ປະທານກຳມາທິການຍຸຕິທຳ ສະພາແຫ່ງຊາດ ເຮັດວຽກຢູ່ແຂວງບໍລິຄຳໄຊ

21/03/2018 00:00 -

(ສພຊ)ວັນທີ 19 ມີນາຜ່ານມາ, ທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວພົບປະ ແລະ ເຮັດວຽກຮ່ວມກັບສະພາປະຊາຊົນແຂວງ (ສພຂ) ບໍລິຄໍາໄຊ; ເຂົ້າຮ່ວມມີທ່ານ ສຸວັນນີ ໄຊຊະນະ ປະທານ ສພຂ, ປະທານ-ຮອງປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ຕະຫລອດຮອດພາກສ່ວນກ່ຽວຂ້ອງ.

        ການເຄື່ອນໄຫວເຮັດວຽກໃນຄັ້ງນີ້ ເພື່ອຮັບຟັງການລາຍງານສະພາບການຈັດຕັ້ງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ມະຕິຂອງກອງປະຊຸມສະ ພາແຫ່ງຊາດ ສະບັບເລກທີ 013/ສພຊ, ລົງວັນທີ 25 ພະຈິກ 1016; ສະບັບເລກທີ 012/ສພຊ, ລົງວັນທີ 22 ມິຖຸນາ 2017 ແລະ ສະບັບເລກທີ 080/ສພຊ, ລົງວັນທີ 17 ພະຈິກ 2017 ວ່າດ້ວຍການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຍົກສູງຄຸນນະພາບການປະຕິບັດສິດສັ່ງຟ້ອງຜູ້ຖືກຫາຂຶ້ນສານ, ການເຂົ້າຮ່ວມໃນການດຳເນີນຄະດີແພ່ງຢູ່ທີ່ປະຊຸມສານ ແລະ ບົດລາຍງານຂອງສານປະຊາຊົນສູງສຸດ ກ່ຽວກັບການຍົກສູງຄຸນນະພາບການດຳເນີນຄະດີຢູ່ສານຂັ້ນຕົ້ນ ແລະ ຂັ້ນອຸທອນຂອງສານປະຊາຊົນ ພ້ອມທັງເປັນການປຶກສາຫາລືກ່ຽວກັບວຽກງານໃນຂົງເຂດຍຸຕິທຳ, ຄົ້ນຄວ້າຄຳຮ້ອງຂໍຄວາມເປັນທຳ ແລະ ການປະສານສົມທົບລະຫວ່າງກຳມາທິການຂອງສະພາແຫ່ງຊາດ ຮ່ວມກັບພາກສ່ວນທີ່ກ່ຽວຂ້ອງ ແລະ ທັງເປັນການພົບປະແລກປ່ຽນບົດຮຽນກັບ ສພຂ ກໍຄືຜູ້ຊີ້ນຳວຽກງານຍຸຕິທຳ ແລະ ປກຊ-ປກສ ແລະ ຮັບຟັງການລາຍງານຫຍໍ້ຂອງອົງການໄອຍະການປະຊາຊົນແຂວງ, ສານປະຊາຊົນແຂວງ, ປກສ ແຂວງ ແລະ ພະແນກຍຸຕິທຳແຂວງ ໃນການຈັດຕັ້ງປະຕິບັດວຽກງານຢູ່ໃນຂົງເຂດທີ່ຕົນຮັບຜິດຊອບ.

        ທ່ານປະທານກໍາມາທິການຍຸຕິທໍາ ໄດ້ມີຄໍາເຫັນໂອ້ລົມ ເຊິ່ງໄດ້ເນັ້ນໃຫ້ຄະນະກຳມະການຍຸຕິທຳ ແລະ ປກຊ-ປກສ ແລະ ພາກສ່ວນກ່ຽວຂ້ອງ ພ້ອມກັນເອົາໃຈໃສ່ໃນການຈັດຕັ້ງປະຕິບັດລັດ ຖະທຳມະນູນ ແລະ ກົດໝາຍ ໂດຍສະເພາະໃນຂົງເຂດທີ່ຕົນຮັບຜິດຊອບ, ຈົ່ງພ້ອມກັນແກ້ໄຂບັນ ດາບັນຫາປາກົດການຫຍໍ້ທໍ້ທີ່ເກີດຂຶ້ນຢູ່ໃນສັງຄົມ ໃຫ້ຫລຸດໜ້ອຍຖອຍລົງເທື່ອລະກ້າວ.

(ບຸນນຳ ແພງສີແກ້ວ)