ປະທານກຳມາທິການບັນດາເຜົ່າ ສະພາແຫ່ງຊາດ ເຄື່ອນໄຫວເຮັດວຽກຢູ່ແຂວງສາລະວັນ

14/05/2018 00:00 -

(ສພຊ) ຕອນເຊົ້າຂອງວັນທີ 4 ພຶດສະພາ 2018, ສະພາປະຊາຊົນແຂວງ (ສພຂ) ສາລະວັນ ຈັດກອງປະຊຸມຮ່ວມກັບກໍາມາທິການບັນດາເຜົ່າ ສະພາແຫ່ງຊາດ, ທີ່ຫ້ອງປະຊຸມສະໂມສອນແຂວງ (ຊັ້ນ 1); ໂດຍການເປັນປະທານຂອງທ່ານ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າ; ໂດຍການຕ້ອນຮັບຂອງທ່ານ ສົມເລັດ ຈຸລະມະນີ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 14 ແຂວງສາລະວັນ, ທັງເປັນປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສພຂ; ເຂົ້າຮ່ວມມີທ່ານ ຄໍາເຫຼັກ ອິນດາວົງ ປະທານ ສພຂ ສາລະວັນ; ມີຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 14, ຕາງໜ້າຈາກແນວລາວສ້າງຊາດແຂວງ, ພະແນກສຶກສາທິການ ແລະ ກິລາແຂວງ, ພະແນກພາຍໃນແຂວງ, 3 ອົງການຈັດຕັ້ງມະຫາຊົນ ພ້ອມດ້ວຍພະນັກງານ-ວິຊາການ ຂອງ ສພຂ ສາລະວັນ ເຂົ້າຮ່ວມ.

ໃນກອງປະຊຸມ ທ່ານ ສົມເລັດ ຈຸລະມະນີ ໄດ້ລາຍງານສະພາບການຈັດຕັ້ງປະຕິບັດໂດຍຫຍໍ້ ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ກ່ຽວກັບຂອດການປະສານງານລະຫວ່າງ ສພຂ ສາລະວັນ ກັບແນວລາວສ້າງຊາດ ແລະ 3 ອົງການຈັດຕັ້ງມະຫາຊົນ, ໂດຍປະຕິບັດຕາມພາລະບົດບາດໃນການຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດນະໂຍບາຍຊົນເຜົ່າ, ສາສະໜາ; ສະແດງໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ ທີ່ຈະຕ້ອງປັບປຸງແກ້ໄຂຂອງ ສພຂ ໃນຂອດການປະສານງານ, ການລາຍງານກັບແນວລາວສ້າງຊາດ ແລະ 3 ອົງການຈັດຕັ້ງມະຫາຊົນ. ນອກນັ້ນ, ຍັງໄດ້ຮັບຟັງການລາຍງານສະພາບການທີ່ພົ້ນເດັ່ນ ແລະ ປາກົດການຫຍໍ້ທໍ້ກ່ຽວກັບວຽກງານສາສະໜາ ຈາກອົົງການແນວລາວສ້າງຊາດແຂວງ ແລະ ຮັບຟັງການລາຍງານສະພາບລວມໂດຍຫຍໍ້ຂອງໂຮງຮຽນກິນນອນຊົນເຜົ່າຂອງແຂວງ ຈາກພະແນກສຶກສາທິການ ແລະ ກິລາແຂວງ; ພ້ອມກັນນັ້ນ ຍັງໄດ້ຮັບຟັງການປະກອບຄໍາເຫັນຢ່າງກົງໄປກົງມາໂດຍຕາງໜ້າຈາກ 3 ອົງການຈັດຕັ້ງມະຫາຊົນ ແລະ ພະແນກພາຍໃນແຂວງ.

ໂອກາດດຽວກັນ, ທ່ານ ນາງ ບົວພັນ ລີໄກຢາ ໄດ້ມີຄໍາເຫັນໂອ້ລົມຕໍ່ຜູ້ເຂົ້າຮ່ວມກອງປະຊຸມວ່າ: ວຽກງານການສຶກສາ ໃຫ້ພະແນກສຶກສາທິການ ແລະ ກິລາແຂວງ ຈົ່ງເອົາໃຈໃສ່ດ້ານຄຸນນະພາບການສຶກສາ ແລະ ສິດສອນເດັກນັກຮຽນໃຫ້ຮັບຮູ້ພາສາກາງສູງຂຶ້ນກວ່າເກົ່າ; ຂອດການປະສານງານລະຫວ່າງ ສພຂ ສາລະວັນ ກັບພາກສ່ວນທີ່ກ່ຽວຂ້ອງ ຄວນມີການເຜີຍແຜ່ ພາລະບົດບາດ, ສິດ ແລະ ໜ້າທີ່ຂອງກັນ ແລະ ກັນ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງ  ພ້ອມທັງຈັດຕັ້ງປະຕິບັດລະບອບປະຊຸມ ສ່ອງແສງລາຍງານປະຈໍາເດືອນກັນຢ່າງເປັນປົກກະຕິ.

ຫລັງຈາກນັ້ນ, ຄະນະກໍາມາທິການບັນດາເຜົ່າ ສະພາແຫ່ງຊາດ ພ້ອມດ້ວຍທີມງານ ແລະ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ສະມາຊິກສະພາປະຊາຊົນແຂວງ ໄດ້ໄປຢ້ຽມຢາມໂຮງຮຽນກິນນອນຊົນເຜົ່າ ເພື່ອຕິດຕາມ ກວດກາ ແລະ ເກັບກໍາຂໍ້ມູນ ສະພາບການຮຽນຂອງເດັກນັກຮຽນ; ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ສັງທອງ ອາດວິໄລ ຮັກສາການແທນຜູ້ອໍານວຍການໂຮງຮຽນກິນນອນຊົນເຜົ່າແຂວງ ພ້ອມດ້ວຍຄູ-ອາຈານ ແລະ ນ້ອງນັກຮຽນ, ຈາກນັ້ນ ກໍໄດ້ລາຍງານສະພາບການຄຸ້ມຄອງ, ການບໍລິຫານ ແລະ ນະໂຍບາຍຕໍ່ນັກຮຽນຢູ່ໂຮງຮຽນດັ່ງກ່າວ ເຊິ່ງມີຂໍ້ສະດວກ-ຂໍ້ຫຍຸ້ງຍາກ ແລະ ບັນຫາສິ່ງທ້າທາຍ ເປັນຕົ້ນ: ຄຸນນະພາບຂອງການສຶກສາ, ອັດຕາການປະລະການຮຽນໃນແຕ່ລະສົກປີ ແລະ ອື່ນໆ.

ທ່ານ ນາງ ບົວພັນ ລີໄກຢາ ໄດ້ໂອ້ລົມຕໍ່ບັນດາຄູ-ອາຈານ ແລະ ນັກຮຽນ; ກ່ອນອື່ນທ່ານໄດ້ສະແດງຄວາມຂອບໃຈ ມາຍັງບັນດາຄູ-ອາຈານ ແລະ ນ້ອງນັກຮຽນ ທີ່ໄດ້ຕ້ອນຮັບຢ່າງອົບອຸ່ນ ແລະ ທ່ານໄດ້ສະແດງຄວາມຊົມເຊີຍຕໍ່ການລາຍງານໂດຍສັງເຂບ ຕໍ່ຜົນງານທີ່ຍາດໄດ້ພົ້ນເດັ່ນໃນຫລາຍດ້ານ ເປັນຕົ້ນ: ການຄຸ້ມຄອງ ແລະ ບໍລິຫານໄດ້ຢ່າງມີປະສິດທິຜົນສູງ, ທ່ານໄດ້ຮຽກຮ້ອງຕື່ມໃຫ້ຄູ-ອາຈານຈົ່ງນໍາພາການຮຽນ, ການສິດສອນ, ການເຄື່ອນໄຫວຕ່າງໆ ໃຫ້ໄດ້ທັງປະລິມານ ແລະ ຄຸນນະພາບ ໂດຍຜັນຂະຫຍາຍຕາມແຜນຍຸດທະສາດຂອງກະຊວງສຶກສາທິການ ແລະ ກິລາ ກໍຄືຂອງພະແນກສຶກສາທິການ ແລະ ກິລາແຂວງ ທີ່ໄດ້ວາງອອກ; ສືບຕໍ່ແກ້ໄຂຫລຸດຜ່ອນການປະລະການຮຽນຂອງນັກຮຽນ, ສືບຕໍ່ເອົາໃຈໃສ່ສຶກສາອົບຮົມໃຫ້ນ້ອງນັກຮຽນບໍ່ສ້າງຄອບຄົວກ່ອນໄວອັນຄວນ, ສືບຕໍ່ສິດສອນໃຫ້ເດັກນັກຮຽນໃຫ້ຮັບຮູ້ ແລະ ເຂົ້າໃຈສັບພາສາກາງໃຫ້ຫລາຍຂຶ້ນກວ່າເກົ່າ; ຕອນທ້າຍທ່ານຍັງໄດ້ນໍາເອົາເຄື່ອງໃຊ້ຈໍານວນໜຶ່ງ ປະກອບສ່ວນຊ່ວຍເຫລືອໂຮງຮຽນກິນນອນຊົນເຜົ່າ ເພື່ອມອບໃຫ້ນ້ອງນັກຮຽນໄດ້ນໍາໃຊ້.

(ດີລໍາພົນ ພົມມະຈັນ)