ສພຊ ມອບເຄື່ອງຊ່ວຍເຫລືອປ້ອງກັນໂຄວິດ-19 ໃຫ້ຫລາຍພາກສ່ວນ

11/05/2021 00:00 -

      (ສພຊ) ໃນວັນທີ 29 ເມສາ 2021 ຕາງໜ້າຄະນະປະຈໍາສະພາແຫ່ງຊາດ ໄດ້ນໍາເຄື່ອງຊ່ວຍເຫລືອໄປມອບໃຫ້ໂຮງໝໍເສດຖາທິລາດ ລວມມູນຄ່າ 81.369.600 ກີບ ເພື່ອນໍາໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປລາວ.

      ກ່າວມອບເຄື່ອງຄັ້ງນີ້ ໂດຍທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທໍາ-ສັງຄົມ ກ່າວຮັບໂດຍທ່ານ ດຣ. ໄພວັນ ແກ້ວປະເສີດ ອໍານວຍການໂຮງໝໍເສດຖາທິລາດ ມີບັນດາຄະນະນໍາທັງສອງຝ່າຍເຂົ້າຮ່ວມເປັນສັກຂີພິຍານ.

ເຄື່ອງທີ່ນໍາມາຊ່ວຍເຫລືອໃນຄັ້ງນີ້ ແມ່ນໄດ້ມາຈາກບັນດາບໍລິສັດຫ້າງຮ້ານປະກອບການ ທີ່ນໍາມາມອບໃຫ້ສະພາແຫ່ງຊາດໃນວັນທີ 28 ເມສາຜ່ານມາ ປະກອບມີ: ຢາ, ນໍ້າດື່ມ, ກາເຟ ແລະ ໂອວັນຕິນ ນອກຈາກນີ້, ຄະນະຍັງນໍາເອົາເຄື່ອງອີກຈໍານວນໜຶ່ງ ໄປມອບໃຫ້ແກ່ຄະນະອໍານວຍການໂຮງໝໍມິດຕະພາບ 150 ຕຽງ ລວມມູນຄ່າ 81.369.600 ກີບ.

ໃນຕອນບ່າຍຂອງວັນດຽວກັນ ນໍາໂດຍທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ ແລະ ທ່ານ ນາງ ມະນີວັນ ເຍຍປາວເຮີ ຮອງປະທານກໍາມາທິການວັດທະນະທໍາ-ສັງຄົມ ພ້ອມດ້ວຍຄະນະ ໄດ້ນໍາເຄື່ອງຊ່ວຍເຫລືອ ໄປມອບໃຫ້ສູນກັກກັນຫລັກ 27 ລວມມູນຄ່າ 99.869.600 ກີບ.

                                                               ແຫຼ່ງຂ່າວທີ່ມາ: ສະພາແຫ່ງຊາດ