ກອງປະຊຸມສຳມະນາ ກ່ຽວກັບອົງການອຳນາດ ລັດຂັ້ນທ້ອງຖິ່ນ

22/10/2019 00:00 -

(ສພຊ) ກອງປະຊຸມສຳມະນາກ່ຽວກັບອົງການອຳນາດລັດຂັ້ນທ້ອງຖິ່ນ ຈັດຂຶ້ນທີ່ໂຮງແຮມລາວພລາຊາ, ນະຄອນຫລວງວຽງຈັນ ລະຫວ່າງວັນທີ 7-8 ຕຸລາ 2019 ໂດຍການເປັນປະທານຂອງທ່ານ ຄຳເຜີຍ ປານມະໄລທອງ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ; ເຂົ້າຮ່ວມມີທ່ານ ເລ ຮາຍ ເດື່ອງ ຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ ສສ.ຫວຽດນາມ ແລະ ທ່ານ ຫວຽນ ດິ່ງ ກວຽນ ອະດີດຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ ສສ.ຫວຽດນາມ, ມີບັນດານັກວິທະຍາກອນຈາກກະຊວງ ພາຍໃນ, ສະພາປະຊາຊົນນະຄອນຫລວງວຽງຈັນ, ບໍລິຄຳໄຊ, ບັນດາຊ່ຽວຊານ ແລະ ສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນຂັ້ນແຂວງ (ສສຂ) ຈາກນະຄອນຫລວງວຽງຈັນ, ຫລວງພະບາງ, ຫົວພັນ, ຊຽງຂວາງ, ວຽງຈັນ ແລະ ບໍລິຄຳໄຊ ພ້ອມດ້ວຍພາກສ່ວນທີ່ກ່ຽວຂ້ອງພາຍໃນສະພາແຫ່ງຊາດ.

ຈຸດປະສົງຂອງກອງປະຊຸມ ແມ່ນເພື່ອຍົກລະດັບຄວາມຮູ້ ແລະ ຄວາມເຂົ້າໃຈຕໍ່ພາລະບົດບາດ ຂອງສະພາປະຊົນຂັ້ນແຂວງ (ສພຂ) ໂດຍສະເພາະແມ່ນສາຍພົວພັນລະຫວ່າງ ສພຂ ກັບອົງການປົກຄອງທ້ອງຖິ່ນ; ພ້ອມນັ້ນ ກອງປະຊຸມຍັງໄດ້ຮັບຟັງການບັນຍາຍກ່ຽວກັບກົດໝາຍການປົກຄອງທ້ອງຖິ່ນ,  ສິ່ງທີ່ ສພຂ ຄວນເອົາໃຈໃສ່ຕໍ່ກົດໝາຍການປົກຄອງທ້ອງຖິ່ນ; ລະບົບອຳນາດການປົກຄອງທ້ອງຖິ່ນຢູ່ຫວຽດນາມ; ລະບົບການປົກຄອງທ້ອງຖິ່ນໃນ ສາທາລະນະລັດ ອິນໂດເນເຊຍ; ບົດຮຽນຕົວຢ່າງຈາກປະເທດເຢຍລະມັນ ຕໍ່ກັບພາລະບົດບາດຂອງສະພາແຫ່ງຊາດ; ເຂດປົກຄອງຕົນເອງ ໃນປະເທດອິນໂດເນເຊຍ ພາຍໃຕ້ຂອບການລວມລັດ ຂອງ ສາທາລະນະລັດອິນໂດເນເຊຍ; ບາງບົດຮຽນກ່ຽວກັບການພິຈາລະນາ ແລະ ຮັບຮອງເອົານິຕິກຳທີ່ສຳຄັນຂອງທ້ອງຖິ່ນ; ການປະສານສົມທົບກັບອົງການປົກຄອງທ້ອງຖິ່ນ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງ ສພຂ; ຮູບແບບການປົກຄອງທ້ອງຖິ່ນຂອງ ສປປລາວ ແລະ ສາຍພົວພັນລະຫວ່າງ ສພຂ ກັບ ອົງການປົກຄອງຂັ້ນແຂວງ; ການປົກຄອງທ້ອງຖິ່ນ ແລະ ທິດທາງປັບປຸງອຳນາດການປົກຄອງຂັ້ນທ້ອງຖິ່ນຂອງ ສສ.ຫວຽດນາມ.

ກອງປະຊຸມ ໄດ້ດຳເນີນດ້ວຍບັນຍາກາດຟົດຟື້ນ, ມີຄວາມຮັບຜິດຊອບ ແລະ ມີການແລກປ່ຽນກັນຢ່າງເລິກເຊິ່ງ ໃນແງ່ມຸມຕ່າງໆ ທີ່ ສສຊ ແລະ ສສຂ ໃຫ້ຄວາມສົນໃຈ.