ສສຊ, ສສຂ ພົບປະຜູ້ມີສິດເລືອກຕັ້ງ

30/09/2019 00:00 -

 (ສພຊ) ຕອນເຊົ້າວັນທີ 18 ກັນຍາຜ່ານມາ, ທ່ານ ນາງ​ ທະວີ​ໄສ ພະສະຖານ ຮອງ​ປະທານ​ຄະນະ​ສະມາຊິກ​ສະພາ​ແຫ່ງ​ຊາດ​ (ສສຊ) ເພດ​ຍິງ, ທັງເປັນສະມາຊິກສະພາແຫ່ງຊາດປະ​ຈໍາ​ເຂດ​ເລືອກ​ຕັ້ງ​ທີ 15 ແຂວງຈໍາປາສັກ ພ້ອມດ້ວຍ​ທ່ານ ຄໍ​າພູ ​ແພງ​ສິມ​ສະຫວັດ ຮອງ​ປະທານ​ແນວ​ລາວ​ສ້າງ​ຊາດ​ແຂວງ, ສະມາຊິກສະພາປະຊາຊົນແຂວງ​ (ສສຂ) ປະ​ຈໍາ​ເມືອງ​ສຸຂຸມາ; ທ່ານ ນາງ ​ຂ່າຍ​ແກ້ວ ສິງຫາ​ວົງ ຮອງ​ເຈົ້າ​ເມືອງ, ສສຂ ປະ​ຈໍາ​ເມືອງ​ສຸຂຸມາ ພ້ອມ​ດ້ວຍ​ຄະນະ ໄດ້ເຄື່ອນໄຫວພົບປະອຳນາດການປົກຄອງເມືອງສຸຂຸມາ ເພື່ອເຜີຍແຜ່ຜົນສໍາເລັດກອງປະຊຸມ​ສະ​ໄໝສາມັນ​ເທື່ອ​ທີ 7 ຂອງ​ສະພາ​ແຫ່ງ​ຊາດຊຸດ​ທີ VIII ​ແລ​ະ ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາ​ປະຊາຊົນ​ແຂວງ​ຈໍາປາ​ສັກ ຊຸດ​ທີ I ທີ່​ສະ​ໂມ​ສອນ​ຂອງ​ເມືອງ​ສຸຂຸມາ ​ເຂົ້າຮ່ວມຮັບຟັງ​ມີ​ທ່ານຮອງ​ເຈົ້າ​ເມືອງ, ບັນດາຫົວໜ້າຫ້ອງການ, ພະນັກງານ-ລັດຖະກອນ, ນາຍບ້ານ​ໃນ​ເທສະບານ​ເມືອງ​ເຂົ້າ​ຮ່ວມ​ຢ່າງພ້ອມພຽງ.

​​ຕອນ​ບ່າຍ​ຂອງວັນ​ດຽວກັນ ບັນດາທ່ານ​ ສສຊ ​ແລະ ສສຂ ​ໄດ້​ສືບຕໍ່ພົບ​ປະ ນາຍ ​ແລະ​ ພົນທະຫານ, ນາຍ ​ແລະ ​ພົນ​ຕໍາຫລວດ ທີ່​ສະ​ໂມ​ສອນ​ຂອງ​ເມືອງ​ສຸຂຸມາ ​ເພື່ອ​ເຜີຍ​ແຜ່​ຜົນ​ສໍາ​ເລັດ​ກອງ​ປະຊຸມ​ສະ​ໄໝສາມັນ​ເທື່ອ​ທີ 7 ຂອງ​ສະພາ​ແຫ່ງ​ຊາດຊຸດ​ທີ VIII ​ແລ​ະ ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາ​ປະຊາຊົນ​ແຂວງ​ຈໍາປາ​ສັກ ຊຸດ​ທີ I ການ​ພົບ​ປະ​ເຜີຍ​ແຜ່ຜົນ​ສໍາ​ເລັດ​ກອງ​ປະຊຸມ​ສະ​ໄໝສາມັນ​​ເທື່ອ​ນີ້ ບັນດາທ່ານ ສສຊ ​ແລະ ສສຂ ໄດ້​ຮັບ​ຟັງ​ບົດ​ລາຍ​ງານສະພາບ​ຈຸດ​ພິ​ເສດ ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ​-ສັງຄົມຂອງ​ເມືອງ​, ບົດ​ລາຍ​ງານ​ຂອງ​ 2 ກໍ​າລັງໂດຍ​ສັງ​ເຂ​ບ. ຄຽງຄູ່​ກັນ​ນັ້ນ ບັນດາທ່ານ ສສຊ ​ແລະ ສສຂ ຜັດປ່ຽນກັນ​ເຜີຍ​ແຜ່ຜົນສໍາ​ເລັດ​ຂອງສອງກອງປະຊຸມສະໄໝສາມັນດັ່ງກ່າວ ​ໂດຍ​ຍົກ​ໃຫ້​ເຫັນ​ບັນຫາ​ສໍາຄັນ​ຕ່າງໆ ທີ່​ໄດ້​ຄົ້ນ​ຄວ້າ, ພິຈາລະນາ​ຮັບຮອງໃນ​ສອງ​ກອງ​ປະຊຸມລະຫວ່າງ​ຂັ້ນ​ສູນ​ກາງ ​ແລະ ທ້ອງ​ຖິ່ນ ​ເປັນ​ຕົ້ນກອງ​ປະຊຸມ​ໄດ້​ຮັບຮອງ​ເອົາ​ມາດ​ຕະການ​ເພີ່ມ​ເຕີມ ​ເພື່ອ​ສືບຕໍ່ຈັດ​ຕັ້ງ​ປະຕິບັດ​ແຜນ​ພັດທະນາ​ເສ​ດຖະກິດ-ສັງຄົມ ​ແລະ ​ແຜນ​ດັດ​ແກ້​ງົບປະມານ​ແຫ່ງ​ລັດ 6 ​ເດືອນ​ທ້າຍ​ປີ 2019; ກອງ​ປະຊຸມ​ໄດ້​ຮັບຮອງ​ເອົາບົດ​ລາຍ​ງານ​ຂອງ​ລັດຖະບານ ຊີ້​ແຈງ​ຕໍ່ຄໍາ​ຊັກ​ຖາມ​ຂອງ​ສະພາ​ແຫ່ງ​ຊາດ ກ່ຽວກັບ​ການ​ຄຸ້ມ​ຄອງ​ໃບ​ຕາດິນ, ການ​ອອກ​ໃບ​ຕາດິນ​ຊໍ້າ​ຊ້ອນ​ໃນ​ໄລຍະ​ຜ່ານ​ມາ ​ແລະ ມາດ​ຕະການ​ແກ້​ໄຂ​ໃນຕໍ່ໜ້າ; ກອງ​ປະຊຸມ​ໄດ້​ຮັບຮອງ​ເອົາ​ບົດ​ລາຍ​ງານ​ຂອງ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ກ່ຽວກັບ​ການ​ຕິດຕາມ​ກວດກາ​ການຈັດ​ຕັ້ງ​ປະຕິບັດ​ກົດໝາຍຂອງ​ອົງການ​ສືບສວນ-ສອບ​ສວນ ​ແລະ ອື່ນໆ. ນອກຈາກ​ນີ້, ສສຂ ຍັງ​ຍົກໃຫ້​ເຫັນ​ຜົນ​ສໍາ​ເລັດ​ຂອງ​ກອງ​ປະຊຸມ​ສະພາ​ປະ​ຊາ​ຊົນ​ຂັ້ນ​ທ້ອງ​ຖິ່ນ ເປັນຕົ້ນກອງ​ປະຊຸມ​ມີ​ມະຕິ​ຮັບຮອງ​ເອົາ​ບົດ​ລາຍ​ງານ​ຂອງ​ອົງການ​ປົກຄອງ​ແຂວງ ກ່ຽວກັບ​ກັບ​ການຈັດຕັ້ງປະຕິບັດແຜນ​ພັດທະນາ​ເສດຖະກິດ-ສັງຄົມ 6 ​ເດືອນ​ຕົ້ນ​ປີ ​ແລະ ທິດ​ທາງ​ວຽກງານ​ຈຸດ​ສຸມ 6 ​ເດືອນ​ທ້າຍ​ປີ 2019; ກອງ​ປະຊຸມ​ໄດ້​ມີ​ມະຕິ​ຮັບ​ຮອງ​ເອົາ​ບົດ​ລາຍ​ງານ​ຂອງ​ອົງການ​ປົກຄອງ​ແຂວງ ກ່ຽວກັບ​ການຈັດ​ຕັ້ງ​ປະຕິບັດແຜນ​ງົບປະມານ​ແຫ່ງ​ລັດ ປີ 2018 ​ແລະ ທິດ​ທາງ​ວຽກງານປີ 2019; ກອງ​ປະຊຸມ​​ໄດ້​ຮັບ​ຟັງ​ການ​ລາຍ​ງານການ​ເຄື່ອນ​ໄຫວວຽກງານ​ຂອງ​ຄະນະ​ປະ​ຈໍາ​ສະພາ​ປະຊາຊົນ​ແຂວງ​ຈໍາປາ​ສັກ 6 ​ເດືອນ​ຕົ້ນ​ປີ ​ແລະ ທິດ​ທາງ​ວຽກງານ​ຈຸດ​ສຸມ 6 ​ເດືອນ​ທ້າຍ​ປີ 2019 ​ແລະ ບັນຫາ​ອື່ນໆ ພາຍຫລັງສໍາເລັດການ​ເຜີຍ​ແຜ່ສອງ​ເອ​ກະສາ​ນ ສສຊ ​ແລະ ສສຂ ກໍໄດ້ຮັບຟັງຄໍາຄິດຄໍາເຫັນ, ຄໍາສະເໜີ ຂອງພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕໍາຫລວດ ຜ່ານການຮັບຟັງ ແມ່ນບັນຫາປາກົດການຫຍໍ້ທໍ້ຂອງສັງຄົມເປັນສ່ວນໃຫ່ຍເຊັ່ນ: ບັນຫາຢາເສບຕິດ, ການຫລີ້ນກິນຟຸມເຟືອຍ ແລະ ອື່ນໆ.

ຈາກນັ້ນ, ທ່ານ ສສຊ ແລະ ສສຂ ຍັງສະແດງຄວາມເປັນຫ່ວງເປັນໃຍມາຍັງພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມໃນໄລຍະຜ່ານມາ ເຊິ່ງຮຽກຮ້ອງມາຍັງຄະນະພັກຂັ້ນເທິງ ອໍານາດການປົກຄອງເມືອງທຸກຂັ້ນ ພ້ອມກັນເອົາໃຈໃສ່ສືບຕໍ່ຟື້ນຟູແກ້ໄຂຫລັງນໍ້າລົງໃນການສ້ອມແປງບູລະນະພື້ນຖານໂຄງລ່າງເວົ້າລວມ, ເວົ້າສະເພາະການແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນທີ່ຖືກຜົນກະທົບດັງກ່າວຢ່າງຮີບດ່ວນ ເພື່ອເຮັດໃຫ້ຊີວິດການເປັນຢູ່ຂອງເຂົາເຈົ້າເຂົ້າສູ່ສະພາບປົກກະຕິໂດຍໄວ.