12/04/2018 00:00 -

(ສພຊ) ວັນທີ 5 ​ເມສາ 2018, ກໍາມາທິການກົດໝາຍ ​ແລະ ກໍາມາ​ທິການຍຸຕິ​ທໍາ ສະພາແຫ່ງຊາດ ຮ່ວມ​ກັບກະຊວງ​ຍຸຕິ​ທໍາ ໄດ້ຈັດກອງປະຊຸມກວດກາ​ເນື້ອ​ໃນ​ຮອບດ້ານ ຮ່າງ​ກົດໝາຍວ່າ​ດ້ວຍການ​ແກ້​ໄຂ​ຂໍ້​ຂັດ​ແຍ່ງ​ທາງ​ດ້ານ​ເສດຖະກິດ (ສະບັບປັບປຸງ), ທີ່ຫ້ອງ​ປະຊຸມ​ສູນ​ກາງ​ແນວ​ລາວ​ສ້າງ​ຊາດ ນະຄອນຫລວງວຽງຈັນ, ໂດຍການເປັນປະທານຂອງທ່ານ ສົມ​ພັນ ​ແພງ​ຄໍາ​ມີ ຮອງ​ປະທານສະພາແຫ່ງຊາດ; ເຂົ້າຮ່ວມມີບັນດາປະທານ-ຮອງປະທານກໍາມາ​ທິການ ຂອງສະພາແຫ່ງຊາດ, ຮອງ​ລັດຖະມົນຕີ​ກະຊວງ​ຍຸຕິ​ທໍາ, ຜູ້​ຕາງໜ້າຈາກ​ຫ້ອງ​ວ່າການ​ປະທານ​ປະ​ເທດ, ຫ້ອງ​ວ່າການ​ສໍານັກງານ​ນາຍົກລັດຖະມົນຕີ, ​ບັນດາ​ຫົວໜ້າ-ຮອງ​ຫົວໜ້າກົມ, ຫົວໜ້າສູນ​ແກ້​ໄຂຂໍ້​ຂັດ​ແຍ່ງ​ທາງ​ດ້ານ​ເສດຖະກິດ ​ແລະ ລັດຖະກອນ ຈໍານວນໜຶ່ງ ຂອງ​ສະພາ​ແຫ່ງ​ຊາດ ​ແລະ ກະຊວງຍຸຕິ​ທໍາ.

ຮ່າງ​ກົດໝາຍສະບັບ​ນີ້ ປະກອບມີ XI ພາກ, 7 ໝວດ ​ແລະ 84 ມາດຕາ. ​ໃນ​ນັ້ນ, ປັບປຸງ 53 ມາດຕາ,   ​ເພີ່ມ​ໃໝ່ 12 ມາດຕາ ​ແລະ ຮັກສາ​ເດີມ 19 ມາດຕາ ​ໂດຍໄດ້​ຜ່ານ​ການທາ​ບທາມຕາມ​ຂັ້ນ​ຕອນ​ຂອງ​ການ​ສ້າງ ​ແລະ ປັບປຸງ​ກົດໝາຍ ​ແລະ ​ໄດ້​ຜ່ານ​ກອງ​ປະຊຸມ​ລັດຖະບານ​ມາ​ແລ້ວ. ສະ​ນັ້ນ​, ເພື່ອ​ເຮັດ​ໃຫ້​ເນື້ອ​ໃນຂອງຮ່າງ​ກົດໝາຍສະບັບນີ້  ມີ​ຄວາມ​ຈະ​ແຈ້ງ ​ແລະ ຄົບ​ຖ້ວນນັ້ນ, ຄະນະ​ປະ​ຈໍາ​ສະພາ​ແຫ່ງ​ຊາດ ຈຶ່ງ​ໄດ້​ມອບ​ໃຫ້​ກໍາມາ​ທິການ​ກົດໝາຍ ຮ່ວມ​ກັບກໍາມາ​ທິການຍຸຕິ​ທໍາ ​ກວດກາຮອບດ້ານທາງ​ດ້ານ​ເຕັກນິກ, ຄວາມ​ສອດຄ່ອງ​ກັບ​ລັດຖະທໍາ​ມະນູນ ​ແລະ ກົດໝາຍ, ລວມທັງ​ຄວາມ​ຈໍາ​ເປັນ ​ແລະ ຄວາມ​ສໍາຄັນຂ​ອງການປັບປຸງກົດໝາຍສະບັບ​ດັ່ງກ່າວ ​ເພື່ອ​ລາຍ​ງານ​ຄືນ​ໃຫ້​ຄະນະ​ປະ​ຈໍາ​ສະພາ​ແຫ່ງ​ຊາດ ພິຈາລະນາ​ເອົາ​ເຂົ້າ​ໃນ​ວາລະກອງ​ປະຊຸມ​ສະ​ໄໝສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ທີ່​ຈະ​ຈັດ​ຂຶ້ນ​ໃນ​ມໍ່ໆນີ້.

(ກົມໂຄສະນາ ແລະ ຕີຄວາມໝາຍກົດໝາຍ)