ປະທານກໍາມາທິການ ປກຊ-ປກສ ສະພາແຫ່ງຊາດ ເຄື່ອນໄຫວເຮັດວຽກຢູ່ແຂວງສາລະວັນ

15/05/2018 00:00 -

ທີ່ຫ້ອງປະຊຸມສະໂມສອນແຂວງ ໂດຍການເປັນປະທານຂອງທ່ານ ພົຈວ. ຄໍາສຸກ ວີອິນທະ ວົງ ຄະນະປະຈໍາສະພາແຫ່ງຊາດ, ປະທານກໍາມາທິການ ປກຊ-ປກສ; ເຂົ້າຮ່ວມມີທ່ານ ນາງ ສູນໄຖ ໄຊຍະແສງ ຄະນະປະຈໍາ ສພຂ, ຮອງປະທານ ສພຂ, ສສຊ ເຂດ 14 ທີ່ເປັນກໍາມະການຂອງກໍາມາທິການປກຊ-ປກສ ສະພາແຫ່ງຊາດ, ປະທານ-ຮອງປະທານ ແລະ ຄະນະກໍາມະການຍຸຕິທໍາ ແລະ ປກຊ-ປກສ, ຄະນະກອງບັນຊາການ ທະຫານແຂວງ,​ ປກສ ແຂວງ ແລະ ວິຊາການສະພາປະຊາຊົນແຂວງ.

ໃນກອງປະຊຸມ, ທ່ານ ພົຈວ. ຄໍາສຸກ ວິອິນທະວົງ ໄດ້ຮັບຟັງການລາຍງານໂດຍຫຍໍ້ກ່ຽວກັບການເຄື່ອນ ໄຫວຈັດຕັ້ງປະຕິບັດວຽກງານໃນໄລຍະ 1 ປີຜ່ານມາ, ຈາກທ່ານ ສຸກສະຫວັນ ຈັນທິສຸກ ຄະນະປະຈໍາສະພາປະຊາ ຊົນແຂວງ, ປະທານຄະນະກໍາມະການຍຸຕິທໍາ ແລະ ປກຊ-ປກສ ແລະ ທິດທາງໃນຕໍ່ໜ້າ; ພ້ອມນັ້ນກໍໄດ້ຮັບຟັງ ລາຍງານກ່ຽວກັບການແກ້ໄຂຄໍາຮ້ອງຂໍຄວາມເປັນທໍາ ແລະ ກົນໄກການປະສານງານລະຫວ່າງຄະນະກໍາມະການກັບ ກໍາລັງ ປກຊ-ປກສ ເຊິ່ງຈາກການລາຍງານໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ສະດວກ ແລະ ຂໍ້ຫຍຸ້ງຍາກໃນການ ຈັດຕັ້ງປະຕິບັດ ວຽກງານໃນໄລຍະຜ່ານມາ ພ້ອມທັງແລກປ່ຽນບົດຮຽນບາງບັນຫາໃນການແກ້ໄຂຄໍາຮ້ອງຂໍຄວາມ ເປັນທໍາ ແລະ ຂອດການປະສານງານ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າດີຂຶ້ນເລື້ອຍໆ.

ຈາກນັ້ນ ໃນຕອນບ່າຍຂອງວັນດຽວກັນທ່ານປະທານກໍາມາທິການ ປກຊ-ປກສ ພ້ອມດ້ວຍຄະນະ ໄດ້ລົງ ເຄື່ອນໄຫວພົບປະຢ້ຽມຢາມ ແລະ ເຮັດວຽກຢູ່ກອງບັນຊາກອງທະຫານແຂວງ ໂດຍການຕ້ອນຮັບຂອງ ທ່ານ ພົຈວ. ພູວຽງ ຫຼ່ຽມມະວົງສາ ກໍາມະການພັກແຂວງ, ຫົວໜ້າກອງບັນຊາການທະຫານແຂວງ, ມີທ່ານ ຄໍາເຫຼັກ ອິນດາວົງ ປະທານ ສພຂ, ມີບັນດາທ່ານຮອງປະທານ ສພຂ, ປະທານຄະນະກໍາມະການຍຸຕິທໍາ ແລະ ປກຊ-ປກສ, ຄະນະ ກອງບັນຊາການທະຫານແຂວງ, ນາຍ ແລະ ພົນທະຫານ ວິຊາການສະພາປະຊາຊົນແຂວງແຂວງເຂົ້າຮ່ວມ.

ໃນກອງປະຊຸມ, ທ່ານ  ພົຈວ. ພູວຽງ ຫຼ່ຽມມະວົງສາ ໄດ້ລາຍງານສະພາບລວມການເຄື່ອນໄຫວຂອງກໍາ ລັງປະກອບອາວຸດທ້ອງຖິ່ນຂອງແຂວງສາລະວັນ ໃນໄລຍະຜ່ານມາ ເຊິ່ງເຫັນໄດ້ວ່າທົ່ວແຂວງມີຄວາມສະຫງົບ, ມີ ການຫັນລົງກໍ່ສ້າງຮາກຖານ ແລະ ເຄື່ອນໄຫວຕິດຕາມກວດກາຕາມຄວາມຮັບຜິດຊອບເປັນຫຼັກ, ໄດ້ເອົາໃຈໃສ່ ປັບປຸງກໍ່ສ້າງກໍາລັງໃຫ້ມີຄວາມໜັກແໜ້ນທາງດ້ານການເມືອງແນວຄິດເປັນຕົ້ນຕໍ, ໄດ້ເອົາໃຈໃສ່ປັບປຸງກໍ່ສ້າງ ແລະ ຂະຫຍາຍໜ່ວຍພັກໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ສາມາດປະຕິບັດລະບຽບກົດ ໝາຍ ກໍຄືຂໍ້ກໍານົດຂອງກອງທັບໄດ້ດີ ໂດຍຖືເອົາກົດໝາຍຂອງລັດ, ວິໄນຂອງພັກຕິດພັນຢ່າງແໜ້ນກັບຂໍ້ກໍານົດ ນົດລະບຽບຂອງກອງທັບເປັນບ່ອນອີງທີ່ຂາດບໍ່ໄດ້ໃນ ການຊີ້ນໍາ-ບັນຊາກໍາລັງປະກອບອາວຸດ. ຈາກນັ້ນຍັງໄດ້ລາຍ ງານກ່ຽວກັບແຜນການຕໍ່ໜ້າໃຫ້ທ່ານປະທານກໍາມາທິການ ປກຊ-ປກສ.

ໃນວັນທີ 8 ພຶດສະພາ 2018 ທ່ານ ພົຈວ. ຄໍາສຸກ ວິອິນທະວົງ ພ້ອມດ້ວຍຄະນະ ໄດ້ລົງເຮັດວຽກຢູ່ ກອງ ບັນຊາການ ປກສ ແຂວງ ໂດຍການຕ້ອນຮັບຂອງ ທ່ານ ພັອ. ພູວັນ ນາຊຽງຄໍາ ກໍາມະການພັກແຂວງຫົວໜ້າກອງ ບັນຊາການ ປກສ ແຂວງ ມີຄະນະກອງບັນຊາການ ປກສ ແຂວງ, ນາຍ ແລະ ພົນຕໍາຫຼວດເຂົ້າຮ່ວມ.

ໃນກອງປະຊຸມ, ທ່ານ ພັອ. ພູວັນ ນາຊຽງຄໍາ ໄດ້ລາຍການສະພາບລວມການເຄື່ອນໄຫວການຈັດຕັ້ງປະຕິ ບັດໜ້າທີ່ວຽກງານຢູ່ກອງບັນຊາການໂດຍຫຍໍ້ ເຊິ່ງໄດ້ຍົກໃຫ້ເຫັນສະພາບຂອງກຸ່ມຄົນບໍ່ຫວັງດີທີ່ມີຕໍ່ແຂວງສາລະ ວັນ, ສະພາບການປະຕິບັດໜ້າທີ່ວຽກງານຂອງກອງບັນຊາການ,​ ດ້ານດີ, ດ້ານອ່ອນ, ຂໍ້ຄົງຄ້າງ ແລະ ທິດທາງ ໃນຕໍ່ໜ້າ.

ໃນກອງປະຊຸມ ທ່ານ ພົຈວ. ຄໍາສຸກ ວິອິນທະວົງ ໄດ້ມີຄໍາເຫັນໂອ້ລົມ ແລະ ແລກປ່ຽນຕໍ່ກອງປະຊຸມ ເຊິ່ງ ທ່ານກໍໄດ້ສະແດງຄວາມຊົມເຊີຍຕໍ່ກອງບັນຊາການ ປກຊ-ປກສ ທີ່ໄດ້ສະໜອງຂໍ້ມູນຮອບດ້ານໃຫ້ຄະນະທີມງານ ໃນຄັ້ງນີ້ ເຊິ່ງການລົງເລິກຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດປກຊ-ປກສ ແມ່ນເພື່ອສືບຕໍ່ປັບປຸງຄຸນນະພາບຂອງການນໍາໃຫ້ນັບມື້ນັບດີຂຶ້ນເລື້ອຍໆ ເພາະກໍາລັງທີ່ຕັດສິນຄວາມໝັ້ນຄົງຂອງ ຊາດ ແມ່ນສອງກໍາລັງນີ້ ເຊິ່ງໄລຍະຜ່ານມາສາມາດກໍາໄດ້ສັດຕູກຸ່ມເປົ້າໝາຍ, ກຸ່ມຄົນບໍ່ຫວັງດີທີ່ຫວັງຈະສ້າງ ຄວາມປັ່ນປ່ວນ, ຄວາມບໍ່ສະຫງົບໃນທຸກດ້ານ ແລະຕໍ່ໄປໃຫ້ສືບຕໍ່ເຮັດໃຫ້ດີຕື່ມອີກ, ກໍາແໜ້ນໃຫ້ໄດ້, ວາງແຜນ ໃຫ້ຖືກຕ້ອງ, ກໍແໜ້ນແນວຄິດຊີ້ນໍາແນວທາງນະໂຍບາຍຂອງພັກໃນການຈັດຕັ້ງປະຕິບັດວຽກງານ, ເອົາໃຈໃສ່ດ້ານ ຄຸນທາດການເມືອງ, ອຸດົມການຂອງພັກ, ອຸດົມການຂອງກໍາລັງປະກອບອາວຸດ ຕິດພັນກັບບັ້ນດໍາເນີນຊີວິດການ ເມືອງປັບປຸງປົວແປງພາຍໃນກໍາລັງ ໃນນາມທີ່ເປັນກໍາລັງປ້ອງກັນຊາດປ້ອງກັນຄວາມສະຫງົບເພື່ອຮັບໃຊ້ປະຊາ ຊົນ. ຈາກນັ້ນທ່ານ ພ້ອມດ້ວຍຄະນະ ຍັງໄດ້ລົງເຄື່ອນໄຫວຢ້ຽມຢາມຄ້າຍຄຸມຂັງ-ດັດສ້າງນາໄຊຕື່ມອີກ.

(ນົກວິທະຍາ ພັນທະວົງ)