ກໍາມາທິການ ສະພາແຫ່ງຊາດ ຕິດຕາມກວດກາຢູ່ແຂວງສາລະວັນ

13/05/2019 00:00 -

(ສພຊ) ໃນວັນທີ30 ເມສາ ຜ່ານມາ, ທ່ານສາຍທອງ ແກ້ວດວງດີ ປະທານກໍາມາທິການກົດໝາຍສະພາແຫ່ງຊາດ (ສພຊ) ພ້ອມດ້ວຍຄະນະໄດ້ເຄື່ອນໄຫວຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍຢູ່ແຂວງສາລະວັນໂດຍການຕ້ອນຮັບຂອງທ່ານທອງດີ ຈັນທະວົງ ຮອງປະທານສະພາປະຊາຊົນແຂວງ (ສພຂ);ມີບັນດາທ່ານສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ (ສສຂ), ຄະນະກໍາມະການ, ຕາງໜ້າບັນດາພະແນກການ, ຄະນະເລຂາທິການ ສພຂ, ພະນັກງານ-ລັດຖະກອນທີ່ກ່ຽວຂ້ອງເຂົ້າຮ່ວມ.

ໃນການເຄື່ອນໄຫວຄັ້ງນີ້, ຄະນະໄດ້ເຂົ້າພົບທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ເພື່ອລາຍງານແຜນການເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທໍາມະນູນແລະກົດໝາຍ ຢູ່ແຂວງສາລະວັນ ທ່ານເຈົ້າແຂວງໆສາລະວັນ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ລາຍງານການພັດທະນາເສດຖະກິດ-ສັງຄົມຂອງແຂວງໂດຍຫຍໍ້; ຈາກນັ້ນ, ຄະນະໄດ້ເຮັດວຽກຮ່ວມກັບ ສພຂ ແລະ ພະແນກການອ້ອມຂ້າງແຂວງ ເຊິ່ງໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານ ກໍຄືສະພາບການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍແລະການພົວພັນປະສານງານ ຈາກຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ; ຮັບຟັງການລາຍງານ ຈາກບັນດາອົງການປົກຄອງແຂວງ ກ່ຽວກັບບັນຫາທີ່ພົ້ນເດັ່ນໃນຂົງເຂດປົກປ້ອງກົດໝາຍ, ຂົງເຂດການປົກຄອງ, ຂົງເຂດວັດທະນະທໍາ-ສັງຄົມ ແລະ ຂົງເຂດປ້ອງກັນຊາດ-ປ້ອງກັນຄວາມສະຫງົບ ເຊິ່ງມີທັງຂໍ້ສະດວກ ແລະ ຂໍ້ຫຍຸ້ງຍາກ, ມາດຕະການຕະຫລອດຮອດວິທີການທີ່ຈະຕ້ອງໄດ້ປັບປຸງແກ້ໄຂ; ພ້ອມນັ້ນ, ທ່ານປະທານກໍາມາ ທິການກົດໝາຍ ພ້ອມດ້ວຍຄະນະ ຍັງໄດ້ຜັດປ່ຽນກັນຊັກຖາມ, ເຈາະຈີ້ມບາງບັນຫາໃນການຈັດຕັ້ງປະຕິບັດ ວຽກງານຂອງແຕ່ລະພາກສ່ວນ, ບັນດາຜູ້ເຂົ້າຮ່ວມໄດ້ພ້ອມກັນແລກປ່ຽນບົດຮຽນ, ປະກອບຄໍາຄິດ,ຄໍາເຫັນ ແລະ  ຕອບຂໍ້ຊັກຖາມໃນບາງຂໍ້ມູນຢ່າງກົງໄປ-ກົງມາ ແລະ ພາວະວິໃສຕາມຄໍາຖາມເຈາະຈີ້ມ ເພື່ອເປັນຂໍ້ມູນໃຫ້ແກ່ການດໍາເນີນ ກອງປະຊຸມສະໄໝມັນເທື່ອທີ 7 ຂອງສະພາແຫ່ງຊາດຊຸດທີ VIII ທີ່ຈະໄຂຂຶ້ນໃນຕໍ່ໜ້າ.

(ນາງ ຄັດສອນ ຮຸ່ງສະຫວ່າງ)