ສພຊ ຮຽນຮູ້ລະບົບການບໍລິການຫ້ອງການທັນສະໄໝ

16/09/2019 00:00 -

 

(ສພຊ) E-office ແມ່ນການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ​ເຂົ້າ​ມາ​ຊ່ວຍ​ການ​ຈໍລະ​ຈອນ​​ເອກະສານ ໃນ​ການ​ຈັດການ​ຂອງສຳນັກງານ ຫລື ຫ້ອງການ ​ໃຫ້​ມີ​ປະສິດທິພາບ ມີ​ຄວາມ​ຄ່ອງ​ຕົວ ສະດວກ​ສະບາຍ ​ແລະ ວ່ອງ​ໄວ ທັນ​ສະ​ໄໝ; ​ໃນ​ວັນ​ທີ 5 ກັນຍາ 2019 ກະຊວງ​ໄປສະນີ ​ໂທລະ​ຄົມມະນາຄົມ ​ແລະ ການ​ສື່ສານ ໄດ້​​ເຜີຍ​ແຜ່ຂໍ້ມູນ ກ່ຽວກັບລະບົບຫ້ອງການ​ທັນສະ​ໄໝ (E-office) ໃຫ້ພະນັກງານພາຍໃນສະພາ​ແຫ່ງ​ຊາດ (ສພຊ) ​ທີ່​ຫ້ອງ​ປະຊຸມ​ຄະນະ​ເລຂາທິການ​ສະ​ແຫ່ງ​ຊາດ (ຫລັກ 6) ນະຄອນຫລວງ​ວຽງຈັນ ​ໂດຍ​ການ​ເປັນປະທານ​ຮ່ວມ​ຂອງ​ທ່ານ ຄຳ​ແທ່ນ ວິລະ​ກຸນ ຮອງ​ຫົວໜ້າກົມ​ເລຂານຸການ ຄະ​ນະ​ເລຂາທິການ​ສະພາ​ແຫ່ງ​ຊາດ ​ແລະ ທ່ານ ທະວີ​ສັກ ມະ​ໂນ​ທັມ ຫົວໜ້າສູນບໍລິຫານ​ລັດ​ດ້ວຍ​ເອ​ເລັກ​ໂຕຣນິກ ກະຊວງ​ໄປສະນີ​ ​ໂທລະ​ຄົມມະນາຄົມ ​ແລະ ການ​ສື່ສານ; ​ເຂົ້າ​ຮ່ວມ​ມີ​ບັນດາ​ຄະນະ​ກົມ,​ ສູນ, ຄະນະ​ພະ​ແນ​ກ ​ແລະ ພະນັກງານ​ສະພາ​ແຫ່ງ​ຊາດ ​ແລະ ສູນ​ບໍລິຫານ​ລັດ​ດ້ວຍ​ເອ​ເລັກ​ໂຕຣນິກ.

ຈຸດ​ປະ​ສົງ​ເພື່ອ​ຜັນ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ທິດ​ທາງ​ຫັນ​ເປັນ​ທັນ​ສະ​ໄໝຂອງ​ຄະນ​ະ​ເລ​ຂາ​ທິການ​ສະພາ​ແຫ່ງ​ຊາດ​​ໃຫ້​ເກີດ​ຜົນ​ເປັນ​ຈິງ.

ເນື້ອໃນທີ່ນໍາມາ​ສະ​ເໜີໃນຄັ້ງນີ້ ປະກອບມີ: ​ລະບົບ​ການ​ບໍລິຫານ​ຫ້ອງການ​ທັນ​ສະ​ໄໝ (E-office), ກອງ​ປະຊຸມ​ທາງ​ໄກ (Video Conference) ແລະ ຈົດໝາຍ​ເອ​ເລັກ​ໂຕຣນິກ (Email) ໝູນ​ໃຊ້​ເຂົ້າ​ໃນ​ວຽກງານ​ຂອງ​ແຕ່​ລະ​ພາກສ່ວນ​ພາຍ​ໃນ​ສະພາ​ແຫ່ງ​ຊາດ​ໃຫ້​ມີ​ປະສິດທິ​ຜົນ.