ຮອງປະທານກຳມາທິການຍຸຕິທຳ ສະພາແຫ່ງຊາດ ເຄື່ອນໄຫວເຮັດວຽກຢູ່ແຂວງອັດຕະປື

04/04/2018 00:00 -

ວັນທີ 26 ມີນາ 2018,  ທ່ານ ກົງຈີ ຢ່າງຈື ຮອງປະທານກໍາມາທິການຍຸຕິທໍາ ສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ເຮັດວຽກຢູ່ແຂວງອັດຕະປື. ໂອກາດດັ່ງກ່າວ ຄະນະ ໄດ້ເຮັດວຽກຮ່ວມກັບການນຳຂອງແຂວງອັດຕະປື ເພື່ອຮັບຟັງການລາຍງານສະພາບໂດຍຫຍໍ້ຂອງແຂວງ ແລະ ສືບຕໍ່ເຮັດວຽກຮ່ວມກັບສະພາປະຊາຊົນແຂວງ (ສພຂ) ພ້ອມດ້ວຍພະແນກການກ່ຽວຂ້ອງຂອງແຂວງ ທີ່ນອນຢູ່ໃນຂົງເຂດຍຸຕິທໍາ, ທີ່ຫ້ອງປະຊຸມ ສພຂ ມີຜູ້ເຂົ້າຮ່ວມທັງໝົດຈໍານວນ 20 ທ່ານ ຍິງ 7 ທ່ານ ໂດຍການຕ້ອນຮັບຂອງທ່ານ ແກ້ວວົງວຽນ ບຸດສະວົງ ຮອງປະທານ ສພຂ, ປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ເຊິ່ງໄດ້ຮັບຟັງບົດລາຍງານການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງຄະນະກໍາມະການຍຸຕິທໍາ ແລະ ປກຊ-ປກສ ຕະຫລອດໄລຍະ 1 ປີຜ່ານມາ. ພ້ອມທັງຍົກໃຫ້ເຫັນຫລາຍບັນຫາທີ່ສາມາດປະຕິບັດບັນລຸໄດ້ ແລະ ບາງດ້ານທີ່ຍັງເປັນຂໍ້ຄົງຄ້າງເພື່ອສະເໜີຕໍ່ທີ່ປະຊຸມ. ຈາກນັ້ນ, ກອງປະຊຸມຍັງໄດ້ຮັບຟັງການລາຍງານຈາກເຈົ້າໜ້າທີ່ສືບສວນ-ສອບສວນ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທໍາ. ນອກນັ້ນ, ຍັງໄດ້ຮັບຟັງການຕີລາຄາຄືນການປະຕິບັດໜ້າທີ່ຂອງຂົງເຂດປົກປ້ອງກົດໝາຍຈາກພະແນກກວດກາລັດ. ທ່ານຮອງປະທານກໍາມາທິການຍຸຕິທໍາ ສະພາແຫ່ງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນສໍາເລັດທີ່ຍາດມາໄດ້. ຄຽງຄູ່ໃນຜົນສໍາເລັດນັ້ນ ຍັງມີບາງບັນຫາທີ່ເປັນສິ່ງທ້າທາຍ ແລະ ຄວນຈະໄດ້ເອົາໃຈໃສ່ ເປັນຕົ້ນການສ້າງນິຕິກຳຂັ້ນທ້ອງຖິ່ນທີ່ຈະນຳເຂົ້າຜ່ານກອງປະຊຸມສະໄໝສາມັນຂອງ ສພຂ ແຕ່ລະຄັ້ງ ຕ້ອງໄດ້ມີການວິເຄາະວິໄຈຢ່າງລະອຽດ, ເລີ່ມຈາກບັນຫາທີ່ຈໍາເປັນ ແລະ ຜ່ານການທາບທາມເພື່ອຊອກຫາຜົນໄດ້, ຜົນກະທົບຕໍ່ການພັດທະນາຂອງແຂວງ. ຈາກນັ້ນ ຄະນະສະພາແຫ່ງຊາດ ແລະ ຄະນະ ສພຂ ໄດ້ຮ່ວມກັນລົງຕິດຕາມກວດກາຢ້ຽມຢາມການປະຕິບັດໜ້າທີ່ຂອງເຈົ້າໜ້າທີ່ຢູ່ພາຍໃນຄ້າຍຄຸມຂັງດັດສ້າງ ບ້ານສະເພົາ ເມືອງສາມັກຄີໄຊ ແຂວງອັດຕະປື ເພື່ອຮັບຟັງການລາຍງານສະພາບການຈັດຕັ້ງປະຕິບັດໃນໄລຍະຜ່ານມາ ແລະ ຢ້ຽມຢາມບ່ອນພັກເຊົາຫ້ອງຄຸມຂັງຂອງຜູ້ຖືກຫາ ແລະ ນັກໂທດ.

 (ທະນົງສັກ ສີຫຼວງສົດ)