ຄະນະເລຂາທິການສະພາແຫ່ງຊາດ ເຮັດວຽກຮ່ວມກັບຄະນະເລຂາທິການ ສພຂ ແຂວງ ຊຽງຂວາງ

12/04/2018 00:00 -

(ສພຊ) ວັນທີ 5 ເມສາ 2018, ທີ່ຫ້ອງປະຊຸມສະພາປະຊາຊົນແຂວງ (ສພຂ) ຊຽງຂວາງ ໄດ້ເປີດ ກອງປະຊຸມລະຫວ່າງຄະນະເລຂາທິການສະພາແຫ່ງຊາດ ກັບຄະນະເລຂາທິການ ສພຂ ຊຽງຂວາງ ໂດຍການ ເປັນປະທານຮ່ວມຂອງທ່ານ ນາງ ສວນສະຫວັນ ວິຍະເກດ ຄະນະປະຈຳສະພາແຫ່ງຊາດ, ເລຂາທິການສະພາ ແຫ່ງຊາດ ແລະ ທ່ານ ນາງ ພົມມາ ສິທິວົງສອນ ຮອງປະທານ ສພຂ ຊຽງຂວາງ; ມີບັນດາທ່ານຫົວໜ້າ-ຮອງ ຫົວໜ້າກົມ ຈາກສະພາແຫ່ງຊາດ, ມີຄະນະເລຂາທິການ ສພຂ, ຫົວໜ້າ-ຮອງຫົວໜ້າຂະແໜງ ແລະ ພະນັກງານ ສພຂ ເຂົ້າຮ່ວມ.

        ໃນວາລະດຳເນີນກອງປະຊຸມ ທ່ານຮອງປະທານ ສພຂ ໄດ້ກ່າວຕ້ອນຮັບທ່ານ ນາງ ສວນສະຫວັນ ວິຍະເກດ ພ້ອມດ້ວຍຄະນະ. ຈາກນັ້ນ, ທ່ານ ຄຳແພງ ທຳມະວອນ ຄະນະປະຈຳ, ເລຂາທິການ ສພຂ ຊຽງຂວາງ ໄດ້ລາຍງານການເຄື່ອນໄຫວວຽກງານຂອງຄະນະເລຂາທິການ ສພຂ ໃນໄລຍະຜ່ານມາ, ພ້ອມທັງລາຍງານສະພາບຂໍ້ສະດວກ ແລະ ຂໍ້ຫຍຸ້ງຍາກໃນການກະກຽມທາງດ້ານເນື້ອໃນ ເອກະສານຕ່າງໆ ໃຫ້ແກ່ກອງປະຊຸມສະໄໝສາມັນຂອງ ສພຂ, ໃນການກະກຽມສ້າງແຜນເຄື່ອນໄຫວວຽກງານໃຫ້ແກ່ສະມາຊິກສະພາ, ການເປັນເສນາທິການໃຫ້ແກ່ສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາ ຊົນແຂວງ; ທ່ານຍັງໄດ້ຍົກໃຫ້ຮູ້ເຖິງຄວາມຈຳເປັນ ໃນການຍົກສູງຄວາມຮູ້ຄວາມສາມາດໃຫ້ແກ່ພະນັກງານ-ວິຊາການຂອງ ສພຂ ໂດຍສະເພາະແມ່ນວຽກງານຄົ້ນຄວ້າສັງລວມ ແລະ ຂໍ້ມູນ-ຂ່າວສານ, ວຽກງານຈັດຕັ້ງພະນັກງານ, ບໍລິຫານພິທີການ, ວຽກງານການເງິນ,  ຍົກໃຫ້ເຫັນຂໍ້ສະດວກຂໍ້ຫຍຸ້ງຍາກໃນການປະສານງານລະຫວ່າງ ສພຂ ກັບອົງການບໍລິຫານ, ອົງການຕຸລາການ. ຫລັງຈາກນັ້ນ, ຜູ້ເຂົ້າຮ່ວມກອງປະຊຸມ ຍັງໄດ້ຍົກບັນຫາເພື່ອປຶກສາ ແລກປ່ຽນບົດຮຽນເຊິ່ງກັນ ແລະ ກັນ, ພ້ອມກັນປະກອບຄໍາຄິດຄໍາເຫັນຢ່າງກົງໄປກົງມາ.

ໃນຕ້ອນທ້າຍ, ທ່ານ ນາງ ສວນສະຫວັນ ວິຍະເກດ ໄດ້ສັງລວມເນື້ອໃນກອງປະຊຸມກ່ຽວກັບບັນຫາທີ່ນຳ ມາປຶກສາແລກປ່ຽນນັ້ນໃຫ້ຄວາມກະຈ່າງແຈ້ງ, ໃຫ້ທິດຊີ້ນຳ ແລະ ຈະນຳເອົາໄປຄົ້ນຄວ້ານຳຄະນະປະຈຳສະພາ ແຫ່ງຊາດ ເພື່ອຫາວິທີທາງປັບປຸງຍົກສູງຄຸນນະພາບໃຫ້ພະນັກງານ-ວິຊາການດີຂຶ້ນເທື່ອລະກ້າວ.

(ບຸນສີ ສິດທິເດດ)