ກວທສ ຕິດຕາມກວດກາ, ຊຸກຍູ້ການຈັດຕັ້ງປະຕິບັດວຽກງານໂພຊະນາການ

16/09/2019 00:00 -

 

 (ສພຊ) ລະຫວ່າງວັນທີ 1-7 ກັນຍາ 2019 ກໍາມາທິການວັດທະນະທໍາ-ສັງຄົມ ສະພາແຫ່ງຊາດ ນໍາໂດຍ ທ່ານ ສົມພູ ດວງສະຫວັນ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການວັດທະນະທໍາ-ສັງຄົມ ພ້ອມດ້ວຍຄະນະ ປະກອບດ້ວຍທ່ານ ບົວທອງ ອຸແສງຄໍາ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 2 ແຂວງຜົ້ງສາລີ,  ທ່ານ ຄໍາຫລ້າ ພິລະຕ່ອມ ສສຊ ປະຈໍາເຂດເລືອກຕັ້ງທີ 3 ແຂວງຫລວງນໍ້າທາ, ທ່ານ ສົມລິດ ສີພາວັນ ສສຊ ປະຈໍາເຂດເລືອກຕັ້ງທີ 5 ແຂວງບໍ່ແກ້ວ ແລະ ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງຜົ້ງສາລີ, ມີທ່ານຫົວໜ້າ-ຮອງຫົວໜ້າກົມ ແລະ ວິຊາການຈາກສະພາແຫ່ງຊາດ, ຕາງໜ້າຈາກກະຊວງສາທາລະນະສຸກ ແລະ ຕາງໜ້າຈາກອົງການ UNICEF ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດວຽກງານໂພຊະນາການ ແລະ ບັນຫາທີ່ກ່ຽວຂ້ອງກັບເດັກ ຢູ່ເມືອງຍອດອູ ແລະ ເມືອງບຸນເໜືອ ແຂວງຜົ້ງສາລີ.

ຈຸດປະສົງຂອງການເຄື່ອນໄຫວເຮັດວຽກຄັ້ງນີ້ ເພື່ອຕິດຕາມກວດກາ, ຊຸກຍູ້, ເຜີຍແຜ່ ແລະ ສ້າງຄວາມເຂົ້າໃຈ ກ່ຽວກັບການຂາດໂພຊະນາການ, ການລ້ຽງລູກດ້ວຍນໍ້ານົມແມ່, ການສັກຢາກັນພະຍາດ, ການສຶກສາກ່ອນໄວຮຽນ ແລະ ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ; ເພື່ອເຜີຍແຜ່ ແລະ ສ້າງຄວາມເຂົ້າໃຈ ກ່ຽວກັບນະໂຍບາຍໂພຊະນາການ ແລະ ບັນດາກົດໝາຍ ເປັນຕົ້ນກົດໝາຍວ່າດ້ວຍການສຶກສາ, ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ, ກົດໝາຍວ່າດ້ວຍການອະນາໄມ, ກັນພະຍາດ ແລະ ສົ່ງເສີມສຸຂະພາບ, ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ແລະ ນິຕິກຳອື່ນໆທີ່ກ່ຽວຂ້ອງ; ເພື່ອພົບປະ ແລະ ຮັບຟັງຄຳສະເໜີຂອງປະຊາຊົນ; ເພື່ອປຶກສາຫາລືຮ່ວມກັບບັນດາອົງການປົກຄອງທີ່ກ່ຽວຂ້ອງ; ເພື່ອປຶກສາຫາລື ແລະ ສົ່ງຄຳສະເໜີໃຫ້ບັນດາກະຊວງທີ່ກ່ຽວຂ້ອງນຳໄປຈັດຕັ້ງປະຕິບັດເພື່ອປັບປຸງວຽກງານໃນຕໍ່ໜ້າ.

ໂອກາດດັ່ງກ່າວ ຄະນະ ໄດ້ລົງເຄື່ອນໄຫວວຽກງານຕົວຈິງໃນ 2 ເມືອງ ແລະ ກຸ່ມບ້ານເປົ້າໝາຍ ເປັນຕົ້ນ ເມືອງຍອດອູ ໄດ້ລົງເຄື່ອນໄຫວທີ່ບ້ານສະຫວ່າງ, ສຸກສາລາບ້ານຕ້າງ ແລະ ເມືອງບຸນເໜືອ ແມ່ນບ້ານດອນຊາຍ, ໂຮງຮຽນ ແລະ ສຸກສາລານໍ້າລູ ເພື່ອຕິດຕາມກວດກາກ່ຽວກັບໂພຊະນາການ, ການນຳໃຊ້ນ້ຳສະອາດ ແລະ ວິດຖ່າຍ; ການສຶກສາກ່ອນໄວຮຽນ; ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ  ພ້ອມທັງສາຍວີດີໂອ, ມອບແຜ່ນພັບ ແລະ ອຸປະກອນຈໍານວນໜຶ່ງ, ລົງຢ້ຽມຢາມຄົວເຮືອນ ເພື່ອສົນທະນາແລກປ່ຽນກ່ຽວກັບບັນຫາສຸຂະພາບ ແລະ ການສຶກສາຂອງປະຊາຊົນ ແລະ ລົງສັງເກດການຢູ່ໂຮງຮຽນ ແລະ ສຸກສາລາ ແລະ ສົນທະນາແລກປ່ຽນກ່ຽວກັບບັນຫາສຸຂະພາບ ແລະ ການສຶກສາຂອງປະຊາຊົນ. ໃນໂອກາດນີ້ຍັງໄດ້ຮ່ວມເຮັດວຽກກັບອໍານາດການປົກຄອງທັງ 2 ເມືອງ ແລະ ສະພາປະຊາຊົນຂັ້ນແຂວງ ພ້ອມດ້ວຍຫ້ອງການ ແລະ ພະແນກການທີ່ກ່ຽວຂ້ອງ ໂດຍການຈັດກອງປະຊຸມປຶກສາຫາລື ແລກປ່ຽນ, ຮັບຟັງການລາຍງານ ແລະ ຄຳສະເໜີ ເປັນຕົ້ນວຽກງານຂົງເຂດສຶກສາທິການ ແລະ ກິລາ, ສາທາລະນະສຸກ, ກະສິກຳ ແລະ ປ່າໄມ້, ແຜນການ ແລະ ການລົງທຶນ, ແຮງງານ ແລະ ສະຫວັດດີການສັງຄົມ, ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ແມ່ຍິງ, ຊາວໜຸ່ມ, ກຳມະບານ ແລະ ແນວລາວສ້າງຊາດ ຂອງແຂວງ ໂດຍສະເພາະວຽກງານກ່ຽວ​ກັບການ​ຈັດ​ຕັ້ງ​ປະ​ຕິ​ບັດບັນ​ດາ​ຄາດ​ໝາຍ​ຕາມແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ, ແຜນ​ງົບ​ປະ​ມານຂອງ​ແຂວງ, ການ​ສົ່ງ​ເສີມ​ວຽກ​ງານ​ໂພ​ຊະ​ນາ​ການ, ການສັກຢາກັນພະຍາດ, ການ​ນຳ​ໃຊ້​ນ້ຳ​ສະ​ອາດ ແລະ ວິດ​ຖ່າຍ ແລະ ການ​ສົ່ງ​ເສີມການລ້ຽງລູກດ້ວຍນໍ້ານົມແມ່, ການ​ຊຸກ​ຍູ້​ສົ່ງ​ເສີມກ່ຽວ​ກັບ​ການສຶກສາກ່ອນໄວຮຽນ,  ອ​ະ​ນຸ​ບານ ແລະ ​ຊັ້ນ​ປະ​ຖົມ ຕິດ​ພັນ​ກັບ​ການ​ສົ່ງ​ເສີມສຸ​ຂະ​ສຶກ​ສາ, ​​ຄວາມ​ຮູ້​ດ້ານ​ໂພ​ຊະ​ນາ​ການ​ໃນ​ໂຮງ​ຮຽນ ແລະ ວຽກງານອື່ນໆ ທີ່ຕິດພັນກັບບັນຫາໂພຊະນາການ ແລະ ບັນຫາກ່ຽວກັບເດັກ.

    ທ່ານ ສົມພູ ດວງສະຫວັນ ໄດ້ຍົກໃຫ້ເຫັນວ່າ: ບັນຫາໂພຊະນາການ ເປັນວຽກງານໜຶ່ງທີ່ມີຄວາມສໍາຄັນ, ການຂາດສານອາຫານແມ່ນມາຈາກຄອບຄົວທຸກຍາກ, ແມ່ທີ່ມີລະດັບການສຶກສາຕໍ່າ, ຊົນເຜົ່າທີ່ຢູ່ຊົນນະບົດຫ່າງໄກສອກຫລີກ ແລະ ບໍ່ມີໂອກາດເຂົ້າເຖິງການນໍາໃຊ້ນໍ້າສະອາດ, ສຸຂະອະນາໄມ, ສິ່ງແວດລ້ອມ ແລະ ການບໍລິການສຸຂະພາບທີ່ດີ, ນອກຈາກນັ້ນ ຍັງຕິດພັນກັບຄວາມເຊື່ອ, ຄວາມຊິນເຄີຍ ແລະ ຮີດຄອງປະເພນີ. ໃນໂອກາດດຽວກັນ ຍັງມີຄໍາເຫັນຮຽກຮ້ອງໃຫ້ອົງການປົກຄອງບ້ານ, ຄະນະນໍາເມືອງ, ແຂວງ ແລະ ບັນດາອົງການຈັດຕັ້ງທີ່ເຮັດວຽກງານກ່ຽວກັບການສົ່ງເສີມສຸຂະພາບ, ການພັດທະນາເດັກດ້ານການສຶກສາ ແລະ ການປົກປ້ອງສິດ ແລະ ຜົນປະໂຫຍດຂອງເດັກ ເປັນຕົ້ນ ຂະແໜງສາທາລະນະສຸກ, ສຶກສາທິການ ແລະ ກິລາ, ແຮງງານ ແລະ ສະຫວັດດີການສັງຄົມ, ຍຸຕິທໍາ, ສະຫະພັນແມ່ຍິງ, ຊາວໜຸ່ມ ແລະ ອື່ນໆ ທັງຂັ້ນສູນກາງ ແລະ ທ້ອງຖີ່ນ, ເອົາໃຈໃສ່ໃນການປະສານງານຮ່ວມກັນ, ພ້ອມກັນເພື່ອຊຸກຍູ້ສົ່ງເສີມການຈັດຕັ້ງປະຕິບັດວຽກງານ ແລະ ແກ້ໄຂຂໍ້ຄົງຄ້າງດັ່ງກ່າວໃຫ້ມີຜົນສໍາເລັດຕາມຄາດໝາຍທີ່ພັັກ-ລັດໄດ້ວາງໄວ້.