ປະທານກຳມາທິການ ປກຊ-ປກສ ເຮັດວຽກຢູ່ແຂວງບໍ່ແກ້ວ

21/03/2018 00:00 -

(ສພຊ)ລະຫວ່າງວັນທີ 13-15 ມີນາ 2018, ທ່ານ ຄໍາສຸກ ວີອິນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ກວດກາ, ຊຸກຍູ້ ແລະ ເກັບກໍາຂໍ້ມູນ ກ່ຽວກັບວຽກງານ ປກຊ-ປກສ ຢູ່ 3 ຈຸດຂອງແຂວງບໍ່ແກ້ວຄື: ສະພາປະຊາຊົນແຂວງ (ສພຂ), ກອງບັນຊາການ ປກຊ ແລະ ກອງບັນຊາການ ປກສ ແຂວງບໍ່ແກ້ວ.

ໂອກາດເຮັດວຽກຢູ່ ສພຂ ບໍ່ແກ້ວ ແມ່ນໄດ້ຮັບການຕ້ອນຮັບຢ່າງອົບອຸ່ນຈາກທ່ານ ຫຸມແພງ ອິນທະຈັກ ຮອງປະທານຄະນະກຳມະການຍຸຕິທຳ ແລະ ປກຊ-ປກສ, ມີທ່ານ ສົມລິດ ສີຜາວັນ ປະທານ ສພຂ, ຮອງເລຂາທິການ, ພະນັກງານຂະແໜງ ປກຊ-ປກສ ເຂົ້າຮ່ວມ ເຊິ່ງກ່ອນອື່ນແມ່ນໄດ້ຮັບຟັງການລາຍງານຫຍໍ້ ກ່ຽວກັບການເຄື່ອນໄຫວວຽກງານໃນໄລຍະຜ່ານມາຂອງຄະນະກຳມະການຍຸຕິທຳ ແລະ ປກຊ-ປກສ, ບົດລາຍງານໄດ້ຍົກໃຫ້ເຫັນວ່າໃນໄລຍະຜ່ານມາແມ່ນໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ, ຊີ້ນໍາ-ນໍາພາການເຄື່ອນໄຫວວຽກງານໃຫ້ແກ່ພະນັກງານພາຍໃນຄະນະກຳມະການຍຸຕິທຳ ແລະ ປກຊ-ປກສ ເປັນປົກກະຕິ, ເຮັດໃຫ້ພະນັກງານມີຄວາມຫ້າວຫັນຕໍ່ໜ້າທີ່ການເມືອງ, ມີຄວາມຊື່ສັດບໍລິສຸດ, ຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆ ແລະ ຈໍາແນກມິດ-ສັດຕູໄດ້ຢ່າງຈະແຈ້ງ. ແຕ່ຍັງມີຂໍ້ຄົງຄ້າງຈໍານວນໜຶ່ງທີ່ຍັງບໍ່ທັນໄດ້ດີ ເນື່ອງຈາກພະນັກງານທີ່ເຮັດວຽກຂະແໜງ ປກຊ-ປກສ ແມ່ນໄດ້ຍົກຍ້າຍມາຈາກພາກສ່ວນອື່ນ ເຮັດໃຫ້ປະສົບການໃນການຈັດຕັ້ງປະຕິບັດໜ້າທີ່ວຽກງານບໍ່ທັນກຳແໜ້ນໄດ້ຢ່າງລະອຽດ, ການປະສານສົມທົບກັບພາກສ່ວນອື່ນ ໂດຍສະເພາະແມ່ນສອງກອງບັນຊາການທະຫານ-ຕຳຫລວດ ຍັງບໍ່ທັນຕໍ່ເນື່ອງເປັນປົກກະຕິ, ການໂຄສະນາເຜີຍແຜ່ພາລະບົດບາດ, ສິດ ແລະ ໜ້າທີ່ ຂອງຄະນະກຳມະການຍຸຕິທຳ ແລະ ປກຊ-ປກສ ຍັງບໍ່ທັນກວ້າງຂວາງ ເຮັດໃຫ້ພະແນກການຕ່າງໆ ແລະ ພໍ່ແມ່ປະຊາຊົນ ບໍ່ເຂົ້າໃຈຕໍ່ພາລະບົດບາດ, ສິດ ແລະ ໜ້າທີ່ຂອງຕົນ ພ້ອມນັ້ນ, ຮອງປະທານຄະນະກຳມະການຍຸຕິທຳ ແລະ ປກຊ-ປກສ ຍັງໄດ້ສະເໜີແລກປ່ຽນບົດຮຽນຫລາຍບັນຫາຕໍ່ຄະນະທີມງານສະພາແຫ່ງຊາດ ເປັນຕົ້ນແມ່ນສະເໜີສ້າງຕັ້ງຂະແໜງນິຕິກຳລຸ່ມກົດໝາຍ, ສະເໜີໃຫ້ມີການເຝິກອົບຮົມວຽກງານ ປກຊ-ປກສ ແລະ ໃຫ້ມີການຖອດຖອນບົດຮຽນຢູ່ແຕ່ລະແຂວງ.

ຈາກນັ້ນ, ທ່ານ ສົມລິດ ສີຜາວັນ ກໍໄດ້ປະກອບຄໍາຄິດຄຳເຫັນແລກປ່ຽນບົດຮຽນນຳຄະນະທີມງານສະພາແຫ່ງຊາດ ຫລາຍບັນຫາ ເປັນຕົ້ນບັນຫາຢາເສບຕິດ, ຂີ້ລັກງັດເງະ ເຫັນວ່າເປັນບັນຫາໜຶ່ງທີ່ກໍ່ຄວາມບໍ່ສະຫງົບ ແລະ ເປັນລະບຽບຮຽບຮ້ອຍ, ສະນັ້ນ, ສະເໜີໃຫ້ພາກສ່ວນກ່ຽວຂ້ອງກັບ ສພຂ ເປັນເຈົ້າການຕ້ານ ແລະ ສະກັດກັ້ນປາກົດການຫຍໍ້ທໍ້ດັ່ງກ່າວໃຫ້ໝົດໄປ, ສ່ວນວຽກງານຂອງ ສພຂ ຍັງມີຄວາມຫຍຸ້ງຍາກ ໂດຍສະເພາະແມ່ນບ່ອນເຮັດວຽກຂອງພະນັກງານ-ລັດຖະກອນ, ພາຫະນະ, ອຸປະກອນ, ດ້ານງົບປະມານ ຍັງບໍ່ພຽງພໍກັບໜ້າທີ່ວຽກງານ. ຫລັງຈາກນັ້ນ, ທ່ານ ຄຳສຸກ ວີອິນທະວົງ ພ້ອມດ້ວຍຄະນະ ໄດ້ພ້ອມກັນແລກປ່ຽນຄໍາຄິດຄໍາເຫັນຢ່າງກົງໄປກົງມາຫລາຍບັນຫາ ແລະ ໄດ້ເກັບກຳຂໍ້ມູນ, ການສະເໜີຂອງ ສພຂ ເພື່ອນໍາໄປລາຍງານຕໍ່ຂັ້ນເທິງ.

 (ໄຊວາງ ຈູຈົ່ງ)