2 ກຳມາທິການເຄື່ອນໄຫວເຮັດວຽກຢູ່ແຂວງວຽງຈັນ

13/05/2019 00:00 -

(ສພຊ) ໃນວັນທີ 7 ພຶດສະພາ 2019 ທ່ານ ຄໍາແພງ ວິລະພັນ ຮອງປະທານກໍາມາທິການຍຸຕິທໍາ (ກມຍທ) ແລະ ທ່ານ ນາງ ບຸນພອນ ເຮືອງມະນີ ຮອງປະທານກໍາມາທິການກົດໝາຍ (ກກໝ) ສະພາແຫ່ງຊາດ (ສພຊ) ພ້ອມດ້ວຍຄະນະໄດ້ເຄື່ອນໄຫວເຮັດວຽກຢູ່ແຂວງວຽງຈັນ ທີ່ຫ້ອງປະຊຸມສະພາປະຊາຊົນແຂວງ ໂດຍການຕ້ອນຮັບຂອງທ່ານ ບຸນເພັງ ສາຍນໍລະດີ ປະທານສະພາປະຊາຊົນແຂວງ; ມີບັນດາທ່ານຄະນະປະຈໍາພັກແຂວງ, ຄະນະປະຈໍາສະພາ, ສະມາຊິກສະພາປະຊາຊົນແຂວງ, ຕະຫລອດຮອດບັນດາພະແນກການອ້ອມຂ້າງແຂວງເຂົ້າຮ່ວມ.

          ທັງນີ້ ກໍເພື່ອເປັນການຕິດຕາມການຈັດຕັ້ງປະຕິບັດມະຕິກອງປະຊຸມ ສພຊ ທີ່ພົວພັນວຽກງານໃນຂົງເຂດຍຸຕິທໍາ, ກົດໝາຍ ແລະ ສະມາຊິກສະພາແຫ່ງຊາດເພດຍິງ, ເພື່ອເປັນຂໍ້ມູນສັງລວມ ໃຫ້ແກ່ຄະນະປະຈໍາ ສພຊ ລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ VIII ພິຈາລະນາ.

          ກອງປະຊຸມໄດ້ຮັບຟັງການລາຍງານໂດຍຫຍໍ້ຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ; ການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ, ຄາດຄະເນປະຕິບັດແຜນໝົດປີ 2018 ແລະ ແຜນການປະຈໍາປີ 2019, ໂດຍເລັ່ງໃສ່ການຈັດເກັບລາຍຮັບຂອງແຕ່ລະຂະແໜງການ; ການລາຍງານການຄຸ້ມຄອງ ແລະທີ່ສານຕັດສິນໃຊ້ໄດ້ຢ່າງເດັດຂາດ ເພື່ອຮິບເປັນຂອງລັດໃຫ້ຄົບຖ້ວນ ແລະ ຖືກຕ້ອງຕາມກົດໝາຍ ແລະ ການລາຍງານກ່ຽວກັບສະພາບການຈັດຕັ້ງປະຕິບັດພາລະບົດບາດການຕິດຕາມກວດກາການຈັດຕັ້ງປະຕິບັດມະຕິສະບັບເລກທີ012/ສພຊ, ລົງວັນທີ 22 ມີຖຸນາ 2017, ມະຕິສະບັບເລກທີ 080/ສພຊ, ລົງວັນທີ 17 ພະຈິກ 2017 ແລະ ການແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນ ທີ່ຜ່ານມາມີດ້ານດີ, ດ້ານອ່ອນ, ສາເຫດ ແລະ ວິທີແກ້ໄຂຄືແນວໃດ.

          ນອກຈາກນີ້, ທ່ານຮອງປະທານທັງສອງກໍາມາທິການ ພ້ອມດ້ວຍຄະນະໄດ້ຕັ້ງຄໍາຖາມເຈາະຈີ້ມຫລາຍບັນຫາ ເປັນຕົ້ນແມ່ນການເກັບລາຍຮັບຂອງແຂວງມີສະພາບແນວໃດອັນໃດເປັນສາເຫດພາໃຫ້ຄົງຄ້າງ, ບໍ່ໄດ້ຕາມແຜນ ແລະ ເມື່ອເກັບມາແລ້ວລາຍຮັບຈໍານວນດັ່ງກ່າວແມ່ນສົ່ງໄປໃສ, ເປັນຫຍັງຄືຊັກຊ້າບໍ່ໄດ້ຕາມກໍານົດ, ການຮ່ວມລົງທຶນຊັກຊ້ານີ້ແມ່ນສາເຫດຈາກສູນກາງຫລືວ່າເປັນນໍາທ້ອງຖິ່ນ, ການເກັບພາສີທີ່ດິນອີງຕາມບົດລາຍງານວ່າໃຫ້ປະຊາຊົນເສຍຢູ່, ການຄຸ້ມຄອງສັບສິນທີ່ສານໄດ້ຕັດສິນ ແລະ ໄດ້ຍຶດເປັນຂອງລັດມີການຄຸ້ມຄອງແນວໃດ,ຜ່ານມາໄດ້ຮັບຄໍາຮ້ອງຂໍຄວາມເປັນທໍາມີຈັກສະບັບ, ບັນຫາພົ້ນເດັ່ນແມ່ນບັນຫາຫຍັງ, ໄດ້ແກ້ໄຂໄດ້ຈັກເລື່ອງແລ້ວ,ການຂະຫຍາຍມະຕິ 012/ສພຊ ລົງວັນທີ 22 ມິຖຸນາ 2017 ກ່ຽວກັບການຍົກສູງຄຸນະພາບການດໍາເນີນຄະດີຢູ່ສານຂັ້ນຕົ້ນ ແລະ ຂັ້ນອຸທອນລົງສູ່ປະຊາຊົນພາກ, ສານປະຊາຊົນແຂວງ ແລະ ສານປະຊາຊົນເຂດຄືແນວໃດ, ສານປະຊາຊົນແຂວງ ແລະ ເຂດ ໄດ້ຈັດຕັ້ັ້ງປະຕິບັດມະຕິ 012/ສພຊ ລົງວັນທີ 22 ມິຖຸນາ 2017 ກ່ຽວກັບການຍົກສູງຄຸນນະພາບການດໍາເນີນຄະດີຢູ່ສານຂັ້ນຕົ້ນ ແລະ ຂັ້ນອຸທອນເຂົ້າສູ່ວຽກງານຕົວຈິງຄືແນວໃດ, ໄດ້ມີການຄຸ້ມຄອງ ແລະ ນໍາໃຊ້ເງິນຄ່າທໍານຽມຄືແນວໃດ, ການພິພາກສາຄະດີຂອງແມ່ຍິງ ແລະ ເດັກ ທີ່ພົວພັນກັບກົດໝາຍອາຍາຜ່ານມາໄດ້ປະຕິບັດແນວໃດ, ແລະ ບັນຫາອື່ນໆອີກ. ຈາກນັ້ນ ບັນດາຕ່າງໜ້າຈາກພະແນກການທີ່ກ່ຽວຂ້ອງໄດ້ຜັດປ່ຽນກັນຂຶ້ນອະທິບາຍຊີ້ແຈງ ແລະ ປະກອບຄໍາເຫັນໃສ່ຄໍາຖາມເຈາະຈີ້ມດັ່ງກ່າວ ເພື່ອສະໜອງຂໍ້ມູນອັນລະອຽດທີ່ຈະເປັນຂໍ້ມູນນໍາມາລາຍງານຄະນະປະຈໍາ ສພຊ.

(ສອນສັກ ວັນວິໄຊ)