ປະທານກໍາມາທິການບັນດາເຜົ່າ ສຶບຕໍ່ຕິດຕາມກວດກາການນຳໃຊ້ເຄມີອັນຕະລາຍເກີນຄ່າມາດຕະຖານ

07/03/2018 00:00 -

(ສພຊ) ວັນທີ 28 ກຸມພາ-1 ມີນາ 2018, ທ່ານ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າ ສະພາແຫ່ງຊາດ ພ້ອມດ້ວຍຄະນະ ໄດ້ລົງຕິດຕາມກວດກາກ່ຽວກັບຜົນກະທົບຈາກການນຳໃຊ້ເຄມີອັນຕະລາຍເກີນຄ່າມາດຕະຖານ ຕໍ່ສິ່ງແວດລ້ອມ, ສັງຄົມ ແລະ ທຳມະຊາດ ຢູ່ແຂວງວຽງຈັນ ເຊິ່ງການລົງເຄື່ອນໄຫວຄັ້ງນີ້ ແມ່ນສົມທົບກັບທ່ານ ສົມດີ ແກ້ວດາລາວິນ ຮອງປະທານສະພາປະຊາຊົນແຂວງ (ສພຂ) ວຽງຈັນ, ເຂົ້າຮ່ວມມີຕາງໜ້າຈາກພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ພະແນກກະສິກຳ ແລະ ປ່າໄມ້, ພະແນກອຸດສາຫະກຳ ແລະ ການຄ້າ, ພະແນກໂຍທາທິການ ແລະ ຂົນສົ່ງ, ຫ້ອງວ່າການແຂວງ, ພະແນກສາທາລະນະສຸກແຂວງ ພ້ອມດ້ວຍແຂກຖືກເຊີນ ແລະ ພະນັກງານທີ່ກ່ຽວຂ້ອງເຂົ້່າຮ່ວມ.

        ຈຸດປະສົງຂອງການເຮັດວຽກຄັ້ງນີ້ ເພື່ອເປັນການຕິດຕາມກວດກາການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍການຮັບຮອງເອົາແຜນການຕິດຕາມກວດກາ ກ່ຽວກັບການອອກນິຕິກຳລຸ່ມກົດໝາຍ ແລະ ຜົນກະທົບຈາກການນຳໃຊ້ເຄມີອັນຕະລາຍເກີນຄ່າມາດຕະຖານ ຕໍ່ສິ່ງແວດລ້ອມ, ສັງຄົມ ແລະ ທຳມະຊາດ ຂອງຂະແໜງການທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ; ທັງຮັບປະກັນໄດ້ຄວາມຖືກຕ້ອງ, ສອດຄ່ອງ ໃນການອອກນິຕິກຳລຸ່ມກົດໝາຍ ແລະ ນຳໃຊ້ເຂົ້າໃນການຈັດຕັ້ງປະຕິບັດວຽກງານຂອງຂະແໜງການຕ່າງໆ ທັງສູນກາງ ແລະ ທ້ອງຖິ່ນ ເພື່ອຫລີກລ່ຽງຜົນກະທົບທາງລົບແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ກໍຄືການປົກປ້ອງສິດ, ຜົນປະໂຫຍດ, ສຸຂະພາບ ແລະ ຊັບສິນຂອງປະຊາຊົນບັນດາເຜົ່າ.

        ໂອກາດດັ່ງກ່າວ ໄດ້ຮັບຟັງບົດລາຍງານຈາກພະແນກຊັບພະຍາກອນທໍາມະຊາດ ແລະ ສິ່ງແວດ ລ້ອມ, ພະແນກກະສິກຳ ແລະ ປ່າໄມ້, ພະແນກອຸດສາຫະກຳ ແລະ ການຄ້າ ແລະ ພະແນກການທີ່ກ່ຽວຂ້ອງຈໍານວນໜຶ່ງ. ຈາກນັ້ນ ໄດ້ມີການສົນທະນາແລກປ່ຽນຄວາມຄິດຄວາມເຫັນ ແລະ ຕອບຄຳຊັກຖາມຢ່າງກົງໄປກົງມາ ຕໍ່ບົດລາຍງານດັ່ງກ່າວ.

        ໂອກາດດຽວກັນນີ້, ປະທານກຳມາທິການບັນດາເຜົ່າ ພ້ອມດ້ວຍຄະນະ ຍັງໄດ້ລົງຕິດຕາມກວດກາສະຖານທີ່ຕົວຈິງ ພ້ອມທັງຮັບຟັງບົດລາຍງານສະພາບການຈັດຕັ້ງປະຕິບັດໂຄງການຂອງພື້ນທີ່ດັ່ງກ່າວຄື: ໂຮງງານຜະລິດແປ້ງມັນຕົ້ນ ຂອງບໍລິສັດ ເອສເອສພີ (SSP) ເມືອງຫີນເຫີບ, ໂຮງງານຊີມັງຫລັງທີ I ເມືອງວັງວຽງ, ຟາມລ້ຽງສັດ (ໝູ ແລະ ໄກ່) ບ້ານສີວິໄລ ເມືອງໂພນໂຮງ.

(ນາງ ອາລິນ ສຸພິມມະປະດິດ)