ຮອງປະທານກຳມາທິການກົດໝາຍ ເຜີຍແຜ່ກົດໝາຍຢູ່ແຂວງຫຼວງພະບາງ

21/03/2018 00:00 -

(ສພຊ)ລະຫວ່າງວັນທີ 12-16 ມີນາ 2018, ກໍາມາທິການກົດໝາຍ ນໍາໂດຍທ່ານ ອໍາໄພ ຈິດມານົນ ຮອງປະທານກໍາມາທິການກົດໝາຍ ພ້ອມດ້ວຍຄະນະ ໄດ້ລົງເຄື່ອນໄຫວໂຄສະນາເຜີຍແຜ່ກົດໝາຍ ຢູ່ເມືອງນ້ຳບາກ ແລະ ເມືອງປາກອູ ແຂວງຫລວງພະບາງ, ໃນນັ້ນມີຄະນໍາຂອງເມືອງ ປາກອູ ແລະ ເມືອງນໍ້າບາກ, ບັນດາຂະແໜງການອ້ອມຂ້າງທັງສອງເມືອງ ແລະ ນອກຈາກນີ້ຍັງມີ ອົງການສືບສວນ-ສອບສວນ, ໄອຍະການເຂດ, ສານປະຊາຊົນເຂດ ແລະ ອົງການປົກຄອງບ້ານ ເຂົ້າຮ່ວມຮັບຟັງທັງໝົດ 131 ຄົນ ຍິງ 30 ຄົນ.

          ຈຸດປະສົງຂອງການເຜີຍແຜ່ຄັ້ງນີ້ ເພື່ອເປັນການຍົກລະດັບຄວາມຮູ້ຄວາມສາມາດທາງດ້ານກົດໝາຍ ແລະ ສ້າງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ ໃຫ້ແກ່ການນຳ, ພະນັກງານຫລັກແຫລ່ງຂອງເມືອງ ແລະ ບ້ານ ໃຫ້ນັບມື້ສູງຂຶ້ນ. ນອກນັ້ນ, ຄະນະ ຍັງໄດ້ນຳປຶ້ມກົດໝາຍຈຳນວນໜຶ່ງ ໄປມອບໃຫ້ 2 ເມືອງດັ່ງກ່າວ. 

ກົດໝາຍທີ່ນໍາໄປໂຄສະນາເຜີຍແຜ່ໃນຄັ້ງນີ້ປະກອບມີ: ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ, ກົດໝາຍວ່າດ້ວຍຄໍາຮ້ອງທຸກ, ກົດໝາຍວ່າດ້ວຍຂໍ້ຜູກພັນໃນສັນຍາ ແລະ ນອກສັນຍາ, ກົດໝາຍວ່າດ້ວຍຄອບຄົວ ແລະ ກົດໝາຍວ່າດ້ວຍການສືບທອດມູນມໍລະດົກ.

ການລົງໂຄສະນາເຜີຍແຜ່ກົດໝາຍດັ່ງກ່າວ ແມ່ນໄດ້ຮັບການສະໜັບສະໜູນດ້ານງົບປະມານຈາກໂຄງການສ້າງຄວາມສາມາດໃຫ້ສະພາແຫ່ງຊາດ (WFD).

(ກົມໂຄສະນາ ແລະ ຕີຄວາມໝາຍກົດໝາຍ)