ສະພາປະຊາຊົນ 8 ແຂວງພາກເໜືອຂອງລາວ ແລະສະພາປະຊາຊົນນະຄອນ ໂຮ່ຈີມິງ ສຳມາະນາແລກປ່ຽນບົດຮຽນເຊິ່ງກັນ ແລະກັນ

27/03/2018 00:00 -

ປະທານສະພາປະຊາຊົນນະຄອນ ໂຮ່ ຈີ ມິງ ສສ.ຫວຽດນາມ ແລະ ສະຫາຍ ສາຍສະໝອນ ຄົມທະວົງ ຮອງເລຂາພັກແຂວງ, ປະທານສະພາປະຊາຊົນແຂວງຫລວງພະບາງ; ເຂົ້າຮ່ວມມີສະຫາຍ ສົມພັນ ແພງຄຳມີ ກຳມະການສູນກາງພັກ, ຮອງປະທານສະພາແຫ່ງຊາດ, ມີບັນດາທ່ານຮອງປະທານສະພາປະຊາຊົນແຂວງ, ຄະນະປະຈຳສະພາປະຊາຊົນຂັ້ນແຂວງ, ສະມາຊິກສະພາປະຊາຊົນ 8 ແຂວງພາກເໜືອ ເຂົ້າຮ່ວມທັງໝົດ 165 ທ່ານ ຍິງ 37 ທ່ານ.

          ຈຸດປະສົງຂອງກອງປະຊຸມສຳມະນາໃນຄັ້ງນີ້  ເພື່ອເປັນການແລກປ່ຽນບົດຮຽນລະຫວ່າງສອງອົງການນິຕິບັນຍັດ ເພື່ອເປັນການເປີດໂອກາດໃຫ້ແກ່ຄະນະຜູ້ແທນຂັ້ນສູງສະພາປະຊາຊົນນະຄອນ ໂຮ່ ຈີ ມິງ ສສ. ຫວຽດນາມ ກັບສະມາຊິກສະພາປະຊາຊົນ 8 ແຂວງພາກເໜືອຂອງ ສປປລາວ ໄດ້ພົບປະແລກປ່ຽນບົດຮຽນ ແລະ ປະສົບການເຊິ່ງກັນ ແລະ ກັນ ເພື່ອຍົງສູງຄວາມຮູ້ຄວາມສາມາດໃນການຈັດຕັ້ງປະຕິບັດພາລະບົດບາດສິດ ແລະ ໜ້າທີ່ຂອງສະມາຊິກສະພາປະຊາຊົນຂັ້ນແຂວງ ໃຫ້ມີປະສິດທິພາບ ແລະ ປະສິດທິຜົນຫລາຍກວ່າເກົ່າ, ຫົວຂໍ້ທີ່ນຳມາແລກປ່ຽນບົດຮຽນມີຄື: ກອງປະຊຸມສະພາປະຊາຊົນ, ປະສົບການໃນການເຄື່ອນໄຫວຂອງຄະນະກຳມະການເສດຖະກິດ-ງົບປະມານ, ປະສົບການໃນການເຄື່ອນໄຫວຂອງຄະນະກຳມະການກົດໝາຍ, ປະສົບການໃນການເຄື່ອນໄຫວຂອງຄະນະກຳມະການຕົວເມືອງ, ປະສົບການໃນການເຄື່ອນໄຫວຂອງຄະນະກຳມະການວັດທະນະທຳ-ສັງຄົມ ຂອງສະພາປະຊາຊົນນະຄອນ ໂຮ່ ຈີ ມິງ ສສ.ຫວຽດນາມ.

          ກອງປະຊຸມສຳມະນາແລກປ່ຽນບົດຮຽນໃນຄັ້ງນີ້ ມີຄວາມໝາຍສຳຄັນຫລາຍດ້ານ ເພາະຢູ່ໃນໄລຍະທີ່ພັກ-ລັດຖະບານ ແລະ ອົງການນິຕິບັນຍັດຂອງລາວ ກຳລັງສຸມໃສ່ສ້າງ ແລະ ປັບປຸງນິຕິກຳ, ກົນໄກ, ແບບແຜນການນຳພາ, ແຜນບໍລິຫານ-ການຄຸ້ມຄອງ ກໍຄືແບບແຜນວິທີເຮັດວຽກຂອງກົງຈັກການຈັດຕັ້ງຂອງອົງການລັດນັບທັງຂັ້ນສູນກາງ ແລະ ຂັ້ນທອງຖິ່ນ ຊ່ວຍເຮັດໃຫ້ສະມາຊິກສະພາປະຊາຊົນຂັ້ນແຂວງມີບົດຮຽນເຂົ້າໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງສະມາຊິກສະພາປະຊາຊົນຂັ້ນແຂວງ.

ກອງປະຊຸມໄດ້ດຳເນີນ ດ້ວຍບັນຍາກາດຟົດຟື້ນ, ມີເນື້ອໃນທີ່ໜັກແໜ້ນ, ມີການສົນທະນາແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງສະພາປະຊາຊົນ 8 ແຂວງພາກເໜືອ ແລະ ສະພາປະຊາຊົນນະຄອນ ໂຮ່ ຈີ ມິງ ສສ.ຫວຽດນາມ, ຜູ້ແທນເຂົ້າຮ່ວມກອງປະຊຸມ ໄດ້ພ້ອມກັນຍົກສູງຄວາມຮັບຜິດຊອບໂດຍສຸມໃສ່ການຕັ້ງຄຳຖາມສົນທະນາແລກປ່ຽນໃນແຕ່ລະຫົວຂໍ້ ອັນໄດ້ເຮັດໃຫ້ເນື້ອໃນກອງປະຊຸມມີລັກສະນະກະທັດຮັດ, ເລິກເຊິ່ງ. ການຈັດກອງປະຊຸມຄັ້ງນີ້ ເປັນທັງການເສີມຂະຫຍາຍມູນເຊື້ອອັນດີງາມຂອງພັກ, ຂອງລັດ ແລະ ການຮ່ວມມືແບບພິເສດຂອງລາວ ແລະ ຫວຽດນາມເວົ້າລວມ, ເວົ້າສະເພາະແມ່ນສະພາປະຊາຊົນຂັ້ນແຂວງຂອງລາວ ແລະ ສະພາປະຊາຊົນນະຄອນ ໂຮ່ ຈີ ມິງ ສສ.ຫວຽດນາມ.

ນາງ ສຸພາວະດີ ພັນນະສີ