ຮອງປະທານ ກວທສ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7

16/09/2019 00:00 -

 

 (ສພຊ) ລະຫວ່າງວັນທີ 26-29 ສິງຫາ 2019, ທ່ານ ນາງ ມະນີວັນ ເຢຍປາວເຮີ ຮອງປະທານກຳມາທິການ ວັດທະນະທຳ-ສັງຄົມ (ກວທສ) ສະພາແຫ່ງຊາດ, ທັງເປັນສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 8 ແຂວງຫົວພັນ ພ້ອມດ້ວຍຄະນະ ໄດ້ນຳເອົາເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ແລະ ກອງປະຊຸມສະໄໝສາມັນເທື່ອ 7 ຂອງສະພາປະຊາຊົນແຂວງ ຊຸດທີ I ລົງເຜີຍແຜ່ໃຫ້ພໍ່ແມ່ປະຊາຊົນບັນດາເຜົ່າ ຢູ່ພາຍໃນເທສະບານເມືອງຮ້ຽມ, ບ້ານວຽງທອງ, ບ້ານປຸ່ງປິ່ນ, ບ້ານໂພນສະອາດ, ບ້ານນ້ຳປຸ່ງ ແລະ ບ້ານສາກົກ ເຂົ້າຮ່ວມມີຄະນະພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານລັດຖະກອນ, ທະຫານ, ຕຳຫລວດ ແລະ ພໍ່ແມ່ປະຊາຊົນບັນດາເຜົ່າ ເຊິ່ງມີຜູ້ເຂົ້າຮ່ວມຮັບຟັງທັງໝົດ 611 ຄົນ ຍິງ 319 ຄົນ.

ເນື້ອໃນທີ່ນຳມາເຜີຍແຜ່ໃນຄັ້ງນີ້ ປະກອບມີ: ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ແລະ ຜົນສຳເລັດຂອງກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຫົວພັນ ຊຸດທີ I ຈາກນັ້ນ, ກອງປະຊຸມຍັງໄດ້ຮັບຟັງການລາຍງານໂດຍຫຍໍ້ກ່ຽວກັບວຽກງານການພັດທະນາຂອງເມືອງ, ຂອງບ້ານ ໃນໄລຍະຜ່ານມາ ຂອງບັນດາເມືອງຈຸດສຸມ, ພ້ອມນັ້ນ ກໍໄດ້ຊັກຖາມເຈາະຈີ້ມຕໍ່ບົດລາຍງານດັ່ງກ່າວ ແລະ ລົງຕິດຕາມພື້ນທີ່ຕົວຈິງ ໃນເຂດຈຸດສຸມ ແລະ ຜູ້ມີສິດເລືອກຕັ້ງໄດ້ມີຄຳຄິດຄຳເຫັນ, ຄຳສະເໜີຕໍ່ ສສຊ, ສະມາຊິກສະພາປະຊາຊົນແຂວງ (ສສຂ) ຕໍ່ກັບຄຳສະເໜີຂອງພໍ່ແມ່ປະຊາຊົນສ່ວນຫລາຍ ແມ່ນກ່ຽວກັບການພັດທະນາພື້ນຖານໂຄງລ່າງ, ວຽກງານໂຍທາທິການ-ຂົນສົງ, ນະໂຍບາຍຕໍ່ພະນັກງານປະຕິວັດເສຍຊີວິດປາງສົງຄາມ ແລະ ບັນຫາຕ່າງໆທີ່ເກີດຂຶ້ນໃນເມືອງ.

ໂອກາດດັ່ງກ່າວ ບັນດາທ່ານ ສສຊ, ສສຂ ໄດ້ຊີ້ແຈງບາງບັນຫາໃຫ້ປະຊາຊົນຮັບຊາບແລ້ວ ສ່ວນບາງບັນຫາທີ່ພົວພັນກັບຂະແໜງການອື່ນ ແລະ ບໍ່ທັນມີຄຳຕອບຈະແຈ້ງ ທາງເມືອງຈະນຳໄປປະສານສົມທົບກັບພາກສ່ວນທີ່ກ່ຽວຂ້ອງ ເພື່ອແກ້ໄຂໃນຂັ້ນຕອນຕໍ່ໄປ ແລະ ບັນດາທ່ານ ສສຊ, ສສຂ ຍັງໄດ້ຮຽກຮ້ອງມາຍັງພະນັກງານການນຳເມືອງ ແລະ ພໍ່ແມ່ປະຊາຊົນບັນດາເຜົ່າ ຈົ່ງພ້ອມກັນເປັນເຈົ້າການເອົາໃຈໃສ່ສືບຕໍ່ໃນການຈັດຕັ້ງປະຕິບັດໜ້າທີ່ວຽກງານການພັດທະນາຊົນນະບົດ, ລຶບລ້າງຄວາມທຸກຍາກຂອງປະຊາຊົນບັນດາເຜົ່າ ໃຫ້ນັບມື້ພັດທະນາຂຶ້ນເລື້ອຍໆ.