ປະທານ ກສຕສ ຕ້ອນຮັບການເຂົ້າຢ້ຽມຂຳນັບ ຂອງເອອັກຄະລັດຖະທູດ ຝຣັ່ງ

16/09/2019 00:00 -

        (ສພຊ) ເພື່ອເປັນການຕິດຕາມ, ກວດກາ ແລະ ເກັບກໍາຂໍ້ມູນໃນຂົງເຂດວຽກງານເສດຖະກິດ  ທັງເປັນບ່ອນອີງໃນການກະກຽມລາຍງານຕໍ່ກອງປະຊຸມຄະນະປະຈໍາ ແລະ ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໃນຕໍ່ໜ້າ ລະຫວ່າງວັນທີ 5-6 ກັນຍາຜ່ານມາ, ທ່ານ ບຸນປອນ ສີສຸລາດ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດວຽກງານເສດຖະກິດ ຢູ່ແຂວງບໍລິຄໍາໄຊ ໂດຍມີຄະນະປະຈໍາສະພາປະຊາຊົນແຂວງ, ຫົວໜ້າພະແນກການຂົງເຂດເສດຖະກິດ; ຄະນະພັກເມືອງ, ຄະນະດ່ານພາສີສາກົນນໍ້າພາວ ພ້ອມດ້ວຍວິຊາການເຂົ້າຮ່ວມ.

          ໂອກາດດັ່ງກ່າວ ໄດ້ຮັບຟັງລາຍງານການຈັດຕັ້ງປະຕິບັດວຽກງານຕາມຄໍາຖາມເຈາະຈີ້ມຂອງສະພາແຫ່ງຊາດ ກໍຄືປະທານ ກສຕສ ເປັນຕົ້ນແມ່ນ: ການເຊົ່າ ແລະ ສໍາປະທານເນື້ອທີ່ດິນເພື່ອດໍາເນີນກິດຈະການຕ່າງໆ ເປັນຕົ້ນກິດຈະການການຜະລິດກະສິກໍາ (ປູກກ້ວຍເປັນສິນຄ້າ), ປູກໄມ້ອຸດສາຫະກໍາ, ໄຟຟ້າ, ບໍ່ແຮ່, ການທ່ອງທ່ຽວ ແລະ ອື່ນໆ; ການດໍາເນີນກິດຈະການຕິດຕັ້ງ ແລະ ສ້ອມແປງໄຟຟ້າ ລວມທັງມາດຕະການເຕັກນິກ, ອຸປະກອນການໄຟຟ້າ ແລະ ລາຄາຕໍ່ໄຟຟ້າເຂົ້າເຮືອນ; ການຈັດຕັ້ງປະຕິບັດບັນດາຄາດໝາຍ ແລະ ມາດຕະການຕ່າງໆ ໃນແຜນພັດທະນາເສດຖະກິດ-ສັງຄົມ ປະຈໍາປີ 2019 ໂດຍສະເພາະຄາດໝາຍທີ່ຕິດພັນກັບຂົງເຂດເສດຖະກິດ; ການຄ້າຊາຍແດນ ແລະ ບໍລິການການຂົນສົ່ງສິນຄ້າຜ່ານແດນ ລາວ-ຫວຽດນາມ ໃນການລາຍງານໄດ້ຍົກໃຫ້ເຫັນເຖິງສະພາບການຈັດຕັ້ງປະຕິບັດ, ຂໍ້ສະດວກ, ຂໍ້ຫຍຸ້ງຍາກ ແລະ ວິທີການແກ້ໄຂວຽກງານຕ່າງໆທີ່ພາກສ່ວນກ່ຽວຂ້ອງຕ້ອງເອົາໃຈໃສ່ໃນການຈັດຕັ້ງປະຕິບັດ ເພື່ອຫລີກລ່ຽງຫາງສຽງຈົ່ມວ່າຂອງປະຊາຊົນຜູ້ທີ່ໄດ້ຮັບຜົນກະທົບໂດຍກົງ. ຫລັງຈາກນັ້ນ, ສະພາປະຊາຊົນແຂວງບໍລິຄໍາໄຊ ໄດ້ນໍາພາຄະນະລົງເບິ່ງສວນກ້ວຍຂອງບໍລິສັດ ພຸດພາວັນ ຢູ່ບ້ານຊົມຊື່ນ ເມືອງບໍລິຄັນ ແຂວງບໍລິຄໍາໄຊ ແລະ ເຂດບໍລິເວນດ່ານ ແລະ ເຂດເສດຖະກິດນໍ້າຫງາງ ຢູ່ເມືອງຄໍາເກີດ ຕື່ມອີກ.

(ນາງ ສຸພັນສາ ໂສພາ)