ກຳມະບານຮາກຖານ ກຳມາທິການຍຸຕິທຳ ຈັດຕັ້ງຂໍ້ແຂ່ງຂັນ 5 ເປັນເຈົ້າ

14/05/2018 00:00 -

(ສພຊ) ກໍາມະບານຮາກຖານກໍາມາທິການຍຸຕິທໍາ (ກມຍທ) ສະພາແຫ່ງຊາດ ໄດ້ຈັດຕັ້ງປະ ຕິບັດຄໍາແນະນໍາເນື້ອໃນຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານສະພາແຫ່ງຊາດ ໃນຕອນ ເຊົ້າວັນທີ 4 ພຶດສະພາຜ່ານມາ ທີ່ສະພາແຫ່ງຊາດ; ໂດຍການເປັນປະທານຂອງທ່ານ ນາງ ບົວຄຳ ທິບພະວົງ ເລຂາໜ່ວຍພັກຮາກຖານ ກມຍທ, ປະທານ ກມຍທ; ເຂົ້າຮ່ວມມີທ່ານ ພອນແກ້ວ ຕົ້ນວໍລະຈິດ ຮອງປະທານສະຫະພັນກໍາມະບານສະພາແຫ່ງຊາດ, ມີບັນດາທ່ານຮອງປະທານກໍາ ມາທິການ, ຄະນະກໍາມະບານຮາກຖານ ແລະ ສະມາຊິກກໍາມະບານພາຍໃນກໍາມາທິການ.

          ກອງປະຊຸມຄັ້ງນີ້ ເພື່ອເສີມຂະຫຍາຍກໍາລັງແຮງຂອງສະມາຊິກກໍາມະບານ, ພະນັກງານ-ລັດຖະກອນ ພາຍໃນ ກມຍທ ໃຫ້ເປັນເຈົ້າການ, ມີສະຕິຕື່ນຕົວ, ຫ້າວຫັນໃນການປະຕິບັດໜ້າທີ່ ວຽກງານ ແລະ ພັດທະນາຕົນເອງຢ່າງຮອບດ້ານ, ປະກອບສ່ວນໃນການຈັດຕັ້ງປະຕິບັດແຜນການ ເຄື່ອນໄຫວວຽກງານຂອງສະພາແຫ່ງຊາດເວົ້າລວມ, ເວົ້າສະເພາະແມ່ນການປະຕິບັດພາລະບົດ ບາດ ແລະ ໜ້າທີ່ວິຊາສະເພາະຂອງຕົນໃຫ້ສໍາເລັດ ໂດຍຜ່ານຂະບວນການແຂ່ງຂັນ 5 ເປັນເຈົ້າ; ເພື່ອໃຫ້ ສາມາດກໍາໄດ້ເນື້ອໃນລວມ, ມາດຕະຖານ ແລະ ບາດກ້າວໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ທີ່ສະຫະພັນກໍາມະບານສະພາແຫ່ງຊາດວາງອອກ ແນໃສ່ສ້າງຄວາມເປັນເອກະພາບ ໃນ ການຊີ້ນໍາ-ນໍາພາ, ຊຸກຍູ້, ຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 5 ເປັນ ເຈົ້າ.

        ກອງປະຊຸມໄດ້ເຜີຍແຜ່, ເຊື່ອມຊຶມກ່ຽວກັບເນື້ອໃນ ແລະ ເອກະສານທີ່ກ່ຽວຂ້ອງຄື: ບົດສະ ຫລຸບການເຄື່ອນໄຫວຂອງກໍາມະບານຮາກຖານກໍາມາທິການຍຸຕິທໍາ ໃນໄລຍະປີ 2017 ຜ່ານມາ ແລະ ທິດທາງການເຄື່ອນໄຫວຕໍ່ໜ້າ ປະຈໍາປີ 2018; ຂໍ້ຕົກລົງວ່າດ້ວຍການກໍານົດກົງຈັກການ ຈັດຕັ້ງ ແລະ ການແບ່ງຄວາມຮັບຜິດຊອບ ຂອງກໍາມະບານຮາກຖານ ກມຍທ ແລະ ຄໍາແນະນໍາ ກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າຂອງກໍາມະບານຮາກຖານ ກມຍທ; ຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຂໍ້ແຂ່ງຂັນ 5 ເປັນເຈົ້າ; ພ້ອມທັງເປີດຂະບວນ ການແຂ່ງຂັນ 5 ເປັນເຈົ້າ.

ກອງປະຊຸມຍັງໄດ້ຮັບຟັງການໂອ້ລົມຈາກເລຂາໜ່ວຍພັກຮາກຖານ ກມຍທ ໂດຍທ່ານ ໄດ້ເນັ້ນໃຫ້ສະມາຊິກກໍາມະບານ ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະຂອງຕົນ ພ້ອມທັງເອົາໃຈໃສ່ເປັນເຈົ້າການຕໍ່ເນື້ອໃນ, ມາດຕະຖານ ແລະ ເງື່ອນໄຂຂອງກໍາມະບານ 5 ເປັນເຈົ້າ ທີ່ສະຫະພັນກາໍມະບານສະພາແຫ່ງຊາດວາງອອກ ໃຫ້ມີຄວາມເປັນເອກະພາບ.

(ສົມນຶກ ແກ້ວໄຊຍະຈັກ)