ສະຖາບັນຄົ້ນຄວ້ານິຕິກຳສະພາແຫ່ງຊາດ ເຮັດວຽກຢູ່ ສະພາປະຊາຊົນແຂວງ ຫົວພັນ

06/04/2018 00:00 -

(ສພຊ)ວັນທີ 27 ມີນາ 2018, ທີ່ຫ້ອງປະຊຸມຄະນະປະຈຳ ສະພາປະຊາຊົນແຂວງ (ສພຂ) ຫົວພັນ ໄດ້ຈັດກອງປະຊຸມປຶກສາຫາລື ຮ່ວມກັບສະຖາບັນຄົ້ນຄວ້ານິຕິກຳ ສະພາແຫ່ງຊາດ (ສພຊ) ໂດຍການເຂົ້າຮວ່ມຂອງທ່ານ ຄຳວອນ ບຸນທະວົງ ປະທານ ສພຂ ຫົວພັນ, ທ່ານ ຄຳມ່ວນ ຊົມສີຫາປັນຍາ ຮອງຫົວໜ້າສະຖາບັນຄົ້ນຄວ້ານິຕິກຳ ສພຊ ພ້ອມດ້ວຍຄະນະ, ມີບັນດາທ່ານຄະນະປະຈຳ ສພຂ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ເພື່ອຄົ້ນຄວ້າ, ປຶກສາຫາລື ແລະ ເກັບກຳຂໍ້ມູນ ກ່ຽວກັບວຽກງານການຄົ້ນຄວ້າ, ວຽກງານເຝິກອົບຮົມ, ຂໍ້ມູນ-ຂ່າວສານ ແລະ ຫ້ອງສະໝຸດຢູ່ບັນດາເຂດເລືອກຕັ້ງໃນໄລຍະຜ່ານມາ ສພຂ ທີ່ໄດ້ຈັດຕັ້ງປະຕິບັດໄປແລ້ວ ແຕ່ຍັງພົບຄວາມຫຍຸ້ງຍາກ ແລະ ຢາກສະເໜີໃຫ້ສະພາແຫ່ງຊາດຈັດຊຸດເຝິກອົບຮົມໃນຫົວຂໍ້ໃດໜຶ່ງທີ່ເຫັນວ່າມີຄວາມຈຳເປັນ ແລະ ຮີບດ່ວນ ເພື່ອເປັນຂໍ້ມູນເບື້ອງຕົ້ນທີ່ຈະນຳໄປສະເໜີຕໍ່ຄະນະປະຈຳ ສພຊ ພິຈາລະນາ ແລະ ຈັດເຝິກອົບຮົມໃຫ້ສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ຕະຫລອດຮອດພະນັກງານວິຊາການ ນຳໄປຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ.

(ນັກຂ່າວສະພາເຂດ)