ຄະນະເລຂາທິການສະພາແຫ່ງຊາດ ລາວ-ກຳປູເຈຍ ແລກປ່ຽນບົດຮຽນໃນການເປັນເຈົ້າພາບຈັດກອງປະຊຸມ ອາແຊັບ-7

11/06/2019 00:00 -

(ສພຊ) ໃນວັນທີ 1 ມິຖຸນາ 2019 ຄະນະເລຂາທິການສະພາແຫ່ງຊາດລາວ-ກໍາປູເຈຍ ໄດ້ຈັດກອງປະຊຸມແລກປ່ຽນບົດຮຽນການເປັນເຈົ້າພາບຈັດກອງປະຊຸມອາແຊັບ-7 ທີ່ ສປປລາວ ເປັນເຈົ້າພາບໃນປີ 2012 ຢູ່ທີ່ຫ້ອງປະຊຸມໂຮງແຮມແລນມາກ ນະຄອນຫລວງວຽງຈັນ ຝ່າຍລາວນໍາໂດຍທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ພ້ອມດ້ວຍຄະນະ, ຝ່າຍກໍາປູເຈຍນໍາໂດຍທ່ານ ເລັງ ເປັງ ລອງ (Leng Peng Long) ເລຂາທິການໃຫຍ່ສະພາແຫ່ງຊາດກໍາປູເຈຍ ພ້ອມດ້ວຍຄະນະ.

          ທັງນີ້ ກໍເພື່ອເປັນການແລກປ່ຽນບົດຮຽນການເປັນເຈົ້າພາບຈັດກອງປະຊຸມການເປັນຄູ່ຮ່ວມລັດຖະສະພາອາຊີ-ເອີຣົບຄັ້ງທີ 7 (ASEP-7) ທີ່ ສປປລາວ ເປັນເຈົ້າພາບໃນປີ 2012.

          ໃນກອງປະຊຸມ ໄດ້ຮັບຟັງການຂຶ້ນສະເໜີບົດຮຽນການເປັນເຈົ້າພາບຈັດກອງປະຊຸມອາແຊັບ-7 ຂອງສະພາແຫ່ງຊາດລາວ ຈາກຫົວໜ້າກົມພົວພັນລັດຖະສະພາຫລາຍຝ່າຍ; ຈາກນັ້ນ, ຜູ້ແທນທັງສອງຝ່າຍກໍໄດ້ປຶກສາຫາລືແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ໃສ່ບັນຫາທີ່ສອງຝ່າຍໃຫ້ຄວາມສົນໃຈ.

          ໂອກາດດັ່ງກ່າວ ທ່ານ ນາງ ສວນສະຫວັນ ວິຍະເກດ ໄດ້ມີຄໍາເຫັນວ່າ: ພາຍຫລັງທີ່ໄດ້ມີການແລກປ່ຽນຄໍາຄິດຄໍາເຫັນ ແລະ ບົດຮຽນກ່ຽວກັບການເປັນເຈົ້າພາບຈັດກອງປະຊຸມອາແຊັບ-7 ຢູ່ ສປປລາວ ຢ່າງເລິກເຊິ່ງກົງໄປກົງມາ ແລະ ເປັນກັນເອງໃນຄັ້ງນີ້ ຂ້າພະເຈົ້າຫວັງຢ່າງຍິ່ງວ່າຜົນຂອງການປຶກສາຫາລື ແລະ ບົດຮຽນທີ່ໄດ້ສະເໜີໃນຄັ້ງນີ້ ຈະເປັນຂໍ້ມູນທີ່ມີປະໂຫຍດໃຫ້ບັນດາທ່ານ ບໍ່ຫລາຍກໍໍໜ້ອຍ ແລະ ເຊື່ອໝັ້ນວ່າ ກອງປະຊຸມອາແຊັບທີ 11 ທີ່ພະນົມເປັນ ໂດຍການເປັນເຈົ້າພາບຂອງສະພາແຫ່ງຊາດກໍາປູເຈຍ ໂດຍສະເພາະພາຍໃຕ້ການບໍລິຫານຈັດການຂອງທ່ານເລຂາທິການ ພ້ອມດ້ວຍຄະນະ ທີ່ມີປະສົບການສູງ ຈະເຮັດໃຫ້ກອງປະຊຸມສໍາຄັນດັ່ງກ່າວໄດ້ຮັບຜົນສໍາເລັດອັນຈົບງາມ.

(ສອນສັກ ວັນວິໄຊ)