ມອບ-ຮັບໜ້າທີ່ປະທານກຳມາທິການຍຸຕິທຳ

11/05/2021 00:00 -

        (ສພຊ) ວັນທີ 5 ເມສາ 2021 ທີ່ສະພາແຫ່ງຊາດ (ທາດຫລວງ) ໄດ້ມີພິທີມອບ-ຮັບໜ້າທີ່ລະຫວ່າງທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳ ສະພາແຫ່ງຊາດ ຊຸດທີ VIII ຜູ້ເກົ່າ ແລະ ທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ ຊຸດທີ IX ຜູ້ໃໝ່ ໂດຍການເຂົ້າຮ່ວມຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ພ້ອມດ້ວຍບັນດາທ່ານຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພະນັກງານ-ວິຊາການພາຍໃນກຳມາທິການດັ່ງກ່າວເຂົ້າຮ່ວມເປັນສັກຂີພິຍານ.

        ໃນພິທີ, ທ່ານ ນາງ ບົວຄຳ ທິບພະວົງ ໄດ້ສະຫລຸບລາຍງານຜົນງານ 5 ປີ ການເຄື່ອນໄຫວຈັດຕັ້ງປະຕິບັດພາລະບົດບາດ ແລະ ການຊີ້ນຳ-ນຳພາຂອງຄະນະກຳມາທິການຍຸຕິທຳ ຊຸດທີ VIII ເຊິ່ງມີເນື້ອໃນສຳຄັນບາງຕອນວ່າ: ໂດຍປະຕິບັດຕາມແຜນການສ້າງກົດໝາຍ 5 ປີ ຂອງສະພາແຫ່ງຊາດ ຊຸດທີ VIII; ໃນນັ້ນ, ໃນຂົງເຂດວຽກງານຍຸຕິທໍາ ມີ 14 ສະບັບ ແລະ ສາມາດຈັດຕັ້ງປະຕິບັດຕາມແຜນການສໍາເລັດ 12 ສະບັບ, ຍັງບໍ່ທັນສໍາເລັດ 2 ສະບັບ ຄື: ກົດໝາຍວ່າດ້ວຍການຄຸ້ມຄອງການຈັດຕັ້ງປະຕິບັດຄໍາຕັດສິນຂອງສານ ແລະ ກົດໝາຍວ່າດ້ວຍການດໍາເນີນຄະດີແພ່ງ ສຳລັບບັນດານິຕິກໍາ ທີ່ເປັນເຄື່ອງມືໃຫ້ແກ່ກໍາມາທິການຍຸຕິທໍາ ປະກອບມີ 7 ສະບັບ ຄື: ມະຕິ ຂອງຄະນະປະຈໍາສະພາແຫ່ງຊາດ ສະບັບເລກທີ 129/ຄປຈ, ລົງວັນທີ 7 ກັນຍາ 2016 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກໍາມາທິການຍຸຕິທໍາ; ຂໍ້ຕົກລົງ ຂອງຄະນະເລຂາທິການສະພາແຫ່ງຊາດ ສະບັບເລກທີ 0449/ຄລສ, ລົງວັນທີ 28 ມິຖຸນາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມຕິດຕາມກວດກາຂົງເຂດຍຸຕິທໍາ; ຂໍ້ຕົກລົງ ຂອງຄະນະເລຂາທິການສະພາແຫ່ງຊາດ ສະບັບເລກທີ 0450/ຄລສ, ລົງວັນທີ 28 ມິຖຸນາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມຄໍາຮ້ອງຂໍຄວາມເປັນທໍາ; ມະຕິ ຂອງຄະນະປະຈໍາສະພາແຫ່ງຊາດ ເລກທີ 132/ຄປຈ,  ລົງວັນທີ 21 ສິງຫາ 2019 ວ່າດ້ວຍການກວດກາ, ຄົ້ນຄວ້າ ແລະ ພິຈາລະນາຄໍາຮ້ອງຂໍຄວາມເປັນທໍາ; ແຜ່ນພັບການພິຈາລະນາຄໍາຮ້ອງຂໍຄວາມເປັນທໍາ ຂອງຄະນະປະຈໍາສະພາແຫ່ງຊາດ; ຂໍ້ຕົກລົງ ສະບັບເລກທີ 26/ກມຍທ, ລົງວັນທີ 30 ມັງກອນ 2019 ວ່າດ້ວຍລະບຽບການຮັບ ແລະ ການ ພິຈາລະນາຄໍາຮ້ອງຂໍຄວາມເປັນທໍາ ຂອງກໍາມາ​ທິການ​ຍຸຕິ​ທໍາ ແລະ ແຈ້ງການ ເລກທີ 307/ກມຍທ, ລົງວັນທີ 29 ພຶດສະພາ 2020 ຂອງກໍາມາທິການຍຸຕິທໍາ ກ່ຽວກັບການປະກອບເອກະສານ ແລະ ຂັ້ນຕອນການສະເໜີແຕ່ງຕັ້ງ, ຍົກຍ້າຍ, ປົດຕໍາແໜ່ງສະມາຊິກສະພາຜູ້ພິພາກສາ, ຜູ້ພິພາກສາຊັ້ນໜຶ່ງ, ຊັ້ນສີ່ ແລະ ຕໍາແໜ່ງບໍລິຫານປະເພດ 2 ຂຶ້ນໄປ, ການອອກພັກການ-ຮັບອຸດໜູນບໍານານ ຂອງຕໍາແໜ່ງບໍລິຫານປະເພດ 2 ພະນັກງານສານປະຊາຊົນ ແລະ ຮ່າງແບບຟອມ ກ່ຽວກັບເອກະສານການຄົ້ນຄວ້າພິຈາລະນາຄໍາຮ້ອງຂໍຄວາມເປັນທໍາ. ນິຕິກໍາໃຕ້ກົດ    ໝາຍຂອງປະທານປະເທດ ປະກອບມີ 2 ສະບັບ ຄື: ລັດຖະບັນຍັດປະທານປະເທດ ວ່າດ້ວຍການດໍາເນີນຄະດີປົກຄອງ; ລັດຖະບັນຍັດ 003/ປປທ, ລົງ​ວັນ​ທີ 26 ທັນວາ 2012 ຂົງເຂດວຽກງານຍຸຕິທໍາ; ນອກນັ້ນ, ຍັງໄດ້ປະຕິບັດສຳເລັດຫລາຍໜ້າວຽກ ເປັນຕົ້ນດ້ານການຕົກລົງບັນຫາສຳຄັນຂອງຊາດ; ດ້ານວຽກງານການຕິດຕາມກວດກາ; ດ້ານວຽກງານການຕ່າງປະເທດ ແລະ ດ້ານວຽກງານການສ້າງຄວາມເຂັ້ມແຂງ.

          ຈາກນັ້ນ, ທ່ານ ຄຳແພງ ວິລະພັນ ໄດ້ມີຄຳເຫັນກ່າວຮັບໜ້າທີ່ ເຊິ່ງທ່ານໄດ້ກ່າວວ່າ: ຂໍ​ສະ​ແດງ​ຄວາມ​ຍ້ອງຍໍ​ ຊົມ​ເຊີຍ ​ແລະ ຕີ​ລາຄາ​ສູງ ຕໍ່​ຜົນສຳ​ເລັດ​ທີ່​ຄະນະ​ກຳມາທິການ​ຍຸຕິ​ທຳ ສະພາ​ແຫ່ງ​ຊາດຊຸດທີ VIII ​ໂດຍມີ​ທ່ານ ນາງ ບົວ​ຄຳ ທິບ​ພະ​ວົງ ​ເປັນ​ປະທານ ​ແລະ ທ່ານ ກົງ​ຈີ ຢາງ​ຈື ​ເປັນ​ຮອງ​ປະທານ ທີ່ຍາດ​ມາ​ໄດ້ ​ໃນໄລຍະ 5 ປີຜ່ານມາ ​ເຖິງ​ຈະ​ມີສະພາບ​ຄວາມ​ຫຍຸ້ງຍາກ ​ແລະ ສິ່ງທ້າ​ທາຍ​ຫລາຍ​ປະການ​ແຕ່​ຄະນະ​ກຳມາ​ທິການ​ຍຸຕິ​ທຳ ສະພາ​ແຫ່ງ​ຊາດຊຸດ​ທີ VIII ກໍ​ສາມາດ​ບັນລຸ​ຄາດໝາຍ​ຕ່າງ​ທີ່​ວາງ​ໄວ້​ເຊັ່ນ: ໜ່ວຍ​ພັກ​ໄດ້​ກາຍ​ເປັນ​ໜ່ວຍ​ພັກ​ເຂັ້ມ​ແຂງ, ປະຕິບັດ​ໜ້າ​ທີ່​ຕິດ​ຕາມ​ກວດກາ ​ແລະ ພິຈາລະນາ​ຄຳ​ຮ້ອງ​ຂໍ​ຄວາມ​ເປັນທຳ​ຂອງ​ປະຊາຊົນ​ ​ໄດ້ 82%, ກົງ​ຈັກ ​ແລະ ພະນັກງານ​ໄດ້​ມີ​ການ​ເຕີບ​ໃຫຍ່​ເຂັ້ມ​ແຂງ, ບັນດາ​ນິຕິ​ກຳ​ເປັນ​ບ່ອນ​ອີງ​ໃຫ້​ແກ່​ການ​ປະຕິບັດ​ໜ້າ​ທີ່​ໄດ້​ຮັບ​ການ​ສ້າງ​ຂຶ້ນ​ເປັນ​ລະບົບ​ພໍ​ສົມຄວນ ເຊິ່ງ​ເປັນ​ພື້ນຖານ​ສຳຄັນ​ໃຫ້​ແກ່​ການ​​ເຄື່ອ​ນ​ໄຫວວຽ​ກງານຂອງ​ກຳມາ​ທິການ​ຍຸຕິ​ທຳ ສະພາ​ແຫ່ງ​ຊາດຊຸດ​ທີ IX ​ໄດ້​ສືບຕໍ່​ເສີມ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ໃຫ້​ກ້າວໜ້າ​ຂຶ້ນ​ຢ່າງ​​ບໍ່​ຢຸດ​ຢັ້ງ.​ ທ່ານຍັງໄດ້​ໃຫ້​ຄຳ​ໝັ້ນ​ສັນຍາ​ວ່າຈະ​ເຊີດ​ຊູ​ຄວາມ​ຮັບຜິດຊອບການ​ເມືອງ​ສູງ​ຂຶ້ນ ຮ່ວມ​ກັບ​ຄະນະ​ກຳມາທິການ, ຄະນະ​ກົມ ​ແລະ ວິຊາ​ການ ທີ່​ເປັນ​ເສນາ​ທິການ​ຂອງ​ກຳມາ​ທິການ​, ປະຕິບັດ​ໜ້າ​ທີ່​ບົນ​ພື້ນຖານ​ລັດຖະທຳ​ມະນູນ ​ແລະ ກົດໝາຍ​ໃຫ້​ດີ​ທີ່​ສຸດ ​ແລະ ພ້ອມ​ທີ່​ຈະ​ອຸທິດ​ເຫື່ອ​ແຮງ, ສະຕິ​ປັນຍາ, ຄວາມ​ຮູ້, ຄວາມ​ສາມາດ​ຂອງ​ຕົນ​ເຂົ້າ​ໃນ​ການ​ປະຕິບັດໜ້າ​ທີ່​ດ້ວຍ​ຄວາມ​ຮັບ​ຜິດ​ຊອບ​ສູງ ​ເພື່ອ​ຮ່ວມ​ກັບ​ຄະນະ​ພັກ, ຄະນະ​ນຳ​ສະພາ​ແຫ່ງ​ຊາດ, ຜັນ​ຂະຫຍາ​ຍມະຕິ​ຂອງ​ກອງ​ປະຊຸມ​ໃຫຍ່ ​ຄັ້ງ​ທີ XI ຂອງ​ພັກ ​ແລະ ມະຕິກອງ​ປະຊຸມ​ຄັ້ງ​ປະຖົມມະລືກ​ຂອງ​ສະພາ​ແຫ່ງ​ຊາດ ຊຸດ​ທີ IX ​ໃຫ້​ປະສົບ​ຜົນສຳ​ເລັດ​ເປັນ​ຢ່າງ​ດີ; ສືບຕໍ່​ປັບປຸງ​ກົນ​ໄກ, ລະບອບ​ແບບ​ແຜນ​ວິທີ​ເຮັດ​ວຽກ, ຍົກ​ສູງ​ຄວາມ​ຮັບຜິດຊອບ​ໃນ​ການຈັດ​ຕັ້ງ​ປະຕິບັດ​ພາລະ​ບົດບາດ, ສິດ ​ແລະ ໜ້າ​ທີ່​ຂອງ​ກຳມາ​ທິການ​ຍຸຕິ​ທຳ ຕາມ​ທິດ 4 ບຸກ​ທະລຸ​ທີ່​ໄດ້​ກຳນົດ​ໄວ້​​ໃນ​ມະຕິ​ຂອງ​ພັກ; ເພີ່ມ​ທະວີ​ລະດັບ​ຄວາມ​ຮູ້, ຄວາມ​ສາມາດ​ດ້ານ​ທິດ​ສະ​ດີ, ວິຊາ​ສະ​ເພາະ, ຈັນ​ຍາ​ບັນ, ຈັນຍາທຳ ​ແລະ ນໍ້າ​ໃຈ​ຮັບ​ໃຊ້​ປະຊາ​ຊົນຢ່າງ​ບໍລິສຸດ​ໃຈ ຂອງ​ຖັນ​ແຖວ​ພະນັກງານ, ສະມາຊິກ​ພັກ ​ແລະ ປະຕິບັດ​ໜ້າ​ທີ່​ຕາມ​ກົດໝາຍ​ຢ່າງ​ເຂັ້ມ​ງວດ.

          ໃນພິທີອັນມີຄວາມໝາຍສຳຄັນດັ່ງກ່າວ ຍັງໄດ້ຮັບຟັງການໂອ້ລົມຂອງທ່ານ ຈະເລີນ ເຍຍປາວເຮີ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນໄລຍະ 5 ປີຜ່ານມາ ທີ່ກຳມາທິການຍາດມາໄດ້ ເພື່ອ​ຮັບປະກັນ​ໃຫ້​ວຽກ​ງານ​ຂອງ​ກຳມາ​ທິການ​ຍຸຕິ​ທຳ​ບັນລຸ​ຕາມ​ຈຸດປະສົງ; ພ້ອມນັ້ນ, ທ່ານຍັງໄດ້​ຮຽກຮ້ອງ​ມາ​ຍັງ​ຄະນະ​ພັກ, ຄະນະ​ນຳ​ຂອງ​ກຳມາ​ທິການ​ຍຸ​ຕິ​ທຳ ​ ກໍ​ຄື​ພະນັກງານ-ລັດຖະກອນ ​ແລະ ພາກສ່ວນ​ກ່ຽວຂ້ອງ​ຈົ່ງ​ໃຫ້​ຄວາມ​ຮ່ວມ​ມື ​ແລະ ຊີ້​ນຳ-ນຳພາ, ສ້າງ​ຄວາມ​ສາມັກຄີ ​ເປັນ​ເອກ​ກະພາບ ​ແລະ ຍົກ​ສູງ​ຄວາມ​ຮັບຜິດ​ຊອບ​ການ​ເມືອງ​ຂອງຕົນ​ໃຫ້​ສູງ​ຕື່ມ.

                                                                  ແຫຼ່ງຂ່າວທີ່ມາ: ສະພາແຫ່ງຊາດ