ກຳມາທິການບັນດາເຜົ່າ ສະພາແຫ່ງຊາດ ເຄື່ອນໄຫວເຮັດວຽກຢູ່ແຂວງ ບໍ່ແກ້ວ

14/05/2018 00:00 -

(ສພຊ) ວັນທີ 2 ພຶດສະພາ 2018, ກໍາມາທິການບັນດາເຜົ່າ ສະພາແຫ່ງຊາດ ໄດ້ເຄື່ອນໄຫວເຮັດວຽກຢູ່ແຂວງບໍ່ແກ້ວ ເພື່ອຕິດຕາມກວດກາ ແລະ ເກັບກໍາຂໍ້ມູນສະພາບການຮຽນຂອງເດັກນ້ອຍ ຢູ່ໂຮງຮຽນກິນນອນຊົນເຜົ່າແຂວງບໍ່ແກ້ວ, ຕິດຕາມກວດກາວຽກງານສາສະໜາ ແລະ ຖອດຖອນບົດຮຽນກ່ຽວກັບການປະສານງານລະຫວ່າງ ສະພາປະຊາຊົນຂັ້ນແຂວງ (ສພຂ) ກັບແນວລາວສ້າງຊາດ ແລະ ອົງການຈັດຕັ້ງມະຫາຊົນ. ຈາກນັ້ນ, ໄດ້ຮ່ວມກັບຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສພຂ ເປີດກອງປະຊຸມປຶກສາຫາລືແລກປ່ຽນຂໍ້ມູນກ່ຽວກັບວຽກງານບັນດາເຜົ່າ ຢູ່ທີ່ຫ້ອງປະຊຸມ ສພຂ ບໍ່ແກ້ວ ໂດຍການເປັນປະທານຂອງທ່ານ ຄໍາຈັນ ໂສຕາປະເສີດ ຮອງປະທານກໍາມາທິການບັນດາເຜົ່າ ສະພາແຫ່ງຊາດ ແລະ ທ່ານ ລີຕຸເລັ່ງ ຈົງເຕັງ ຄະນະປະຈໍາ ສພຂ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ເຂົ້າຮ່ວມມີຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ຄະນະເລຂາທິການ ສພຂ, ຜູ້ຕາງໜ້າອົງການແນວລາວສ້າງຊາດ, ພະແນກພາຍໃນແຂວງ, ພະແນກສຶກສາທິການ ແລະ ກິລາ, 3 ອົງການຈັດຕັ້ງມະຫາຊົນ ຕະຫລອດຮອດພະນັກງານຄະນະກໍາມະການວັດທະນະທໍາ-ສັງຄົມ ສພຂ ເຂົ້າຮ່ວມ.

ໃນກອງປະຊຸມ ແຕ່ລະພາກສ່ວນທີ່ເຂົ້າຮ່ວມ ໄດ້ລາຍງານສະພາບການໂດຍຫຍໍ້ ກ່ຽວກັບວຽກງານທີ່ຕົນຮັບຜິດຊອບ; ວຽກງານການສຶກສາ ຈາກການລາຍງານຂອງພະແນກສຶກສາທິການ ແລະ ກິລາແຂວງ ທີ່ໄດ້ລາຍງານສະພາບລວມຂອງໂຮງຮຽນກິນນອນຊົນເຜົ່າແຂວງເຫັນວ່າມີດ້ານດີຫລາຍດ້ານ ແຕ່ກໍຍັງມີບາງຂໍ້ຄົງຄ້າງທີ່ຈະຕ້ອງໄດ້ແກ້ໄຂ ເປັນຕົ້ນຍັງມີນ້ອງນັກຮຽນຈໍານວນໜຶ່ງເວົ້າ, ຟັງ, ອ່ານ, ຂຽນພາສາລາວຍັງບໍ່ທັນໄດ້ດີເທົ່າທີ່ຄວນ ແລະ ຍັງມີນັກຮຽນຈໍານວນໜຶ່ງປະລະການຮຽນກາງປີ ເຮັດໃຫ້ການສິດສອນບໍ່ໄປຕາມແຜນ; ອົງການແນວລາວສ້າງຊາດ ແລະ ພະແນກພາຍໃນແຂວງ ໄດ້ລາຍງານສະພາບທີ່ພົ້ນເດັ່ນ-ປາກົດການຫຍໍ້ທໍ້ຕ່າງໆກ່ຽວກັບສາສະໜາໄລຍະຜ່ານມາຢູ່ແຂວງບໍ່ແກ້ວ. ຈາກນັ້ນ, ຄະນະຕິດຕາມໄດ້ມີຄໍາຖາມເຈາະຈີ້ມຕໍ່ບົດລາຍງານ ແລະ ແລກປ່ຽນຄໍາຄິດຄໍາເຫັນຕໍ່ບັນດາພະແນກການ, ທັງໄດ້ຮັບຟັງການອະທິບາຍ, ຊີ້ແຈງຕໍ່ບັນຫາດັ່ງກ່າວ ຈາກຜູ້ຕາງໜ້າບັນດາພະແນກການ. ໃນຕອນທ້າຍກອງປະຊຸມ ຮອງປະທານກໍາມາທິການບັນດາເຜົ່າ ໄດ້ມີຄໍາເຫັນຕໍ່ທີ່ປະຊຸມເພື່ອແກ້ໄຂ ແລະ ໃຫ້ທິດຊີ້ນໍາ ໃຫ້ແຕ່ລະພາກສ່ວນປະສານສົມທົບກັບພາກສ່ວນທີ່ກ່ຽວຂ້ອງ ແກ້ໄຂບັນຫາດັ່ງກ່າວ ໃຫ້ຖືກຕ້ອງຕາມລະບຽບການ ພ້ອມທັງກ່າວຂອບໃຈຕໍ່ທີມງານ ສພຂ ທີ່ໄດ້ໃຫ້ການຕ້ອນຮັບຢ່າງອົບອຸ່ນ.

ຫລັງຈາກສໍາເລັດກອງປະຊຸມ ຮອງປະທານກໍາມາທິການບັນດາເຜົ່າ ພ້ອມດ້ວຍຄະນະ ໄດ້ເດີນທາງໄປເບິ່ງສະພາບການເປັນຢູ່ຂອງນັກຮຽນຢູ່ໂຮງຮຽນກິນນອນຊົນເຜົ່າແຂວງບໍ່ແກ້ວ. ຈາກນັ້ນ, ໄດ້ພົບປະໂອ້ລົມນໍາທ່ານ ສົມພອນ ແກ້ວວິໄລ ຜູ້ອໍານວຍການໂຮງຮຽນກິນນອນຊົນເຜົ່າ ເພື່ອຮັບຟັງການລາຍງານສະພາບການຄຸ້ມຄອງ, ບໍລິຫານ ແລະ ນະໂຍບາຍດ້ານຕ່າງໆຕໍ່ເດັກນັກຮຽນ. ຜ່ານການລາຍງານສະພາບການດັ່ງກ່າວ ເຫັນວ່າພົບຄວາມສະດວກ ແລະ ຫຍຸ້ງຍາກຫລາຍບັນຫາ, ແຕ່ມີຂໍ້ສະດວກນັ້ນຍ້ອນການເອົາໃຈໃສ່ຊຸກຍູ້ສົ່ງເສີມຈາກຂັ້ນເທິງ ແລະ ໄດ້ຮັບການສະໜັບສະໜູນຊ່ວຍເຫລືອຈາກບັນດາອົງການຕ່າງໆ ທັງພາຍໃນ ແລະ ຕ່າງປະເທດ; ນອກຈາກມີອັດຕາເບ້ຍລ້ຽງຂອງນັກຮຽນແລ້ວ ທາງໂຮງຮຽນ ກໍຄືທາງຄູ-ອາຈານ ຍັງໄດ້ນໍາພານ້ອງນັກຮຽນເພີ່ມພູນຜະລິດຜົນ ປູກຝັງລ້ຽງສັດເຮັດໃຫ້ນັກຮຽນມີຢູ່ມີກິນທີ່ດີຂຶ້ນ ແລະ ບາງສ່ວນກໍນໍາເອົາໄປຂາຍເພື່ອສ້າງລາຍຮັບໃຫ້ໂຮງຮຽນ, ສ່ວນຂໍ້ຫຍຸ້ງຍາກໃນທີ່ນີ້ກໍຄື ເງິນເບ້ຍລ້ຽງຂອງນັກຮຽນຕໍ່າແຕ່ຄ່າຄອງຊີບສູງ ແລະ ຄ່ານໍ້າ, ຄ່າໄຟ ກໍເພີ່ມຂຶ້ນ; ສະນັ້ນ ທາງອໍານວຍການໂຮງຮຽນ ຈຶ່ງໄດ້ສະເໜີຕໍ່ຮອງປະທານກໍາມາທິການບັນດາເຜົ່າ ປະສານງານກັບພາກສ່ວນທີ່ກ່ຽວຂ້ອງ ຂໍໃຫ້ເພີ່ມເງິນອັດຕາກິນຂອງນັກຮຽນຈາກເດີມ 200.000 ກີບຕໍ່ຄົນຕໍ່ເດືອນ ເປັນ 250.000 ກີບຕໍ່ຄົນຕໍ່ເດືອນ ແລະ ສະເໜີຂໍໃຫ້ສ້າງສະໂມສອນຂອງໂຮງຮຽນເພື່ອເປັນບ່ອນເຕົ້າໂຮມນ້ອງນັກຮຽນ ໃນເວລາຈັດກິດຈະກໍາຕ່າງໆ.

ຈາກນັ້ນ, ທ່ານຮອງປະທານກໍາມາທິການບັນດາເຜົ່າ ໄດ້ໃຫ້ຄໍາເຫັນ, ຊີ້ແຈງຕໍ່ບັນຫາດັ່ງກ່າວ ແລະ ຮັບຮູ້ຕໍ່ຄໍາສະເໜີດັ່ງກ່າວ ເພື່ອໄປລາຍງານຄືນໃຫ້ຄະນະປະຈໍາສະພາແຫ່ງຊາດ ນໍາເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ທີ່ຈະຈັດຂຶ້ນໃນມໍ່ໆນີ້.

(ຄໍາພັນ ໄຊຍະປະທຸມ)