ປະທານ ກສຕສ ຕິດຕາມກວດກາການຈັດຕັ້ງປະຕິບັດວຽກງານຂົງເຂດເສດຖະກິດ

16/09/2019 00:00 -

(ສພຊ) ໃນວັນທີ 2 ກັນຍາ 2019 ທີ່ຫ້ອງປະຊຸມສະພາປະຊາຊົນແຂວງ (ສພຂ) ວຽງຈັນ ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ເຮັດວຽກຢູ່ແຂວງວຽງຈັນ ເພື່ອຕິດຕາມກວດກາການຈັດຕັ້ງປະຕິບັດວຽກງານໃນຂົງເຂດເສດຖະກິດ ໂດຍການເຂົ້າຮ່ວມຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ, ບັນດາພະແນກການກ່ຽວຂ້ອງອ້ອມຂ້າງແຂວງເຂົ້າຮ່ວມ, ໂດຍການຕ້ອນຮັບຂອງທ່ານ ດາວເຮືອງ ນັນທາວົງ ຄະນະປະຈໍາພັກແຂວງ, ຮອງເຈົ້າແຂວງໆວຽງຈັນ, ທ່ານ ສົມດີ ແກ້ວດາລາວິນ ກໍາມະການພັກແຂວງ, ຮອງປະທານ ສພຂ ວຽງຈັນ, ປະທານກໍາມາທິການເສດຖະກິດແຜນການ ແລະ ການເງິນ ສະພາປະຊາຊົນແຂວງ.

ທັງນີ້ ເພື່ອຕິດຕາມກວດກາການຈັດຕັ້ງປະຕິບັດວຽກງານຂົງເຂດເສດຖະກິດ ເປັນຕົ້ນການເຊົ່າ ແລະ ສໍາປະທານເນື້ອທີ່ດິນ ເພື່ອດໍາເນີນກິດຈະການຕ່າງໆ ເປັນຕົ້ນກິດຈະການການຜະລິດກະສິກໍາ (ປູກກ້ວຍເປັນສິນຄ້າ), ປູກໄມ້ອຸດສາຫະກໍາ,ໄຟຟ້າ, ບໍ່ແຮ່, ການທ່ອງທ່ຽວ ແລະ ການດໍາເນີນກິດຈະການຕິດຕັ້ງ ແລະ ສ້ອມແປງໄຟຟ້າ ລວມທັງມາດຕະຖານເຕັກນິກອຸປະກອນການໄຟຟ້າ ແລະ ລາຄາຕໍ່ໄຟຟ້າເຂົ້າເຮືອນ, ການຈັດຕັ້ງປະຕິບັດບັນດາຄາດໝາຍ ແລະ ມາດຕະການຕ່າງໆໃນການພັດທະນາເສດຖະກິດ-ສັງຄົມປະຈໍາປີ 2019 ໂດຍສະເພາະຄາດໝາຍທີ່ຕິດພັນກັບຂົງເຂດເສດຖະກິດ,ການຄ້າຊາຍແດນ ແລະ ການບໍລິຫານການຂົນສົ່ງສິນຄ້າຜ່ານຊາຍແດນລາວ-ຫວຽດນາມ ໄປພ້ອມກັນ ນັ້ນ, ຍັງໄດ້ລົງຕິດຕາມກວດກາພື້ນທີ່ຕົວຈິງຢູ່ 2 ຈຸດຄື: ໂຮງງານປຣາສະຕິກ ບ້ານໂພນຄໍາ ເມືອງແກ້ວອຸດົມ ແຂວງວຽງຈັນ ແລະ ໂຄງການປູກກ້ວຍຈີນຢູ່ບ້ານໂພນຄຳ ເມືອງແກ້ວອຸດົມ ແຂວງວຽງຈັນ.