ກອງປະຊຸມກວດກາເນື້ອໃນ ຮ່າງກົດໝາຍວ່າດ້ວຍສະຫະພັນນັກຮົມເກົ່າລາວ

12/04/2018 00:00 -

 (ສພຊ) ວັນທີ 2 ເມສາ 2018, ກໍາມາທິການກົດໝາຍ ແລະ ກໍາມາທິການບັນດາເຜົ່າ ຮ່ວມກັບສູນກາງສະຫະພັນນັກຮົບເກົ່າແຫ່ງຊາດ ໄດ້ຈັດກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍສະຫະພັນນັກຮົບເກົ່າລາວ ທີ່ສູນກາງສະຫະພັນນັກຮົບເກົ່າແຫ່ງຊາດລາວ. ໂດຍການເປັນປະທານຮ່ວມຂອງທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ ສະພາແຫ່ງຊາດ, ທ່ານ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າ ສະພາແຫ່ງຊາດ ແລະ ທ່ານ ຄຳຜາງ ກອງຈັນແສງ ຮອງປະທານສະຫະພັນນັກຮົບເກົ່າແຫ່ງຊາດລາວ; ເຂົ້າຮ່ວມມີບັນດາທ່ານຮອງປະທານກໍາມາທິການ ຂອງສະພາແຫ່ງຊາດ, ຜູ້ຕາງໜ້າຈາກຫ້ອງວ່າການປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງຍຸຕິທໍາ, ບັນດາຫົວໜ້າ-ຮອງຫົວໜ້າກົມ ແລະ ລັດຖະກອນຈໍານວນໜຶ່ງ ຂອງສະພາແຫ່ງຊາດ ແລະ ສູນກາງສະຫະພັນນັກຮົບເກົ່າແຫ່ງຊາດລາວ.

ຮ່າງກົດໝາຍສະບັບນີ້ ປະກອບມີ 10 ພາກ, 4 ໝວດ ແລະ 56 ມາດຕາ ເຊິ່ງເປັນກົດໝາຍທີ່ສ້າງໃໝ່ ແລະ ເປັນການຜັນນຂະຫຍາຍຈາກມະຕິກົມການເມືອງສູນກາງພັກ ສະບັບເລກທີ 68-69/ກມສພ, ລົງວັນທີ 9 ກັນຍາ 2002 ວ່າດ້ວຍການສ້າງຕັ້ງ, ການຈັດຕັ້ງ ແລະ ການເຄື່ອນໄຫວຂອງສະຫະພັນນັກຮົບເກົ່າແຫ່ງຊາດລາວ ໂດຍໄດ້ຜ່ານການທາບທາມຕາມຂັ້ນຕອນຂອງການສ້າງ ແລະ ປັບປຸງກົດໝາຍ ເຊິ່ງໄດ້ຜ່ານກອງປະຊຸມລັດຖະບານມາແລ້ວ. ສະນັ້ນ, ເພື່ອເຮັດໃຫ້ເນື້ອໃນຂອງຮ່າງກົດໝາຍສະບັບນີ້ ມີຄວາມຈະແຈ້ງ ແລະ ຄົບຖ້ວນນັ້ນ ຄະນະປະຈໍາສະພາແຫ່ງຊາດ ຈຶ່ງໄດ້ມອບໃຫ້ກໍາມາທິການກົດໝາຍ ຮ່ວມກັບກໍາມາທິການບັນດາເຜົ່າ, ກວດກາຮອບດ້ານທາງດ້ານເຕັກນິກ, ຄວາມສອດຄ່ອງກັບລັດຖະທໍາມະນູນ ແລະ ກົດໝາຍ, ຮວມທັງຄວາມຈໍາເປັນ ແລະ ຄວາມສໍາຄັນຂອງການສ້າງກົດໝາຍສະບັບດັ່ງກ່າວ ເພື່ອລາຍງານຄືນໃຫ້ຄະນະປະຈໍາສະພາແຫ່ງຊາດ  ຕົກລົງນໍາເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ທີ່່ຈະຈັດຂຶ້ນໃນມໍ່ໆນີ້.

(ກົມໂຄສະນາ ແລະ ຕີຄວາມໝາຍກົດໝາຍ)