ປະທານກຳມາທິການການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນ ສ.ເກົາຫຼີ

07/03/2018 00:00 -

(ສພຊ) ​ໃນ​ວັນ​ທີ 25 ມັງກອນ 2018 ທີ່​ສະພາ​ແຫ່ງ​ຊາດ, ທ່ານ ​ເອກ​ສະຫວ່າງ ວົງ​ວິຈິດ ປະທານ​ກຳມາ​ທິການ​ການ​ຕ່າງປະ​ເທດ ​ໄດ້​ຕ້ອນຮັບ​ການ​ເຂົ້າ​ຢ້ຽ​ມຂ່ຳນັບຂອງ​ຄະນະ​ຜູ້​ແທນ​ຂອງ​ສະພາ​ແຫ່ງ​ຊາດ ສາທາລະນະ​ລັດ​ເກົາຫລີ ​ ນຳ​ໂດຍ​ທ່ານ ຢູ ກີ ຈຸນ ​ແລະ ທ່ານ ຢຸນ ຊັງ ຮຸນ ​ເຊິ່ງທັງ​ສອງ​ທ່ານ​ແມ່ນ​ສະມາຊິກ​ສະພາ​ແຫ່ງ​ຊາດ, ສະມາຊິກ​ກຳມາ​ທິການ​ການ​ຕ່າງປະ​ເທດ ​ແລະ​ ການ​ທ້ອນ​​ໂຮມ​ຂອງ​ສະພາ​ແຫ່ງ​ຊາດ ສ.​ເກົາຫລີ.ໃນ​ໂອກາດ​ທີ່​ເດີນທາງ​ມາ​ຢ້ຽມ​ຢາມ ​ສປປລາວ ລະຫວ່າງ​ວັນ​ທີ 24-26 ມັງກອນ 2018.

          ​​​ການ​ຢ້ຽມ​ຂ່ຳນັບ, ທ່ານ ຢູ ກີ ຈຸນ ໄດ້​ສະ​ແດງ​ຄວາມ​ຂອບ​ໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ, ສະ​ແດງ​ຄວາມ​ເຫັນ​ດີ​ເປັນ​ເອກະ​ພາບກ່ຽວ​ກັບ​ສາຍ​ພົວພັນ​ອັນດີຂອງ​ສອງ​ປະ​ເທດ; ທ່ານ​ໃຫ້​ຮູ້​ວ່າ: ປັດຈຸບັນ​ພົນລະ​ເມືອງ ສ.​ເກົສຫລີ ມີ​ຄວາມ​ສົນ​ໃຈ ສປປລາວ ຫລາຍ​ຂຶ້ນ ​ເຮັດ​ໃຫ້​ສາຍ​ພົວພັນ​ລະຫວ່າງສອງ​ປະ​ເທດ​ມີ​ທ່າ​ອ່ຽງ​ເພີ່ມ​ຂຶ້ນ ສະ​ແດງ​ອອກ​ໃນ​ປີ 2012 ນັກ​ທ່ອງ​ທ່ຽວ ສ.​ເກົາຫລີ ມາ​ທ່ອງ​ທ່ຽວ​ລາວ​ມີ​ປະມານ 50 ພັນຄົນ, ມາ​ເຖິງ​ປີ 2017 ​ເພີ່ມ​ຂຶ້ນ​ເປັນ 180 ພັນຄົນ ​ເນື່ອງ​ຈາກ ສປປລາວ ​ເປັນ​ປະ​ເທດ​ໜຶ່ງ​ທີ່ ສ.​ເກົາຫລີ ມາ​ລົງ​ທຶນ​ຈຳນວນ​ຫລາຍ ທັງ​ເປັນ​ປະ​ເທດ​ທີ່​ລັດຖະບານ ສ.​ເກົາຫລີ ​ໃຫ້​ບູລິ​ມະ​ສິດ​ໃນ​ການ​ຊ່ວຍ​ເຫລືອ ​ເຊິ່ງ ສປປລາວ ​ເປັນ​ປະ​ເທດ​ທີ 11 ​ໃນ​ຈຳນວນ 24 ປະ​ເທດ​ທີ່​ລັດຖະບານ ສ.​ເກົາຫລີ ​ໃຫ້​ບູລິ​ມະ​ສິດ​ໃນ​ການ​ຊ່ວຍ​ເຫລືອ; ພິ​ເສດ​ໃນປີ 2017 ລັດຖະບານ ສ.​ເກົາຫລີ ​ໄດ້​ໃຫ້​ໂກ​ຕາ​ແຮງ​ງານ​ລາວ 500 ຄົນ ​ແຕ່​ຄົນ​ລາວ​ສາມາດ​ເສັງ​ຜ່ານ 50 ຄົນ. ພ້ອມ​ນັ້ນ, ທ່ານ​ໄດ້​ສະ​ແດງ​ຄວາມ​ເຫັນ​ດີ​ໃຫ້​ທັງ​ສອງ​ປະ​ເທດ ກໍ​ຄື​ສອງ​ອົງການ​ນິຕິບັນຍັດ​ ສ.​ເກົາຫລີ-ລາວ ​ໄດ້​ແລກປ່ຽນ​ຮ່ວມ​ມື​ກັນ​​​ຕື່ມອີກ.

​ໂອກາດ​ດຽວ​ກັນ​ນີ້, ທ່ານ ​ເອກ​ສະຫວ່າງ ວົງ​ວິຈິດ ​​ໄດ້ສະ​ແດງ​ຄວາມ​ຍິນ​ດີ​ຕ້ອນຮັບ ​ແລະ ຕີ​ລາຄາ​ສູງ​ຕໍ່​ການ​ມາ​ຢ້ຽມຢາມ​ຂອງ​ຄະນະ​ຜູ້​ແທນ​ຂອງ​ສະພາ​ແຫ່ງ​ຊາດ ສ.​ເກົາຫລີ ​ໃນ​ຄັ້ງ​ນີ້ ​ເຊິ່ງ​ເປັນ​ການ​ປະກອບສ່ວນ​ໃນ​ການ​​ເສີມ​ສ້າງສາ​ຍພົວພັນ​ ​ແລະ ​ເພີ່ມ​ທະວີ​ການ​ຮ່ວມ​ມື​ທີ່​ດີລະຫວ່າງ​ສອງ​ປະ​ເທດ ກໍ​ຄື​ສອງອົງການ​ນິຕິບັນຍັດ​ ສປປລາວ-ສ.​ເກົາຫລີ ທັງເປັນ​ໂອກາດ​ດີ​ທີ່​ຈະ​ໄດ້​​ແລ​ກປ່ຽນ​ບົດຮຽນ​​ເຊິ່ງກັນ ​ແລະ ກັນ ​ເພື່ອ​ຊຸກຍູ້​ການ​ພົວພັນ​ຮ່ວມ​ມື​ສອງ​ຝ່າຍ​ຂອງ​ສອງ​ປະ​ເທດ​. ​ທ່ານ​ໄດ້​​ສະ​ແດ​ງຄວາມ​ປິ​ຕິ​ຍິນ​ດີ​ທີ່​ເຫັນ​ວ່າ​ສາຍ​ພົວພັນ​ມິດ​ຕະພາບ​ທີ່​ດີງາມ​ລະຫວ່າງ​ສອງ​ປະ​ເທດ​ລາວ-ສ.​ເກົາຫລີ ນັບ​ແຕ່​ໄດ້​ສ້າງ​ຕັ້ງ​ສາຍ​ພົວພັນ​ການ​ທູດ​ນຳ​ກັນ​ໃນ​ປີ 1995 ​ເປັນ​ຕົ້ນ​ມາ ​​​​ເຊິ່ງການ​ນຳ​ລະດັບ​ຕ່າງໆ​ຂອງ​ສອງ​ປະ​ເທດ​ໄດ້​​ແລກປ່ຽນ​ຢ້ຽມຢາມ ​ແລະ ​ໄປມາຫາສູ່​ກັນ​ຢ່າງ​ຕໍ່​ເນື່ອງ ​ແລະ​ມີ​ຄວາມ​ຍິນ​ດີ​ຕໍ່​ການ​ຮ່ວມ​ມື​ດ້ານ​ເສດຖະກິດ, ການ​ຄ້າ, ການ​ລົງທຶນ ​ແລະ ການທ່ອງທ່ຽວ​ຂອງ​ ສ.​ເກົາຫລີ ຢູ່​ລາວ ທີ່​ກຳລັງ​ຄວາມ​ຄືບ​ໜ້າ, ​ແຕກ​ດອກ​ອອກ​ຜົນ ​ແລະ ​ເພີ່ມ​ຂຶ້ນ​ຢ່າງ​ຕໍ່​ເນື່ອງ. ​ພ້ອມ​ດຽວ​ກັນ​ນັ້ນ, ທ່ານ​ໄດ້​ແຈ້ງ​ສະພາບ​ການ​ຂອງ ສປປລາວ ​​ໃຫ້​ຊາບໂດຍ​ຫຍໍ້​ ​ແລະ ​ສະ​ແດງ​ຄວາມຂອບ​ໃຈ​ຕໍ່​ການ​ຊ່ວຍ​ເຫລືອ ​ແລະ ຮ່ວມ​ມື​ອັນ​ດີ​ຂອງ ສ.​ເກົາຫລີ ​ເຂົ້າ​ໃນ​ວຽກ​ງານ​ດ້ານ​ການ​ສຶກສາ, ການ​​ເກັບກູ້​ລະ​ເບີດ​ບໍ່​ທັນ​ແຕກ, ​ແຮງ​ງານ, ສາທາລະນະ​ສຸກ ​ແລະ ​ອື່ນໆ ​​ໃນ​ແຕ່ລະ​ປີ ​​ເຊິ່ງ​ເປັນ​ການ​ປະກອບສ່ວນ​ສຳຄັນ​ໃນ​ການ​ພັດທະນາ​ເສດຖະກິດ ​ແລະ ສັງຄົມ ​ແລະ ຫວັງ​ຢ່າງ​ຍິ່ງ​ວ່າ ສ.​ເກົາຫລີ ຈະ​ໃຫ້ການ​ຊ່ວຍ​ເຫລືອ ສປປລາວ ຕື່ມ​ອີກ.

(ນາງ ປາ​ກາ​ລັກ ພົມ​ມີ​ໄຊ)