ຮອງເລຂາທິການສະພາແຫ່ງຊາດ ເຮັດວຽກຢູ່ແຂວງຫຼວງນໍ້າທາ

21/03/2018 00:00 -

(ສພຊ) ວັນທີ 15 ມີນາ 2018, ທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເກັບກຳຂໍ້ມູນ, ຕິດຕາມ ແລະ ຊຸກຍູ້ວຽກງານຄະນະເລຂາທິການສະພາປະຊາຊົນແຂວງ (ສພຂ) ຫລວງນໍ້າທາ ທີ່ຫ້ອງປະຊຸມຂອງ ສພຂ ຫລວງນໍ້າທາ ໂດຍການເຂົ້າຮ່ວມຂອງທ່ານ ມີໄຊ ມີວິໄລ ເລຂາທິການ ສພຂ, ມີຮອງເລຂາທິການ ສພຂ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານວິຊາການພາຍໃນຄະນະເລຂາທິການ ສພຂ ເຂົ້າຮ່ວມທັງໝົດ 34 ທ່ານ ຍິງ 13 ທ່ານ.

          ໃນກອງປະຊຸມ, ທ່ານ ມີໄຊ ມີວິໄລ ໄດ້ລາຍງານການເຄື່ອນໄຫວວຽກງານຂອງຄະນະເລຂາທິການ ສພຂ ຫລວງນໍ້າທາ ເຊິ່ງມີທັງຂໍ້ສະດວກ ແລະ ຂໍ້ຫຍຸ້ງຍາກ ເປັນຕົ້ນແມ່ນການກະກຽມດ້ານເນື້ອໃນໃຫ້ແກ່ການດຳເນີນກອງປະຊຸມສະໄໝສາມັນ ຂອງ ສພຂ; ແຕ່ຍ້ອນມີກົດໝາຍ, ມະຕິ, ຄໍາແນະນຳ ແລະ ນິຕິກຳທີ່ກ່ຽວຂ້ອງເປັນບ່ອນອີງໃນການຈັດຕັ້ງປະຕິບັດ, ປະທານ ສພຂ ໄດ້ເອົາໃຈໃສ່ຊີ້ນຳ-ນຳພາ ແລະ ຕິດຕາມກວດກາການເຄື່ອນໄຫວວຽກງານຂອງຄະນະເລຂາທິການຢ່າງໃກ້ຊິດ ໂດຍສະເພາະແມ່ນວຽກເນື້ອໃນ, ຍ້ອນມີແຜນການ, ມີການແບ່ງງານ, ແບ່ງຄວາມຮັບຜິດຊອບໃຫ້ແຕ່ລະບຸກຄົນ, ມີການປະຊຸມແຕ່ລະໄລຍະ ເພື່ອປຶກສາຫາລື ຊອກໃຫ້ເຫັນດ້ານດີ, ດ້ານອ່ອນຂໍ້ຄົງຄ້າງໃນການກະກຽມບົດ ເພື່ອພ້ອມກັນປັບປຸງແກ້ໄຂໃຫ້ທັນເວລາ, ຍ້ອນມີການກະກຽມແຕ່ຫົວທີ ໂດຍເລີ່ມແຕ່ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງເຂົ້າຮ່ວມກອງປະຊຸມສະໄໝສາມັນຂອງສະພາແຫ່ງຊາດ ຈຶ່ງເຮັດໃຫ້ບົດໃນຂົງເຂດທີ່ຄະນະເລຂາທິການຮັບຜິດຊອບ ສໍາເລັດກ່ອນຄາດໝາຍ, ມີເນື້ອໃນໜັກແໜ້ນ ແລະ ຮັດກຸມ, ພະນັກງານພາຍໃນຄະນະເລຂາທິການ ໂດຍສະເພາະພະນັກງານໃນຂະແໜງຄົ້ນຄວ້າສັງລວມ ມີຄວາມຫ້າວຫັນໃນການສຶກສາຄົ້ນຄວ້າ, ເກັບກຳ ສະໜອງຂໍ້ມູນ, ສາມາດສະຫລຸບສັງລວມຜົນງານຕ່າງໆ ທີ່ປະຕິບັດໄດ້ໃນໄລຍະຜ່ານມາ, ປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ ແລະ ສໍາເລັດຕາມລະດັບຄາດໝາຍ, ຍ້ອນບັນດາຂະແໜງການ, ຄະນະກໍາມະການຂອງ ສພຂ ແລະ ພາກສ່ວນທີ່ກ່ຽວຂ້ອງ ໄດ້ໃຫ້ການຮ່ວມມືທີ່ດີ ແລະ ສະໜອງຂໍ້ມູນ-ຂ່າວສານອັນເປັນປະໂຫຍດໃຫ້ແກ່ການກະກຽມຂຽນບົດຕ່າງໆ, ຍ້ອນມີການປະສານສົມທົບລະຫວ່າງຄະນະເລຂາທິການ ສພຂ ກັບຄະນະເລຂາທິການສະພາແຫ່ງຊາດ, ບັນດາກົມຂອງສະພາແຫ່ງຊາດ ໂດຍສະເພາະຄະນະຮັບຜິດຊອບວຽກງານເຂດເລືອກຕັ້ງ, ຄະນະປະຈໍາ ສພຂ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຄະນະກຳມະການ, ໜ່ວຍສະມາຊິກສະພາປະຊາຊົນແຂວງປະຈໍາແຕ່ລະເມືອງ, ອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ.

ຄຽງຄູ່ກັບດ້ານດີ ຍັງມີຈຸດອ່ອນຈໍານວນໜຶ່ງ ເຊິ່ງຈະພ້ອມກັນປັບປຸງແກ້ໄຂໃນຕໍ່ໜ້າດັ່ງນີ້: ການກະກຽມບົດຂອງແຂວງ ບໍ່ສໍາເລັດຕາມແຜນການທີ່ກຳນົດໄວ້ ໂດຍລໍຖ້າກອງປະຊຸມປະຈໍາປີ ຫລື ປະຈໍາ 6 ເດືອນຂອງແຂວງສໍາເລັດເແລ້ວ ຈຶ່ງມາກະກຽມເຮັດບົດເປັນສາເຫດເຮັດໃຫ້ວັນດຳເນີນກອງປະຊຸມສະພາ ຖືກເລື່ອນຕະຫລອດ ແລະ ບົດຈໍານວນໜຶ່ງ ໂດຍສະເພາະວາລະ, ແຜນບັນຊາ ກໍມີການປັບປຸງໄປນຳ, ຂະແໜງຄົ້ນຄວ້າສັງລວມ ທີ່ຮັບຜິດຊອບເຮັດເນື້ອໃນກອງປະຊຸມໂດຍກົງໃຫ້ຄະນະເລຂາທິການ ຍັງມີພະນັກງານຈໍາກັດ ອີກດ້ານໜຶ່ງ ພະນັກງານສ່ວນຫລາຍແມ່ນພະນັກງານທີ່ໜຸ່ມນ້ອຍ, ປະສົບການໃນການຄົ້ນຄວ້າສັງລວມ ຂີດຂຽນ ເວົ້າລວມແມ່ນປະສົບການໃນການເຮັດວຽກເນື້ອໃນຍັງບໍ່ຫລາຍ. ຈາກນັ້ນ, ກອງປະຊຸມໄດ້ຮັບຟັງການປະກອບຄໍາຄິດຄໍາເຫັນແລກປ່ຽນຂອງບັນດາທ່ານຜູ້ເຂົ້າຮ່ວມກອງປະຊຸມຢ່າງກວ້າງຂວາງ.

          ທ່ານຮອງເລຂາທິການສະພາແຫ່ງຊາດ ໄດ້ມີຄໍາເຫັນໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການປະຕິບັດໜ້າທີ່ວຽກງານຂອງຄະນະເລຂາທິການ ສພຂ ຫລວງນໍ້າທາ ໃນໄລຍະຜ່ານມາ ແລະ ຍັງໄດ້ເນັ້ນໃຫ້ບັນດາທ່ານຈົ່ງກຳແໜ້ນແນວທາງ, ແຜນນະໂຍບາຍ, ກົດໝາຍ ແລະ  ນິຕິກຳຕ່າງໆ, ເອົາໃຈໃສ່ກົນໄກການປະສານງານ, ເພີ່ມທະວີວຽກງານຈັດຕັ້ງພະນັກງານ ຕະຫລອດຮອດການຫັນສູ່ຄວາມທັນສະໄໝຂອງວຽກງານຕ່າງໆ ທັງນີ້ ກໍເພື່ອເປັນການປັບປຸງວຽກງານເລຂາທິການ ສພຂ ໂດຍສະເພາະແມ່ນທາງດ້ານເນື້ອໃນ ໃຫ້ນັບມື້ມີຄຸນນະພາບ ແລະ ທັນສະໄໝຂຶ້ນເລື້ອຍໆ.

(ນາງ ອຳພອນ ສີປະເສີດ)