ປະທານກໍາມາທິການຍຸຕິທໍາ ເຮັດວຽກຢູ່ແຂວງວຽງຈັນ

09/03/2018 00:00 -

ຕອນບ່າຍຂອງວັນທີ 28 ກຸມພາ 2018, ທີ່ຫ້ອງປະຊຸມສະພາປະຊາຊົນແຂວງ (ສພຂ) ວຽງຈັນ ຄະນະຕິດຕາມກວດກາຂອງກໍາມາທິການຍຸຕິທໍາສະພາແຫ່ງຊາດ ໄດ້ເປີດກອງປະຊຸມ ກ່ຽວກັບການເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ໃນຂົງເຂດຍຸຕິທໍາ ແລະ ສານປະຊາຊົນເຂດ 2 ແຂວງວຽງຈັນ ໂດຍການເປັນປະທານຂອງທ່ານ ນາງ ບົວຄໍາ ທິບພະວົງ ປະທານກໍາມາທິການຍຸຕິທໍາ ສະພາແຫ່ງຊາດ ໂດຍການເຂົ້າຮ່ວມຂອງທ່ານ ນາງ ບົວວັນ ທໍາມະວົງ ຮອງປະທານ ສພຂ ພ້ອມດ້ວຍພະນັກງານ-ລັດຖະກອນພາຍໃນຄະນະກໍາມະການຍຸຕິທໍາ ປກສ-ປກຊ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ທັງໝົດ 23 ທ່ານ ຍິງ 9 ທ່ານ.

        ໂອກາດລົງເຄື່ອນໄຫວເຮັດວຽກຄັ້ງນີ້ ເພື່ອເປັນການເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍໃນຂົງເຂດຍຸຕິທໍາ, ມະຕິຂອງຄະນະປະຈໍາສະພາແຫ່ງຊາດ, ການຈັດຕັ້ງຜັນຂະຫຍາຍມະຕິກອງປະຊຸມສະພາແຫ່ງຊາດ ເລກທີ 012/ສພຊ, ລົງວັນທີ 22/06/2017, ເລກທີ 013/ສພຊ, ລົງວັນທີ 25/11/2017 ແລະ ເລກທີ 080/ສພຊ, ລົງວັນທີ 17/11 /2017 ຂອງອົງການໄອຍະການປະຊາຊົນ, ສານປະຊາຊົນ ແລະ ຍຸຕິທໍາ (ຫ້ອງການຈັດຕັ້ງປະຕິບັດຄໍາຕັດສິນຂອງສານ), ສະພາບການປະຕິບັດໜ້າທີ່ຂອງພະນັກງານໃນຂົງເຂດຍຸຕິທໍາ ເປັນຕົ້ນແມ່ນອົງການໄອຍະການປະຊາຊົນ, ສານປະຊາຊົນ, ພະແນກກວດກາລັດ ແລະ ຫ້ອງການຈັດຕັ້ງປະຕິບັດຄໍາຕັດສິນຂອງສານ ແລະ ພ້ອມທັງລົງຕິດຕາມການກວດກາ ສານປະຊາຊົນເຂດ 2 ເມືອງວັງວຽງ ແຂວງວຽງຈັນ.

        ທັ້ງນີ້, ກໍເພື່ອເປັນການປຶກສາຫາລືກ່ຽວກັບວຽກງານໃນຂົງເຂດຍຸຕິທໍາ, ການຄົ້ນຄວ້າຄໍາຮ້ອງຂໍຄວາມເປັນທໍາ ແລະ ຂອດການປະສານງານ, ການປະສານສົມທົບລະຫວ່າງກໍາມາທິການສະພາແຫ່ງຊາດ ຮ່ວມກັບພາກສ່ວນກ່ຽວຂ້ອງ ແລະ ເປັນການພົບປະເພື່ອແລກປ່ຽນບົດຮຽນກັບ ສພຂ ກໍຄືຜູ້ຊີ້ນໍາວຽກງານຍຸຕິທໍາ ປກຊ-ປກສ, ໂອກາດດຽວກັນ ກໍໄດ້ຮັບຟັງການລາຍງານຫຍໍ້ ຂອງອົງການໄອຍະການປະຊາຊົນແຂວງ, ສານປະຊາຊົນແຂວງ, ປ້ອງກັນຄວາມສະຫງົບແຂວງ ແລະ ພະແນກຍຸຕິທໍາແຂວງ (ຫ້ອງຈັດຕັ້ງປະຕິບັດຄໍາຕັດສິນຂອງສານ) ໃນການຈັດຕັ້ງເຄື່ອນໄຫວວຽກງານໃນຂົງເຂດຂອງຕົນ ໂດຍສະເພາະແມ່ນການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ພ້ອມນີ້ ກໍໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາ ແລະ ປຶກສາຫາລື ແລະ ບັນຫາສໍາຄັນທີ່ຈະຕ້ອງໄດ້ພ້ອມກັນຈັດຕັ້ງປະຕິບັດໃຫ້ມີຄວາມຖືກຕ້ອງ ແລະ ສອດຄ່ອງກວ່າເກົ່າ.

        ໃນຕອນທ້າຍຂອງກອງປະຊຸມ ທ່ານປະທານກໍາມາທິການຍຸຕິທໍາ ໄດ້ເນັ້ນໃຫ້ພາກສ່ວນກ່ຽວຂ້ອງ ເອົາໃຈໃສ່ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດຍຸຕິທໍາ ທີ່ຕົນຮັບຜິດຊອບໃຫ້ດີກວ່າເກົ່າ, ຈາກນັ້ນ ຄະນະ ໄດ້ສືບຕໍ່ເຮັດວຽກຮ່ວມກັບອໍານາດການປົກຄອງເມືອງວັງວຽງ ໂດຍໄດ້ຮັບຟັງການລາຍງານຈາກອົງການປົກຄອງເມືອງວັງວຽງ ກ່ຽວກັບການແກ້ໄຂປາກົດການຫຍໍ້ທໍ້ ຢູ່ໃນຂົງເຂດຍຸຕິທໍາ ໃນໄລຍະຜ່ານມາ ແລະ ໄດ້ລົງຢ້ຽມຢາມ ແລະ ເຮັດວຽກຢູ່ຫ້ອງການສານປະຊາຊົນເຂດ 2 ເມືອງວັງວຽງ.

(ນາງ ເພັດສະໝອນ ສຸວັນນະສານ)