ປະທານ ກສຕສ ເຄື່ອນໄຫວເຮັດວຽກຢູ່ແຂວງຫຼວງນໍ້າທາ

12/04/2018 00:00 -

(ສພຊ) ລະຫວ່າງວັນທີ 31 ມີນາ-2 ເມສາ 2018,  ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວເຮັດວຽກຢູ່ແຂວງຫລວງນໍ້າທາ ເພື່ອຕິດຕາມກວດກາ ແລະ ຊຸກຍູ້ກ່ຽວກັບການຈັດຕັ້ງປະຕິບັດນະໂຍບາຍຊົດເຊີຍໃຫ້ແກ່ປະຊາຊົນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ໂຄງການກໍ່ສ້າງເຂື່ອນໄຟຟ້ານໍ້າຟ້າ ເພື່ອເປັນການເກັບກຳ ແລະ ສັງລວມຂໍ້ມູນພື້ນຖານເພື່ອລາຍງານໃຫ້ແກ່ຄະນະປະຈໍາສະພາແຫ່ງຊາດ.

ກອງປະຊຸມໄດ້ຮັບຟັງລາຍງານກ່ຽວກັບການຈັດຕັ້ງປະຕິບັດໂຄງການເຂື່ອນໄຟຟ້ານໍ້າຟ້າ 1 ເຊິ່ງໃຫ້ຮູ້ກ່ຽວກັບທີ່ຕັ້ງໂຄງການເຂື່ອນໄຟຟ້ານໍ້າຟ້າ 1 ຕັ້ງຢູ່ລະຫວ່າງເຂດແດນແຂວງຫລວງນໍ້າທາ ແລະ ແຂວງບໍ່ແກ້ວ ເຊິ່ງຢູ່ທາງພາກຕາເວັນຕົກສ່ຽງເໜືອຂອງ ສປປລາວ ເຂດແດນລະຫວ່າງທັງສອງແຂວງ ແມ່ນໄດ້ຖືເອົາສາຍນໍ້າຟ້າເປັນຫລັກ, ຈຸດຕັ້ງເຂື່ອນເບື້ອງຂວາແມ່ນຂຶ້ນກັບເມືອງລອງ ແຂວງຫລວງນໍ້າທາ ກວມເນື້ອທີ່ປະມານ 1.963 ເຮັກຕາ ແລະ ຕົວເຂື່ອນເບື້ອງຊ້າຍແມ່ນຂຶ້ນກັບເມືອງເມີງ ແຂວງບໍ່ແກ້ວ ກວມເອົາເນື້ອທີ່ປະມານ 6.647 ເຮັກຕາ ແລະ ມີພື້ນທີອ່າງນ້ຳຈະຖ້ວມປະມານ 8.610 ເຮັກຕາ ກວມເອົາ 2 ແຂວງ ເຊິ່ງໄດ້ກະທົບທາງກົງ ແລະ ທາງອ້ອມກັບບ້ານ ແລະ ປະຊາຊົນເມືອງລອງທັງໝົດ 9 ບ້ານຄື: ຈົງກາ, ມົ້ງລ້າ, ຈ່າເຂີນໃໝ່, ປຸ່ງລໍ, ຕ່າສຸ່ມ, ສົມປານຢ້າວເກົ່າ, ສົມປານຢ້າວໃໝ່, ຊຽງກົກເກົ່າ ແລະ ຊຽງກົກໃໝ່; ມີຜູ້ໄດ້ຮັບຜົນກະທົບທັງໝົດ ປະມານ 235 ຄົວເຮືອນ, 315 ຄອບຄົວ, 1.323 ຄົນ, ກະທົບທີ່ດິນນາປະມານ 159,74 ເຮັກຕາ, ໄຮ່ປະມານ 288,42 ເຮັກຕາ, ສວນ 43,58 ເຮັກຕາ, ດິນຈັບຈອງປະມານ 96,5 ເຮັກຕາ. ຫລັງຈາກນັ້ນ, ໄດ້ມີການແລກປ່ຽນຄໍາຄິດເຫັນຢ່າງກົງໄປກົງມາ ກ່ຽວກັບການຈັດຕັ້ງປະຕິບັດນະໂຍບາຍຊົດເຊີຍໃຫ້ແກ່ປະຊາຊົນທີ່ຖືກຜົນກະທົບໂຄງການກໍ່ສ້າງເຂື່ອນໄຟຟ້ານໍ້າຟ້າ 1.

ນອກຈາກນັ້ນ, ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດນະໂຍບາຍຊົດເຊີຍໃຫ້ແກ່ປະຊາຊົນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ໂຄງການກໍ່ສ້າງເຂື່ອນໄຟຟ້ານ້ຳຟ້າ, ການຈັດຕັ້ງປະຕິບັດວຽກງານຍົກຍ້າຍ-ຈັດຕັ້ງນະໂຍບາຍຊົດເຊີຍໃຫ້ແກ່ປະຊາຊົນທີ່ຖືກຜົນກະທົບຈາກເສັ້ນທາງລົດໄຟລາວ-ຈີນ ແລະ ໂຄງການກໍ່ສ້າງເຂື່ອນໄຟຟ້ານ້ຳຟ້າ, ສະພາບລວມການຈັດຕັ້ງປະຕິບັດໂຄງການກໍ່ສ້າງເຂື່ອນໄຟຟ້ານ້ຳຟ້າ ແລະ ໄດ້ມີການສະເໜີແລກປ່ຽນຄໍາຄິດຄໍາເຫັນກັນ ເພື່ອເຮັດໃຫ້ການຈັດຕັ້ງປະຕິບັດໂຄງການກໍ່ສ້າງດັ່ງກ່າວ ຖືກຕ້ອງສອດຄ່ອງກັບສະພາບຄວາມເປັນຈິງ ແລະ ຄະນະຈາກສະພາແຫ່ງຊາດ ຮ່ວມກັບສະພາປະຊາຊົນແຂວງ ຍັງໄດ້ຕິດຕາມກວດກາ ແລະ ພົບປະປະຊາຊົນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ເພື່ອເບິ່ງພື້ນທີ່ການກໍ່ສ້າງຕົວຈິງ.

(ນາງ ອຳພອນ ສີປະເສີດ)