເຮັດບົດເຝິກຫັດ ແລະ ແກ້ໄຂບັນດາຂໍ້ຂ້ອງໃຈຕື່ມອີກ.

         

(ນາງ ອາລິນ ສຸພິມມະປະດິດ)