ມອບ-ຮັບໜ້າທີ່ລະຫວ່າງປະທານກໍາມາທິການບັນດາເຜົ່າ ຊຸດທີ VIII ແລະ IX

11/05/2021 00:00 -

       (ສພຊ) ຕອນບ່າຍຂອງວັນທີ 1 ເມສາ 2021 ທີ່ຫ້ອງປະຊຸມຄະນະປະຈໍາສະພາແຫ່ງຊາດຊັ້ນ 5 (ສະພາແຫ່ງຊາດ ທາດຫລວງ) ກໍາມາທິການບັນດາເຜົ່າ ໄດ້ຈັດພິທີມອບ-ຮັບໜ້າທີ່ປະທານກໍາມາທິການບັນດາເຜົ່າ ລະຫວ່າງທ່ານ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າສະພາແຫ່ງຊາດ ຊຸດທີ VIII ແລະ ທ່ານ ຄໍາຈັນ ໂສຕາປະເສີດ ປະທານກໍາມາທິການບັນດາເຜົ່າສະພາແຫ່ງຊາດ ຊຸດທີ IX  ເຂົ້າຮ່ວມໂດຍທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ຊຸດທີ VIII ຜູ້ຊີ້ນໍາວຽກງານກໍາມາທິການບັນດາເຜົ່າ, ມີບັນດາຮອງປະທານກໍາມາທິການທັງເກົ່າ ແລະ ໃໝ່, ຄະນະກົມ, ຄະນະພະແນກຕະຫລອດຮອດພະນັກງານ-ລັດຖະກອນ ພາຍໃນກໍາມາທິການເຂົ້າຮ່ວມ.

       ຈຸດປະສົງຂອງການຈັດພິທີມອບ-ຮັບໜ້າທີ່ໃນຄັ້ງນີ້ ເພື່ອເປັນການເຂົ້າຮ່ວມ ແລະ ເປັນສັກຂີພິຍານຕໍ່ການມອບ-ຮັບໜ້າທີ່ຕໍາແໜ່ງປະທານກໍາມາທິການ ເຊິ່ງເປັນໜ້າທີ່ໆມີກຽດອັນສູງສົ່ງຂອງກໍາມາທິການບັນດາເຜົ່າສະພາແຫ່ງຊາດ ແລະ ເປັນຊ່ວງຕໍ່ທີ່ສໍາຄັນຢ່າງຍິ່ງ ລະຫວ່າງກໍາມາທິການບັນດາເຜົ່າສະພາແຫ່ງຊາດ ຊຸດທີ VIII ແລະ ກໍາມາທິການບັນດາເຜົ່າສະພາແຫ່ງຊາດ ຊຸດທີ IX.

       ໃນພິທີ, ຜູ້ເຂົ້າຮ່ວມໄດ້ຮັບຟັງການສະຫລຸບວຽກງານການເຄື່ອນໄຫວຂອງກໍາມາທິການບັນການບັນດາເຜົ່າສະພາແຫ່ງຊາດ ຊຸດທີ VIII ພ້ອມທັງໄດ້ກ່າວມອບໜ້າທີ່ຂອງປະທານກໍາມາທິການຜູ້ເກົ່າ ແລະ ການສະເໜີແຜນການເຄື່ອນໄຫວຕໍ່ໜ້າໂດຍຫຍໍ້ ແລະ ການກ່າວຮັບໜ້າທີ່ຂອງປະທານກໍາມາທິການບັນດາເຜົ່າສະພາແຫ່ງຊາດ ຊຸດທີ IX.

       ໂອກາດດັ່ງກ່າວ, ຍັງໄດ້ຮັບຟັງການໂອ້ລົມໃຫ້ທິດເຍືອງທາງຂອງທ່ານ ແສງນວນ ໄຊຍະລາດ ໂດຍທ່ານໄດ້ຍ້ອງຍໍຊົມເຊີຍຕໍ່ຜົນງານການຊີ້ນໍາ-ນຳພາທີ່ກໍາມາທິການບັນດາເຜົ່າຊຸດຜ່ານມາຍາດມາໄດ້ ເປັນຕົ້ນແມ່ນຍາດໄດ້ໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ແລະ ຜົນງານອື່ນໆທີ່ພົ້ນເດັ່ນ; ພ້ອມທັງຮຽກຮ້ອງໃຫ້ປະທານກໍາມາທິການ ແລະ ຮອງປະທານກໍາມາທິການບັນດາເຜົ່າຜູ້ເກົ່າທີ່ຈະອອກພັກຜ່ອນບໍານານໃຫ້ສືບຕໍ່ປະກອບສ່ວນເຂົ້າໃນການໃຫ້ຄໍາປຶກສາລືຕໍ່ວຽກງານບັນດາເຜົ່າ ຕາມຄວາມເໝາະສົມ ແລະ ສະເໜີກໍາມາທິການບັນດາເຜົ່າຊຸດໃໝ່ ຈົ່ງສືບຕໍ່ຮັກສາມູນເຊື້ອຜົນງານທີ່ຍາດມາໄດ້ ແລະ ເສີມຂະຫຍາຍມູນເຊື້ອທີ່ໂດດເດັ່ນຂອງການນໍາພາຂອງປະທານກໍາມາການບັນດາເຜົ່າຊຸດຜ່ານມາ ແລະ ໃຫ້ພະນັກງານ-ລັດຖະກອນທຸກຄົນ ຕັ້ງໜ້າເຝິກຝົນຫລໍ່ຫລອມຕົນເອງ, ສຶກສາຮໍ່າຮຽນຄົ້ນຄວ້າດຸໝັ່ນຂະຫຍັນພຽນ ເພື່ອພັດທະນາຕົນເອງໃຫ້ມີສັກກະຍາພາບໃນການປະຕິບັດໜ້າທີ່, ສິດ ແລະ ພາລະບົດບາດໃນການເປັນເສນາທິການໃຫ້ແກ່ກໍາມາທິການບັນດາເຜົ່າ ກໍຄືຄະນະປະຈໍາສະພາແຫ່ງຊາດ.

                                                                   ແຫຼ່ງຂ່າວທີ່ມາ: ສະພາແຫ່ງຊາດ