ຮອງປະທານ ກສຕສ ເຄື່ອນໄຫວ ເຮັດວຽກຢູ່ແຂວງ ອັດຕະປື

30/09/2019 00:00 -

(ສພຊ)  ວັນທີ 2 ກັນຍາ 2019, ທີ່ຫ້ອງປະຊຸມສະພາປະຊາຊົນແຂວງ (ສພຂ) ທ່ານ ນາງ ປິ່ງຄຳ ລາຊະສິມມາ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຮັດວຽກຮ່ວມກັບ ສພຂ ແລະ ບັນດາພະແນກການທີ່ກ່ຽວຂ້ອງ ໂດຍການຕ້ອນຮັບຂອງທ່ານ ເພັດແກ້ວ ເຮືອງປັນຍາ ປະທານ ສພຂ ອັດຕະປື, ເຂົ້າຮ່ວມມີຮອງປະທານ ສພຂ, ປະທານຄະນະກຳມະການເສດຖະກິດ, ແຜນການ ແລະ ການເງິນ, ຕາງໜ້າຈາກຫ້ອງວ່າການປົກຄອງແຂວງ, ພະແນກແຜນການ ແລະ ການລົງທຶນ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກກະສິກໍາ ແລະ ປ່າໄມ້ແຂວງ, ພະແນກອຸດສາຫະກຳ ແລະ ການຄ້າແຂວງ, ພະແນກພະລັງງານ ແລະ ບໍ່ແຮ່ແຂວງ, ພະແນກໂຍທາທິການ ແລະ ຂົນສົ່ງແຂວງ, ລັດວິສາຫະກິດໄຟຟ້າລາວ ປະຈໍາແຂວງ ແລະ ຄະນະຄຸ້ມຄອງດ່ານພູເກືອເຂົ້າຮ່ວມ.

          ຈຸດປະສົງຂອງການເຄື່ອນໄຫວເຮັດວຽກຄັ້ງນີ້ ແມ່ນເພຶ່ອຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ໃນຂົງເຂດວຽກງານເສດຖະກິດ, ເປັນຕົ້ນ: ການເຊົ່າ ແລະ ສຳປະທານເນື້ອທີ່ດິນ ໃນການດຳເນີນກິດຈະການການຜະລິດກະສີກຳເຊັ່ນ: ການປູກກ້ວຍເປັນສິນຄ້າ, ປູກໄມ້ອຸດສາຫະກຳ ແລະ ການທ່ອງທ່ຽວ, ການດຳເນີນກິດຈະການລະບົບໄຟຟ້າເຊັ່ນ: ມາດຕະການເຕັກນິກ, ອຸປະກອນການໄຟຟ້າ, ລາຄາຕໍ່ໄຟຟ້າເຂົ້າເຮືອນ, ຕິດຕັ້ງ ແລະ ສ້ອມແປງໄຟຟ້າຕ່າງໆ.

          ພາຍຫລັງທ່ານຮອງປະທານ ກສຕສ ໄດ້ມີຄຳຖາມເຈາະຈີ້ມ, ບັນດາພະແນກການທີ່ກ່ຽວຂ້ອງ ກໍໄດ້ລາຍງານສະພາບໂດຍຫຍໍ້ກ່ຽວກັບວຽກງານຂອງຕົນ ເປັນຕົ້ນ: ການມີສ່ວນຮ່ວມຂອງປະຊາຊົນ ແລະ ຜົນປະໂຫຍດສູງສຸດທີ່ໄດ້ຮັບໃນການໃຫ້ເຊົ່າ ແລະ ສຳປະທານເນື້ອທີ່ດິນ ເພື່ອດຳເນີນກິດຈະການຕ່າງໆ ໃນຮູບແບບ 1+4 ແລະ 2+3, ກົນໄກ ແລະ ວິທີການຈັດຕັ້ງປະຕິບັດຈັດເກັບລາຍຮັບພາສີອາກອນ ໃນການຜະລິດກະສິກຳ (ປູກກ້ວຍເປັນສິນຄ້າ), ປູກໄມ້ອຸດສາຫະກຳ, ໄຟຟ້າ, ບໍ່ແຮ່, ການທ່ອງທ່ຽວ, ຈັດເກັບອາກອນລາຍໄດ້ອື່ນໆ ໃນການດຳເນີນກິດຈະການຂອງໂຄງການຕ່າງ ທີ່ຕິດພັນກັບການໃຫ້ເຊົ່າ ແລະ ສຳປະທານເນື້ອທີ່ດິນ. ບັນດາພະແນກການຕ່າງ ກໍຜັດປ່ຽນກັນລາຍງານ ໃນນັ້ນ, ທ່ານ ລັດສະໝີ ວັນໄຊ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ໄດ້ລາຍງານໃຫ້ຊາບວ່າ: ເນື້ອທີ່ດິນໃນການເຊົ່າ ແລະ ສຳປະທານທັງໝົດມີ 35.770,44 ເຮັກຕາ ມີ 102 ໂຄງການ ເປັນຕົ້ນ: ໂຄງການປູກໄມ້ອຸດສາຫະກຳມີທັງໝົດ 10 ໂຄງການ ມີເນື້ອທີ່ 27.431,78 ເຮັກຕາ, ໂຄງການອຸດສາຫະກໍາປຸງແຕ່ງໄມ້ມີ 36 ໂຄງການ ມີເນື້ອທີ່ 105,26 ເຮັກຕາ, ໂຄງການພະລັງງານໄຟຟ້ານໍ້າຕົກມີ 8 ໂຄງການ ມີເນື້ອທີ່ 176,59 ເຮັກຕາ, ໂຄງການບໍລິການມີ 17 ໂຄງການ ມີເນື້ອທີ່ 42,98 ເຮັກຕາ, ໂຄງການສຳຫລວດຊອກຄົ້ນແຮ່ຄຳ, ທອງ, ຊຶນ, ບົກຊິດ, ແຮ່ຕິດພັນ ແລະ ຫີນປາໂກດາຍມີ 9 ໂຄງການ, ໂຄງການຂຸດຄົ້ນແຮ່ຊາຍມີ 17 ໂຄງການ, ໂຄງການປູກກ້ວຍມີ 5 ໂຄງການຂອງບໍລິສັດຮ່ວງແອງ ຢູ່ເມືອງໄຊເສດຖາ, ສະໜາມໄຊ, ພູວົງ ມີເນື້ອທີ່ທັງໝົດ 2.517,05 ເຮັກຕາ, ບໍລິສັດເຢຊິງ ມີ 120 ເຮັກຕາ, ບໍລິສັດຢູນຟານ ມີ 74 ເຮັກຕາ, ບໍລິສັດຄູນທະວີຊັບມີ 142 ເຮັກຕາ ຢູ່ເມືອງສາມັກຄີໄຊ, ບໍລິສັດສິບສອງພັນນາ ຢູ່ເມືອງສະໜາມໄຊ ມີ 468,9 ເຮັກຕາ.

ພ້ອມນັ້ນ, ທ່ານ ວິທະຍາ ພົມມະຈັນ ຫົວໜ້າພະແນກພະລັງງານ ແລະ ບໍ່ແຮ່ແຂວງ ລາຍງານໃຫ້ຮູ້ວ່າ: ການຄຸ້ມຄອງນຳເຂົ້າອຸປະກອນໄຟຟ້າຜ່ານມາ ກະຊວງພະລັງງານ ແລະ ບໍ່ແຮ່ ມອບໃຫ້ລັດວິສະຫະກິດໄຟຟ້າລາວ ເປັນຜູ້ກວດກາ ແລະ ຄຸ້ມຄອງມາດຕະຖານເຕັກນິກໄຟຟ້າຂອງ ສປປລາວ (052/ອຫ) ເນື່ອງຈາກການຊົມໃຊ້ໄຟຟ້າສ່ວນໃຫຍ່ແມ່ນເຊື່ອມຕໍ່ ແລະ ໃຫ້ການບໍລິການຂອງລັດວິສາຫະກິດໄຟຟ້າລາວພຽງຜູ້ດຽວ, ສ່ວນໂຄງການໄຟຟ້າ (IPP) ແລະ ການຈຳໜ່າຍອຸປະກອນໄຟຟ້າ ແມ່ນກະຊວງພະລັງງານ ແລະ ບໍ່ແຮ່ ເປັນຜູ້ຄຸ້ມຄອງຕາມກົດໝາຍ ແລະ ສັນຍາສຳປະທານ (CA) ໂດຍຜ່ານສະພາຮັບຮອງ, ການຕັ້ງໄຟເຂົ້າອາຄານ ຫລື ເຮືອນປະຊາຊົນ ສ່ວນໃຫຍ່ແມ່ນບໍລິສັດເອກະຊົນເປັນຜູ້ຕິດຕາມ ຕາມການອະນຸຍາດ, ສ່ວນລັດວິສະຫະກິດໄຟຟ້າລາວ ແມ່ນຕິດຕັ້ງໝໍ້ນັບໄຟ (ກົງເຕີ) ເຂົ້າໃຫ້ ແລະ ສົ່ງໄຟ ພ້ອມບໍລິການເກັບເງິນ ຫລື ຕັດໄຟໃນກໍລະນີບໍ່ຊໍາລະຄ່າກະແສໄຟຟ້າທີ່ຊົມໃຊ້ໄປແລ້ວ, ໃນກໍລະນີເປັນໂຄງການ REP (ໂຄງການພັດທະນາໄຟຟ້າຊົນນະບົດ) ຫລື ມີການສ້ອມແປງ ແລະ ຂະຫຍາຍຕາຂ່າຍບາງເຂດ ໄຟຟ້າລາວ ກໍສາມາດຕິດຕັ້ງໄຟເຂົ້າໃນອາຄານດ້ວຍຕົນເອງ ແລະ ຕິດຕັ້ງໝໍ້ນັບໄຟ ເພື່ອໃຫ້ປະຊາຊົນນຳໃຊ້ໄວຂຶ້ນ ແລະ ມີພິທີມອບ-ຮັບ ແລະ ການສົ່ງຕາມລະບຽບຂອງໂຄງການ, ກໍລະນີການແຈ້ງບິນເກັບເງິນ ທີ່ເຫັນມີມູນຄ່າສູງເກີນຄວາມຈິງ ແມ່ນໃຫ້ແຈ້ງຕໍ່ໄຟຟ້າລາວ ຫລື ພະລັງງານ ແລະ ບໍ່ແຮ່ ປະຈໍາຢູ່ທ້ອງຖິ່ນນັ້ນເສຍກ່ອນ ເພື່ອກວດກາແກ້ໄຂໃຫ້ຖືກຕ້ອງຈະແຈ້ງ ຈຶ່ງຊໍາລະຄ່າກະແສໄຟໃຫ້ໄຟຟ້າລາວ, ປັດຈຸບັນ ກະຊວງພະລັງງານ ແລະ ບໍ່ແຮ່ ກໍາລັງສະເໜີປັບປຸງລາຄາການຊົມໃຊ້ໄຟທີ່ຢູ່ອາໄສເປັນ 2 ລະດັບ ເພື່ອບໍ່ໃຫ້ຜູ້ມີລາຍຮັບຕໍ່າຈ່າຍຄ່າກະແສໄຟຫລາຍ ເພາະຜ່ານມາມີ 5 ລະດັບ,  ພະລັງງານ ແລະ ບໍ່ແຮ່ ແລະ ໄຟຟ້າລາວ ຈະສືບຕໍ່ໂຄສະນາ ແນະນໍາ ການນໍາໃຊ້ໄຟແບບປະຢັດພະລັງງານ ແລະ ປະຢັດຄ່າໃຊ້ຈ່າຍ, ແນະນໍາການເປີດປິດໄຟຟ້າໃຫ້ຖືກວິທີ, ນໍາໃຊ້ອຸປະກອນໄຟຟ້າທີ່ມີຄຸນນະພາບ, ຜ່ານການຕິດຕັ້ງ ແລະ ຂະຫຍາຍໄຟຟ້າໃຫ້ຖືກຕ້ອງຕາມມາດຕະຖານເຕັກນິກ ຈາກອົງກອນທີ່ໄດ້ຮັບອະນຸຍາດ ມີທະບຽນຕິດຕັ້ງໄຟຟ້າຄັກແນ່.

ທ່ານ ນາງ ປິ່ງຄຳ ລາຊະສິມມາ  ໄດ້ເນັ້ນໃຫ້ອົງການປົກຄອງແຂວງ ກໍຄືບັນດາພະແນກການທີ່ກ່ຽວຂ້ອງເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ຖືກຕ້ອງສອດຄ່ອງຕາມລະບຽບກົດໝາຍ, ມະຕິຂອງສະພາແຫ່ງຊາດ ແລະ ມະຕິຂອງສະພາປະຊາຊົນແຂວງ, ສ້າງຄວາມເຂົ້າໃຈໃຫ້ກັບປະຊາຊົນຕໍ່ແນວທາງໃນການພັດທະນາເສດກິດ-ສັງຄົມ ໂດຍສະເພາະການໃຫ້ເຊົ່າ ແລະ ສຳປະທານເນື້ອທີ່ດິນ ເພື່ອໃຫ້ປະຊາຊົນມີສ່ວນຮ່ວມ ແລະ ໄດ້ຮັບຜົນປະໂຫຍດ, ເອົາໃຈໃສ່ລົງໂຄສະນາເຜີຍແຜ່ບັນຫາຕ່າງໆທີ່ປະຊາຊົນມີຄວາມຂັດຂ້ອງໝອງໃຈຕໍ່ວຽກງານຂອງຕົນທີ່ຮັບຜິດຊອບ, ຊຸກຍູ້ ແລະ ຄຸ້ມຄອງຢ່າງເປັນປົກກະຕິຕໍ່ກິດຈະການຕ່າງໆທີ່ຕິດພັນກັບການເຊົ່າ ແລະ ສຳປະທານເນື້ອທີ່ດິນ, ມີມາດຕະການຄຸ້ມຄອງຢ່າງລະອຽດຕໍ່ບັນຫາມົນລະພິດຕ່າງໆ.

ຈາກນັ້ນ, ຄະນະ ໄດ້ສືບຕໍ່ເຮັດວຽກຮ່ວມກັບບໍລິສັດ ເຢຊິງ ພັດທະນາກະສິກໍາ ຂາອອກ-ຂາເຂົ້າ ຈຳກັດ ເຂດບ້ານໝື່ນຫົວເມືອງ ເມືອງສາມັກຄີໄຊ ແຂວງອັດຕະປື ໂດຍການຕ້ອນຮັບຂອງທ່ານ ຫິນເຊິງຊິງ ຮອງອຳນວຍການບໍລິສັດ ເຢຊິງ ພັດທະນາກະສິກຳ ຂາອອກ-ຂາເຂົ້າ ຈຳກັດ.

ຈາກການລາຍງານຂອງທ່ານ ຫິນເຊິງຊິງ ໃຫ້ຮູ້ວ່າ: ໃນເດືອນເມສາ 2019, ໄດ້ເລີມກ້າເບ້ຍ (ຕົ້ນກ້ວຍ) ປະມານເດືອນກໍລະກົດ 2019 ເລີ່ມການເພາະປູກ (ແຜນການປູກໃນເນື້ອທີ່ດິນ 120 ເຮັກຕາ) ທາງບໍລິສັດ ໄດ້ອີງຕາມພື້ນທີ່ສີຂຽວ ຕາມທິດຊີ້ນຳຂອງກະສິກຳ ແລະ ປ່າໄມ້ເມືອງ ແລະ ແຂວງ, ການນຳເຂົ້າປຸຍຊີວະພາບ, ການປາບສັດຕູພືດ(ເຮັດດ້ວຍແສງດອກໄຟ) ຕ້ອງໄດ້ຮັບການແນະນໍາ ແລະ ອະນຸຍາດຈາກພາກສ່ວນກ່ຽວຂ້ອງເປັນຢ່າງດີ, ການບົວລະບັດຮັກສາ ແມ່ນນຳໃຊ້ແຮງງານຄົນໃນການອະນາໄມ (ຫລົກຫຍ້າ) ໂດຍບໍ່ໃຊ້ປຸຍເຄມີ ເຮັດໃຫ້ແນວພັນກ້ວຍມີຄວາມງາມ ແລະ ປອດໄພ, ຄ່າແຮງງານກຳມະກອນເລີ່ມຕົ້ນ ຍິງ 50.000ກີບ/ວັນ/ຄົນ, ຊາຍ 60.000ກີບ/ວັນ/ຄົນ, ທັງນີ້ ກໍເພື່ອພັດທະນາເສດຖະກິດ ຂອງ ສປປລາວ ກໍຄືແຂວງອັດຕະປື ໃຫ້ມີຄວາມກ້າວໄກໃນວຽກງານໂຄງການປູກກ້ວຍເປັນສິນຄ້າສົ່ງອອກທັງພາຍໃນ ແລະ ຕ່າງປະເທດ ແລະ ເພື່ອພັດທະນາທ້ອງຖິ່ນຂອງເມືອງ ແລະ ສ້າງວຽກເຮັດງານທຳໃຫ້ແກ່ປະຊາຊົນ.

ຕອນທ້າຍ ທ່ານ ນາງ ປິ່ງຄຳ ລາຊະສິມມາ  ແລະ ທ່ານ ເພັດແກ້ວ ເຮືອງປັນຍາ ໄດ້ມີຄຳເຫັນວ່າ: ຢາກໃຫ້ມີການຖ່າຍທອດຄວາມຮູ້, ເຝິກອົບຮົມທາງດ້ານເຕັກນິກໃຫ້ແກ່ປະຊາຊົນທີ່ເຂົ້າມາເຮັດວຽກຢູ່ບໍລິສັດ ແລະ ບ້ານໃກ້ຄຽງ ເພື່ອໃຫ້ເຂົາເຈົ້າຮັບຮູ້ພັດທະນາມີອາຊີບທີ່ໝັ້ນຄົງ ແລະ ມີລາຍຮັບເພີ່ມຂຶ້ນ, ຢາກໃຫ້ບໍລິສັດເປັນໂຕແບບທີ່ດີ, ນຳໃຊ້ວິທະຍາສາດເປັນມິດຕໍ່ສິ່ງແວດລ້ອມ ແລະ ໃຫ້ພາກສ່ວນທີ່ກ່ຽວຂ້ອງລົງຕິດຕາມ ຄຸ້ມຄອງ ຢ່າງເປັນປົກຕິ, ແນະນຳປະຊາຊົນໃຫ້ມີຄວາມເຂົ້າໃຈຕໍ່ວຽກງານດັ່ງກ່າວ.