ມອບ-ຮັບໜ້າທີ່ລະຫວ່າງປະທານກໍາມາທິການກົດໝາຍ

11/05/2021 00:00 -

       (ສພຊ) ວັນທີ 5 ເມສາ 2021 ທີ່ຫ້ອງປະຊຸມຄະນະປະຈໍາສະພາແຫ່ງຊາດ ຊັ້ນ 5 ກໍາມາທິການກົດໝາຍ ໄດ້ຈັດພິທີມອບ-ຮັບໜ້າທີ່ປະທານກໍາມາທິການກົດໝາຍ ລະ ຫວ່າງທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍສະພາແຫ່ງຊາດ ຊຸດທີ VIII ແລະ ທ່ານ ຈະເລີນ ເຍຍປາວເຮີ ປະທານກໍາມາທິການກົດໝາຍ ທັງເປັນຮອງປະທານສະພາແຫ່ງຊາດ ຊຸດທີ IX  ເຂົ້າຮ່ວມໂດຍທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ ຊຸດທີ VIII ຜູ້ຊີ້ນໍາວຽກງານກໍາມາທິການກົດໝາຍ, ມີບັນດາທ່ານຮອງປະທານກໍາມາທິການທັງເກົ່າ ແລະ ໃໝ່, ຄະນະກົມ, ຄະນະພະແນກ ຕະຫລອດຮອດພະນັກງານ-ລັດຖະກອນ ພາຍໃນກໍາມາທິການກົດໝາຍເຂົ້າຮ່ວມ.

       ຈຸດປະສົງຂອງການຈັດພິທີມອບ-ຮັບໜ້າທີ່ໃນຄັ້ງນີ້ ເພື່ອເປັນການເຂົ້າຮ່ວມ ແລະ ເປັນສັກຂີພິຍານຕໍ່ການມອບ-ຮັບໜ້າທີ່ຕໍາແໜ່ງປະທານກໍາມາທິການກົດໝາຍ ເຊິ່ງເປັນໜ້າທີ່ໆມີກຽດຂອງກໍາມາທິການກົດໝາຍສະພາແຫ່ງຊາດ ແລະ ເປັນຊ່ວງຕໍ່ທີ່ສໍາຄັນຢ່າງຍິ່ງ ລະຫວ່າງກໍາມາທິການກົດໝາຍ ສະພາແຫ່ງຊາດ ຊຸດທີ VIII  ແລະ ຊຸດທີ IX.

       ໃນພິທີ, ຜູ້ເຂົ້າຮ່ວມໄດ້ຮັບຟັງການສະຫລຸບວຽກງານການເຄື່ອນໄຫວຂອງກໍາມາທິການກົດໝາຍ ສະພາແຫ່ງຊາດ ຊຸດທີ VIII ພ້ອມທັງຄໍາກ່າວມອບໜ້າທີ່ຂອງປະທານກໍາມາທິການຜູ້ເກົ່າ ແລະ ການສະເໜີແຜນການເຄື່ອນໄຫວຕໍ່ໜ້າໂດຍຫຍໍ້ ແລະ ການກ່າວຮັບໜ້າທີ່ ຂອງປະທານກໍາມາທິການກົດໝາຍ ສະພາແຫ່ງຊາດ ຊຸດທີ IX.

       ໂອກາດດັ່ງກ່າວ, ຍັງໄດ້ຮັບຟັງການໂອ້ລົມໃຫ້ທິດເຍືອງທາງຂອງທ່ານ ສົມພັນ ແພງຄໍາມີ ໂດຍທ່ານໄດ້ຍ້ອງຍໍຊົມເຊີຍຕໍ່ຜົນງານການນໍາພາທີ່ກໍາມາທິການກົດໝາຍຊຸດຜ່ານມາຍາດມາໄດ້ ເປັນຕົ້ນແມ່ນໄດ້ສ້າງ ແລະ ປັບປຸງກົດໝາຍ ແລະ ຜົນງານອື່ນໆ ທີ່ພົ້ນເດັ່ນ ແລະ ຮຽກຮ້ອງໃຫ້ປະທານກໍາມາທິການ ແລະ ຮອງປະທານກໍາມາທິການກົດ ໝາຍຜູ້ໃໝ່ສືບຕໍ່ປັບປຸງກົງຈັກບຸກຄະລາກອນ, ສ້າງພະນັກງານ-ວິຊາການທີ່ຊ່ຽວຊານສືບທອດລົງເລິກກົດໝາຍແຕ່ລະຂົງເຂດ ເພື່ອເປັນເສນາທິການໃຫ້ແກ່ກໍາມາທິການກົດໝາຍ ແລະ ພ້ອມທີ່ຈະປະກອບສ່ວນເຂົ້າໃນການໃຫ້ຄໍາປຶກສາຫາລືຕໍ່ວຽກງານສ້າງ ແລະ ປັບປຸງກົດໝາຍ ຕາມຄວາມເໝາະສົມ ແລະ ສະເໜີກໍາມາທິການກົດໝາຍ ຊຸດໃໝ່ ຈົ່ງສືບຕໍ່ຮັກສາມູນເຊື້ອຜົນງານທີ່ຍາດມາໄດ້ ແລະ ເສີມຂະຫຍາຍມູນເຊື້ອທີ່ໂດດເດັ່ນຂອງການ ນໍາພາຂອງປະທານກໍາມາການກົດໝາຍຊຸດຜ່ານມາ ແລະ ໃຫ້ພະນັກງານ-ລັດຖະກອນທຸກຄົນ ຕັ້ງໜ້າເຝິກຝົນຫລໍ່ຫລອມຕົນເອງ, ສຶກສາຮໍ່າຮຽນຄົ້ນຄວ້າດຸໝັ່ນຂະຫຍັນພຽນ ເພື່ອພັດທະນາຕົນເອງໃຫ້ມີສັກກະຍາພາບໃນການປະຕິບັດໜ້າທີ່, ສິດ ແລະ ພາລະບົດບາດ ໃນການເປັນເສນາທິການໃຫ້ແກ່ກໍາມາທິການກົດໝາຍ ກໍຄືຄະນະນະປະຈໍາສະພາແຫ່ງຊາດ.

                                                                              ແຫຼ່ງຂ່າວທີ່ມາ: ສະພາແຫ່ງຊາດ