ຮອງປະທານກຳມາທິການຍຸຕິທຳ ເຮັດວຽກຢູ່ແຂວງຫລວງພະບາງ

09/03/2018 00:00 -

(ສພຊ) ວັນທີ 20-28  ກຸມພາຜ່ານມາ, ທ່ານ ຄຳແພງ ວິລະພັນ ຮອງປະທານກຳມາທິການຍຸຕິທຳ ສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 6 ແຂວງຫລວງພະບາງ ພ້ອມດ້ວຍຄະນະ ໄດ້ລົງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I ຢູ່ອົງການໄອຍະການປະຊາຊົນແຂວງຫລວງພະບາງ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ຫົວໜ້າ ແລະ ພະນັກງານພາຍໃນອົງການໄອຍະການປະຊາຊົນແຂວງ ມີຜູ້ເຂົ້າຮ່ວມທັງໝົດ 35  ທ່ານ ຍິງ 17 ທ່ານ.

ກອງປະຊຸມ ໄດ້ຮັບຟັງການລາຍງານການຈັດຕັ້ງປະຕິບັດວຽກງານໄລຍະຜ່ານມາ ຂອງອົງການໄອຍະການປະຊາຊົນແຂວງ, ຫລັງຈາກນັ້ນ ທ່ານຮອງປະທານກໍາມາທິການຍຸຕິທໍາ ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຕິດພັນກັບການຜັນຂະຫຍາຍຜົນສຳເລັດກອງປະຊຸມສະໄໝສາມັນເທື່ອທີ 4 ຂອງ ສພຂ ຫລວງພະບາງ ໂດຍໄດ້ຍົກໃຫ້ເຫັນບັນຍາກາດ ແລະ ຫລາຍບັນຫາສໍາຄັນ ທີ່ທັງສອງກອງປະຊຸມໄດ້ຄົ້ນຄວ້າພິຈາລະນາ ແລະ ຮັບຮອງເອົາ, ພ້ອມທັງຍົກໃຫ້ເຫັນເຖິງພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແລະ ສພຂ, ນອກນີ້ ທ່ານຍັງໄດ້ເນັ້ນໃຫ້ພະນັກງານປະກອບສ່ວນຢ່າງຕັ້ງໜ້າ  ເຂົ້າໃນການປົກປັກຮັກສາ  ແລະ  ສ້າງສາພັດທະນາປະເທດຊາດ  ເປັນຕົ້ນແມ່ນການປະຕິບັດຕາມກົດໝາຍ, ສິດ ແລະ ໜ້າທີ່ຂອງອົງການໄອຍະການປະຊາຊົນແຂວງ ໃນການຕິດຕາມກວດກາການເຄົາລົບ ແລະ ປະຕິບັດກົດໝາຍ ໃຫ້ມີຄວາມຖືກຕ້ອງ ເປັນເອກະພາບ, ພ້ອມທັງປະຕິບັດສິດໃນການສັ່ງຟ້ອງຜູ້ຖືກຫາຂຶ້ນສານຕາມກົດໝາຍ.

          ພາຍຫລັງສຳເລັດການເຮັດວຽກຢູ່ອົງການໄອຍະການປະຊາຊົນແຂວງຫລວງພະບາງ ທ່ານຮອງປະທານກໍາມາທິການຍຸຕິທໍາ ພ້ອມດ້ວຍຄະນະ ຍັງໄດ້ສືບຕໍ່ລົງພົບປະຢ້ຽມຢາມ ແລະ ນຳເອົາບັນດາເນື້ອໃນຈິດໃຈ ທີ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ແລະ ສພຂ ຫລວງພະບາງ ທີ່ໄດ້ຮັບຮອງເອົາ ໄປເຜີຍແຜ່ຜັນຂະຫຍາຍ ໃຫ້ພະນັກງານ, ທະຫານ, ຕໍ່າຫລວດ ແລະ ພໍ່ແມ່ປະຊາຊົນ ຢູ່ເມືອງໂພນທອງ ແຂວງຫລວງພະບາງ ລວມມີ 4 ຈຸດຄື: ສຳນັກງານເມືອງໂພນທອງ, ກຸ່ມບ້ານນາຫລວງ, ກຸ່ມບ້ານນາຊອນ ແລະ ກຸ່ມບ້ານທອງສີ, ມີຜູ້ເຂົ້າຮ່ວມຮັບຟັງທັງໝົດ 376 ຄົນ ຍິງ 148 ຄົນ.

ການລົງພົບປະຄັ້ງນີ້ ເພື່ອໃຫ້ຜູ້ເຂົ້າຮ່ວມຮັບຮູ້, ເຂົ້າໃຈຢ່າງຈະແຈ້ງ ແລະ ທົ່ວເຖິງ, ຕິດພັນກັບການລົງຢ້ຽມຢາມຖາມຂ່າວ ປະຊາຊົນຜູ້ມີສິດເລືອກຕັ້ງ ເພື່ອຮັບຟັງຄຳຄິດ, ຄຳເຫັນຄຳສະເໜີຂອງປະຊາຊົນ ທີ່ມີຂໍ້ຂັດຂ້ອງໝອງໃຈ ເພື່ອຈະໄດ້ນຳເອົາບັນຫາດັ່ງກ່າວນຳໄປຄົ້ນຄວ້າພິຈາລະນາແກ້ໄຂ, ຈາກນັ້ນ ທ່ານຮອງປະທານກໍາມາທິການຍຸຕິທໍາ ໄດ້ມີຄໍາເຫັນໂອ້ລົມ ແລະ ຮຽກຮ້ອງມາຍັງພະນັກງານ, ທະຫານ, ຕໍ່າຫລວດ ແລະ ພໍ່ແມ່ປະຊາຊົນ ໃຫ້ເປັນເຈົ້າການ ເອົາໃຈໃສ່ພັດທະນາສ້າງເສດຖະກິດຄອບຄົວ, ສະກັດກັ້ນປາກົດການຫຍໍ້ທໍ້ຕ່າງໆ ເປັນຕົ້ນແມ່ນຕ້ອງສຸມໃສ່ຕ້ານ ແລະ ສະກັດກັ້ນບັນຫາຢາເສບຕິດ ທີ່ເປັນໄພອັນຕະລາຍຕໍ່ການດຳລົງຊີວິດຂອງປະຊາຊົນ ແລະ ຖ່ວງດຶງການພັດທະນາຂອງປະຊາຊົນ, ການລັກລອບປູກຝິ່ນ ແລະ ເນັ້ນໃຫ້ທຸກພາກສ່ວນພາຍໃນເມືອງ ເອົາໃຈໃສ່ຢ່າງຕັ້ງໜ້າຕໍ່ກັບວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ເມືອງໂພນທອງຫລຸດພົ້ນອອກຈາກເມືອງທຸກຍາກໃນຕໍ່ໜ້າ. ຈາກນັ້ນ, ຄະນະ ຍັງໄດ້ມອບເຄື່ອງຊ່ວຍເຫລືອເຊັ່ນ: ປຶ້ມຂຽນ ຈຳນວນ 3000 ຫົວ, ໂສ້ງ, ເສື້ອ ແລະ ຜ້າຮົ່ມ ລວມມູນຄ່າ 7 ລ້ານກວ່າກີບ ໃຫ້ພະນັກງານບຳນານ, ເຖົ້າແກ່ແນວໂຮມ ແລະ ປະຊາຊົນຜູ້ທຸກຢາກຂາດເຂີນ ແລະ ສືບຕໍ່ຢ້ຽມຢາມຊາຍແດນ (ດ່ານນາຊອນ) ລະຫວ່າງເມືອງໂພນທອງ ແຂວງຫລວງພະບາງ ກັບແຂວງດຽນບຽນຟູ ສສ.ຫວຽດນາມ ເຊິ່ງທ່ານໄດ້ເນັ້ນໃຫ້ຄະນະນຳຂອງເມືອງ ເອົາໃຈໃສ່ປັບປຸງກໍ່ສ້າງ ແລະ ເສີມຂະຫຍາຍກ່ຽວກັບວຽກງານການຄຸ້ມຄອງຊາຍແດນ, ການພັດທະນາເສດຖະກິດ, ການຄ້າ, ວັດທະນະທໍາ ແລະ ທ່ອງທ່ຽວຊາຍແດນ ການເຊື່ອມຕໍ່ເສັ້ນທາງຄົມມະນາຄົມ ແລະ ເອົາໃຈໃສ່ຕັ້ງໜ້າເຂົ້າໃນວຽກງານຄວາມໝັ້ນຄົງ, ຄວາມເປັນລະບຽບຮຽບຮ້ອຍຂອງປະຊາຊົນຢູ່ຕາມບໍລິເວນຊາຍແດນ, ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອແບບພິເສດ ແລະ ການຮ່ວມມືຍຸດທະສາດ ຂອງສອງແຂວງ. ທັງນີ້ ເພື່ອສ້າງຊາຍແດນຂອງສອງປະເທດໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມືພັດທະນາແບບຍືນຍົງ ແລະ ເຮັດໃຫ້ດ່ານດັ່ງກ່າວ ກາຍເປັນດ່ານສາກົນໃນຕໍ່ໜ້າ. 

(ທ້າວ ວິສະນຸ ເພັດສຸພັນ)