ເລຂາທິການສະພາແຫ່ງຊດ ເນັ້ນຄະນະເລຂາທິການ ສພຂ ໄຊສົມບູນ ເອົາໃຈໃສ່ຫຼາຍບັນຫາ

14/05/2018 00:00 -

ຮຽບຮຽງໂດຍ: ນາງ ສຸມົນທາ ງາໄຊ

          ສພຊ: ເມື່ອບໍ່ດົນຜ່ານມາ, ທ່ານ ນາງ ສວນສະຫວັນ ວິຍະເກດ ກໍາມະການສໍາຮອງສູນກາງພັກ, ຄະນະປະຈໍາ, ເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຮ່ວມກັບສະພາປະຊາຊົນແຂວງ (ສພຂ) ໄຊສົມບູນ ເຊິ່ງກ່ອນອື່ນທ່ານໃຫ້ຮູ້ວ່າ: ປີ 2018 ເປັນໄລຍະເວລາກ້າວເຂົ້າສູ່ປີທີ 3 ຂອງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ເຂົ້າສູ່ວຽກງານຕົວຈິງຂອງບັນດາອົງການຈັດຕັ້ງລັດ ໃຫ້ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້, ເປັນປີທີສອງການຈັດຕັ້ງປະຕິບັດແຜນການ 5 ປີຂອງສະພາແຫ່ງຊາດ ແລະ ເປັນໄລຍະເວລາຂອງການກ້າວເຂົ້າສູ່ກາງສະໄໝຂອງອາຍຸການຂອງສະພາແຫ່ງຊາດຊຸດທີ VIII, ສພຂ ເຊິ່ງພວກເຮົາມີພາລະໜ້າທີ່ອັນໜັກໜ່ວງ ທີ່ຈະຕ້ອງໄດ້ພ້ອມກັນສູ້ຊົນຈັດຕັ້ງປະຕິບັດໃຫ້ສໍາເລັດ. ສະນັ້ນ, ໃນໂອກາດທີ່ໄດ້ມາຮ່ວມປະຊຸມ ແລະ ເຮັດວຽກຮ່ວມກັບຄະນະເລຂາທິການ ສພຂ ໄຊສົມບູນ ໃນຄັ້ງນີ້ ຈຶ່ງຂໍມີບາງຄໍາຄິດຄໍາເຫັນ ເພື່ອເປັນທິດທາງໃນການເຄືື່ອນໄຫວວຽກງານໃນຕໍ່ໜ້າໃຫ້ໄດ້ຮັບຜົນດີດັ່ງນີ້:

          1. ແຂວງໄຊສົມບູນ ເປັນແຂວງທີ່ໄດ້ຮັບການສ້າງຕັ້ງໃໝ່ ຖ້າທຽບກັບແຂວງອື່ນໃນທົ່ວປະເທດ, ສພຂ ກໍເປັນກົງຈັກທີ່ສ້າງຕັ້ງຂຶ້ນໃໝ່ ຈຶ່ງມີຄວາມຮຽກຮ້ອງຕ້ອງການໃນການພັດທະນາດ້ານຕ່າງໆ ເປັນຕົ້ນດ້ານກົງຈັກການຈັດຕັ້ງ, ການປະກອບບຸກຄະລາກອນ, ການພັດທະນາພື້ນຖານໂຄງລ່າງ ເພື່ອສ້າງສິ່ງອໍານວຍຄວາມສະດວກໃຫ້ການເຄື່ອນໄຫວວຽກງານ. ແຕ່ເຖິງແນວໃດກໍຕາມ ຂໍໃຫ້ສະຫາຍເລຂາທິການ ສພຂ ໄຊສົມບູນ ພ້ອມດ້ວຍຄະນະ ລວມທັງພະນັກງານ-ລັດຖະກອນ ຂອງຄະນະເລຂາທິການ ສພຂ ຈົ່ງເຂົ້າໃຈວ່າ ບັນດາສະຫາຍທັງໝົດເປັນພະນັກງານທີ່ໄດ້ຮັບຄວາມໄວ້ວາງໃຈຈາກພັກ-ລັດ ໃຫ້ເປັນຜູ້ສ້າງສາ ແລະ ບູລະນະວຽກງານຂອງຄະນະເລຂາທິການ ສພຂ ໄຊສົມບູນ ເຊິ່ງເປັນໜ້າທີີ່ວຽກງານທີ່ມີຄວາມຫຍຸ້ງຍາກ ແຕ່ມີກຽດສະຫງ່າ ທີ່ໄດ້ຮັບຄວາມໄວ້ວາງໃຈຈາກການຈັດຕັ້ງພັກ-ລັດ ໃນວຽກງານດັ່ງກ່າວ. ຂ້າພະເຈົ້າມີຄວາມເຊື່ອໝັ້ນວ່າ ຜ່ານການເຄື່ອນໄຫວເຮັດສໍາເລັດໜ້າທີ່ວຽກງານທີ່ໄດ້ຮັບການມອບໝາຍນີ້ ບັນດາສະຫາຍຈະເປັນຜູ້ທີ່ມີບົດຮຽນ, ປະສົບປະການ ໃນການພັດທະນາວຽກງານສະພາປະຊາຊົນທ້ອງຖິ່ນຫລາຍກວ່າຜູ້ອື່ນ. ສະນັ້ນ, ຈຶ່ງຂໍໃຫ້ບັນດາສະຫາຍບຸກບືນສູ້ຊົນໃນການປະຕິບັດໜ້າທີ່ເປັນເສນາທິການໃຫ້ແກ່ ສພຂ ໄຊສົມບູນ, ຄະນະປະຈໍາ ສພຂ ໄຊສົມບູນ ໃຫ້ບັນລຸຜົນສໍາເລັດດ້ວຍຄຸນນະພາບນັບມື້ດີຂຶ້ນ.

          2. ໃນສະພາບແວດລ້ອມລວມດ້ານເສດຖະກິດຂອງປະເທດເຮົາ ຢູ່ໃນໄລຍະທີ່ພົບຄວາມຫຍຸ້ງຍາກ ບວກກັບສະພາບຄວາມຮຽກຮ້ອງຕ້ອງການໃນການພັດທະນາຂອງແຂວງເຮົາ, ສິ່ງທີ່ຄະນະເລຂາທິການ ສພຂ ໄຊສົມບູນ ຈະຕ້ອງໄດ້ເອົາໃຈໃສ່ ແມ່ນການເພີ່ມທະວີວຽກງານສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ລັດຖະກອນຂອງຕົນ ຢ່າງເປັນປົກກະຕິ, ຕໍ່ເນື່ອງ, ຫລາຍຮູບແບບ ດ້ວຍການຈັດຕັ້ງກອງປະຊຸມເຜີຍແຜ່ມະຕິ, ຄໍາສັ່ງ ແລະ ເອກະສານສໍາຄັນຂອງພັກ, ລັດ ໃຫ້ແກ່ພະນັກງານ-ລັດຖະກອນ ຕິດພັນກັບການຈັດຕັ້ງປາຖະກະຖາ ໃນໂອກາດວັນສໍາຄັນຂອງຊາດ ເພື່ອໃຫ້ພະນັກງານ-ລັດຖະກອນ ເຊື່ອມຊຶມ, ມີທັດສະນະຫລັກໝັ້ນການເມືອງໜັກແໜ້ນ, ຈໍາແນກໄດ້ມິດສັດຕູຢ່າງຈະແຈ້ງ, ຕັ້ງໜ້າປະຕິບັດໜ້າທີ່ວຽກງານທີ່ໄດ້ຮັບການມອບໝາຍ ດ້ວຍຜົນສໍາເລັດທີ່ດີ. ເອົາໃຈໃສ່ເຜີຍແຜ່ວຽກງານຂອງ ສພຂ ໃຫ້ພະນັກງານ-ລັດຖະກອນ ເຂົ້າໃຈຢ່າງເລິກເຊິ່ງ ໂດຍຍົກໃຫ້ເຫັນບົດບາດ, ຄວາມສໍາຄັນຂອງ ສພຂ ໃນຖານະທີ່ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າຂອງແຂວງ. ສະນັ້ນ, ການຮັບໃຊ້ວຽກງານດັ່ງກ່າວ ຈຶ່ງເປັນໜ້າທີ່ທີ່ມີກຽດ ໃນຖານະທີ່ເປັນພົນລະເມືອງຂອງແຂວງໄຊສົມບູນຜູ້ໜຶ່ງ.

          3. ຄະນະເລຂາທິການ ສພຂ ໄຊສົມບູນ ຈະຕ້ອງໄດ້ເອົາໃຈໃສ່ຍົກສູງຄຸນນະພາບ ການເປັນເສນາທິການດ້ານເນື້ອໃນ, ການສ້າງສິ່ງອໍານວຍຄວາມສະດວກ ໃຫ້ແກ່ການກະກຽມ ແລະ ດໍາເນີນກອງປະຊຸມ ສພຂ, ກອງປະຊຸມຄົບຄະນະຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃຫ້ນັບມື້ດີຂຶ້ນ.​ ຢາກເຮັດໄດ້ຄືແນວນັ້ນ, ຄະນະເລຂາທິການ ສພຂ ໄຊສົມບູນ ຈະຕ້ອງໄດ້ເພີ່ມທະວີການຊີ້ນໍາຂະແໜງການ, ພະນັກງານ-ລັດຖະກອນ ໃນການຄົ້ນຄວ້າ, ກໍາແໜ້ນເນື້ອໃນຂອງກົດໝາຍ ທີ່ກ່ຽວຂ້ອງກັບການດໍາເນີນກອງປະຊຸມ ສພຂ,​ ກອງປະຊຸມຄົບຄະນະຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ເກັບກໍາສະພາບພົ້ນເດັ່ນທີ່ເກີດຂຶ້ນຢູ່ພາຍໃນແຂວງຂອງຕົນ, ເກັບກໍາສັງລວມຄໍາຄິດຄໍາເຫັນ ແລະ ຄໍາສະເໜີຂອງປະຊາຊົນຜູ້ມີສິດເລືອກຕັ້ງ ຕໍ່ກັບການຄຸ້ມຄອງບໍລິຫານລັດ, ນໍາເອົາບັນຫາດັ່ງກ່າວມາຄົ້ນຄວ້າ, ວິເຄາະວິໄຈ ແລະ ກ້າວໄປສູ່ການກໍານົດຫົວຂໍ້ກອງປະຊຸມ ສພຂ ເພື່ອໃຫ້ອົງການປົົກຄອງແຂວງກະກຽມບົດລາຍງານ ຕໍ່ກັບບັນຫາພົ້ນເດັ່ນທີ່ເກີດຂຶ້ນໃນສັງຄົມ ຕໍ່ກອງປະຊຸມ ສພຂ ພິຈາລະນາຕົກລົງ ແລະ ເປັນບ່ອນອີງໃຫ້ຂະແໜງການກ່ຽວຂ້ອງຂອງແຂວງນໍາໄປຈັດຕັ້ງປະຕິບັດ. ຖ້າເຮັດໄດ້ຄືແນວນີ້ ຈະເຮັດໃຫ້ການດໍາເນີນກອງປະຊຸມ ສພຂ ໄຊສົມບູນ ສອດຄ່ອງກັບສະພາບຕົວຈິງ ແລະ ສາມາດແກ້ໄຂບັນຫາທີ່ເກີດຂຶ້ນຢູ່ທ້ອງຖິ່ນຕົນ.

          4. ໃນຕໍ່ໜ້າ ຄະນະເລຂາທິການ ສພຂ ໄຊສົມບູນ ຈະຕ້ອງໄດ້ເພີ່ມທະວີການເປັນເສນາທິການດ້ານຕ່າງໆໃຫ້ແກ່ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃນຖານະທີ່ເປັນກົງຈັກທີ່ຄະນະປະຈໍາສະພາແຫ່ງຊາດສ້າງຕັ້ງ ແລະ ເປັນກົງຈັກເສນາທິການໃຫ້ແກ່ຄະນະປະຈໍາສະພາແຫ່ງຊາດ, ທັງນີ້ ກໍເນື່ອງຈາກວ່າ ໃນໄລຍະຜ່ານມາ ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃນຖານະທີ່ເປັນກົງຈັກເສນາທິການໃຫ້ຄະນະປະຈໍາສະພາແຫ່ງຊາດ ຍັງບໍ່ທັນພົ້ນເດັ່ນ ແລະ ມີຜົນສໍາເລັດຕາມທີ່ກົດໝາຍກໍານົດ. ຕໍ່ກັບບັນຫາດັ່ງກ່າວ ສະເໜີໃຫ້ຄະນະເລຂາທິການ ສພຂ ໄຊສົມບູນ ເອົາໃຈໃສ່ຄົ້ນຄວ້າຫາສາເຫດ ແລະ ຊອກຫາວິທີການແກ້ໄຂ ເພື່ອເປັນຂໍ້ມູນສົມທົບກັບຄະນະຮັບຜິດຊອບວຽກງານເຂດເລືອກຕັ້ງ ປັບປຸງນິຕິກໍາວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃຫ້ມີເນື້ອໃນລະອຽດ, ຈະແຈ້ງ, ເຂົ້າໃຈງ່າຍຂຶ້ນຕື່ມ.

          5. ການບໍາລຸງຍົກລະດັບກ່ຽວກັບວຽກງານຂອງ ສພຂ ແລະ ວິຊາສະເພາະດ້ານຕ່າງໆ ໃຫ້ແກ່ພະນັກງານ-ລັດຖະກອນ ຂອງຄະນະເລຂາທິການ ສພຂ ໄຊສົມບູນ ເປັນວຽກງານທີ່ສໍາຄັນຫລາຍ, ທັງນີ້ ກໍເນື່ອງຈາກວ່າ  ຄະນະເລຂາທິການ ສພຂ ໄຊສົມບູນ ກໍເປັນອົງການຈັດຕັ້ງໃໝ່,​ ວຽກງານກໍໃໝ່, ບຸກຄະລາກອນກໍມີໜ້ອຍ ແຕ່ວຽກງານຊໍ້າພັດຫລາຍ. ສະນັ້ນ, ເພື່ອແກ້ໄຂບັນຫາດັ່ງກ່າວ ມີວິທີທາງດຽວຄື ການຍົກລະດັບໃຫ້ແກ່ພະນັກງານ ເພື່ອໃຫ້ມີຄວາມຮູ້ດ້ານວຽກງານຂອງ ສພຂ, ມີຄວາມຮູ້ດ້ານວິຊາສະເພາະ ຈຶ່ງຈະສາມາດນໍາໃຊ້ພະນັກງານ-ລັດຖະກອນຈໍານວນໜ້ອຍ ເພື່ອແກ້ໄຂວຽກງານຈໍານວນຫລາຍໃຫ້ສໍາເລັດໄດ້. ຕໍ່ກັບການຍົກລະດັບໃຫ້ພະນັກງານ-ລັດຖະກອນ ຄະນະເລຂາທິການສະພາແຫ່ງຊາດ ຈະໄດ້ຄົ້ນຄວ້າ ເພື່ອຊອກຫາວິທີການຊ່ວຍບັນດາສະຫາຍຕື່ມອີກ.

          6. ຜ່ານການຕິດຕາມການເຄື່ອນໄຫວວຽກງານຂອງຄະນະເລຂາທິການ ສພຂ ໃນໄລຍະຜ່ານມາ ເຫັນວ່າມີບາງວຽກງານ ແມ່ນຄະນະເລຂາທິການ ສພຂ ເປັນເສນາທິການໂດຍກົງໃຫ້ ສພຂ ແລະ ມີບາງວຽກງານ ແມ່ນຄະນະເລຂາທິການ ສພຂ ເປັນໃຈກາງໃນການປະສານງານກັບຄະນະເລຂາທິການສະພາແຫ່ງຊາດ, ບັນດາຄະນະກໍາມະການຂອງ ສພຂ, ອົງການປົກຄອງແຂວງ, ຂະແໜງການຕ່າງໆຂອງແຂວງ. ສະນັ້ນ, ຈຶ່ງເຫັນໄດ້ວ່າ ການປະສານວຽກງານຂອງຄະນະເລຂາທິການ ສພຂ ໄຊສົມບູນ ກັບພາກສ່ວນຕ່າງໆ ເປັນຂອດຕັດສິນຜົນສໍາເລັດຂອງການເປັນເສນາທິການ ໃຫ້ແກ່ ສພຂ ແລະ ຄະນະປະຈໍາ ສພຂ. ເພື່ອເຮັດໃຫ້ການປະສານງານມີບ່ອນອີງດ້ານນິຕິກໍາ ຈຶ່ງເຫັນວ່າການສ້າງນິຕິກໍາກ່ຽວກັບການປະສານງານ ລະຫວ່າງຄະນະເລຂາທິການ ສພຂ ໄຊສົມບູນ ກັບອົງການຈັດຕັ້ງພາຍໃນ ແລະ ອົງການຈັດຕັ້ງພາຍນອກ ມີຄວາມສໍາຄັນຫລາຍ.

          7. ການປະສານງານ ລະຫວ່າງຄະນະເລຂາທິການ ສພຂ ກັບຄະນະປະທານຄະນະກໍາມະການຂອງ ສພຂ  ເປັນບັນຫາໜຶ່ງທີ່ຫລາຍແຂວງພົບບັນຫາ ເປັນຕົ້ນຄະນະກໍາມະການໄດ້ມີການຊີ້ນໍາວຽກບໍລິຫານ, ແຜນການ, ການເງິນ ຕໍ່ບາງການເຄື່ອນໄຫວວຽກງານຂອງຄະນະກໍາມະການ ຈຶ່ງສ້າງຄວາມສັບສົນໃຫ້ແກ່ຜູ້ຈັດຕັ້ງປະຕິບັດ. ເພື່ອແກ້ໄຂບັນຫາດັ່ງກ່າວ ໃນຕໍ່ໜ້າສະເໜີໃຫ້ມີການປະສານສົມທົບຮ່ວມກັນ ລະຫວ່າງຄະນະປະທານຄະນະກໍາມະການ ກັບ ຄະນະເລຂາທິການ ສພຂ ເພື່ອປຶກສາຫາລືວຽກງານຕ່າງໆຮ່ວມກັນ ວຽກງານໃດທີ່ຢູ່ໃນຂອບເຂດຄວາມຮັບຜິດຊອບຂອງຄະນະເລຂາທິການ ສພຂ ເປັນຕົ້ນວຽກບໍລິຫານ, ແຜນການ, ການເງິນ ກໍມອບໃຫ້ກົງຈັກເສນາທິການຂອງຄະນະເລຂາທິການ ສພຂ ເປັນຜູ້ຈັດຕັ້ງປະຕິບັດ; ວຽກໃດທີ່ຢູ່ໃນຂອບເຂດວຽກງານຂອງຄະນະປະທານຄະນະກໍາມະການ ເປັນຕົ້ນວຽກງານດ້ານວິຊາສະເພາະ ກໍໃຫ້ຄະນະປະທານຄະນະກໍາມະການ ຊີ້ນໍາກົງຈັກເສນາທິການຂອງຕົນຈັດຕັ້ງປະຕິບັດ, ໝາຍຄວາມວ່າ ຊ່ວຍກັນຊີ້ນໍາໃນການຈັດຕັ້ງປະຕິບັດ ຕາມຂອບເຂດຄວາມຮັບຜິດຊອບຂອງແຕ່ລະພາກສ່ວນ, ອັນສໍາຄັນແມ່ນການປະສານສົມທົບວຽກງານຮ່ວມກັນ.

          8. ດ້ານງົບປະມານຮັບໃຊ້ໃຫ້ແກ່ການເຄື່ອນໄຫວວຽກງານຂອງ ສພຂ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໃນໄລຍະຜ່ານມາກໍມີຄວາມຫຍຸ້ງຍາກຈໍານວນໜຶ່ງ ແຕ່ເຖິງແນວໃດກໍຕາມ ຂໍໃຫ້ບັນດາສະຫາຍເຂົ້າໃຈວ່າ ໃນໄລຍະນີ້ສະພາບງົບປະມານການເງິນຂອງປະເທດ ຍັງຢູ່ໃນໄລຍະຫຍຸ້ງຍາກ. ແຕ່ເຖິງແນວໃດກໍຕາມ ຄະນະເລຂາທິການສະພາແຫ່ງຊາດ ກໍໄດ້ພະຍາຍາມແບ່ງປັນງົບປະມານຈໍານວນໜຶ່ງເທົ່າທີ່ມີ ເພື່ອແບ່ງໃຫ້ຄະນະເລຂາທິການ ສພຂ ຕ່າງໆ ລວມທັງແຂວງໄຊສົມບູນ ເພື່ອຊ່ວຍໃຫ້ແກ່ການເຄື່ອນໄຫວວຽກງານທີ່ຈໍາເປັນບາງດ້ານ. ແຕ່ເຖິງແນວໃດກໍຕາມ ຂໍໃຫ້ບັນດາສະຫາຍຖືສໍາຄັນການປະຢັດມັດທະຍັດຕື່ມອີກ.