15/05/2018 00:00 -

(ສພຊ) ວັນທີ 3 ພຶດສະພາ 2018 ຢູ່ທີ່ຫ້ອງປະຊຸມສະພາປະຊາຊົນແຂວງ (ສພຂ) ຫລວງພະ ບາງ ໄດ້ຈັດກອງປະຊຸມຕິດຕາມ, ກວດກາ ແລະ ເກັບກໍາຂໍ້ມູນ ຂອງກໍາມາທິການບັນດາເຜົ່າ, ສະພາແຫ່ງຊາດ ໂດຍການເປັນປະທານຮ່ວມຂອງທ່ານ ຄໍາຈັນ ໂສຕາປະເສີດ ຮອງປະທານກໍາມາທິ ການບັນດາເຜົ່າ, ທ່ານ ບຸນສົມ ຄຸນມະນີ ຮອງປະທານ ສພຂ, ມີ ປະທານຄະນະກໍາມະການວັດທະນະ ທໍາ-ສັງຄົມ ແລະ ບັນດາເຜົ່າ, ສະມາຊິກສະພາແຫ່ງຊາດ ປະຈໍາເຂດເລືກຕັ້ງທີ 6, ຫົວໜ້າ-ຮອກງຫົວ ໜ້າພະແນກການຂອງແຂວງ, ແນວລາວສ້າງຊາດ ແລະ 3 ອົງການຈັດຕັ້ງມະຫາຊົນເຂົ້າຮ່ວມ.

ໃນກອງປະຊຸມ ໄດ້ຮັບຟັງການລາຍງານສະພາບຂອງໂຮງຮຽນກິນນອນຊົນເຜົ່າຂອງແຂວງ ຫລວງພະບາງ ຈາກພະແນກສຶກສາທິການ ແລະ ກິລາແຂວງ, ສະພາບທີ່ພົ້ນເດັ່ນ ແລະ ປະກົດການຫຍໍ້ ທໍ້ຕ່າງໆກ່ຽວກັບສາສະໜາ ໃນໄລຍະຜ່ານມາຈາກແນວລາວສ້າງຊາດແຂວງ ແລະ ການລາຍງານກ່ຽວ ກັບການປະສານງານ ລະຫວ່າງສະພາປະຊາຊົນແຂວງ ກັບແນວລາວສ້າງຊາດ ແລະ 3 ອົງການຈັດຕັ້ງ ມະຫາຊົນ; ກອງປະຊຸມໄດ້ມີການປະກອບຄໍາຄິດຄໍາເຫັນ, ຕີລາຄາວຽກງານສາສະໜາ ໃນໄລຍະຜ່ານ ມາ ຢູ່ແຂວງຫລວງພະບາງ; ຫລັງຈາກນັ້ນ ຜູ້ແທນກອງປະຊຸມ ນໍາໂດຍທ່ານ ຄໍາຈັນ ໂສຕາປະເສີດ, ພ້ອມດ້ວຍຄະນະ ໄດ້ລົງໄປຢ້ຽມຢາມ ແລະ ພົບປະຄູອາຈານ-ນ້ອງນັກຮຽນ ຢູ່ໂຮງຮຽນກິນນອນຊົນ ເຜົ່າສວນຫລວງ ຢູ່ທີ່ເມືອງຊຽງເງິນແຂວງຫຼວງພະບາງ;

 ໃນພິທີ, ທ່ານອໍານວຍການໂຮງຮຽນດັ່ງກ່າວ ໄດ້ລາຍງານສະພາບການການຄຸ້ມຄອງ, ບໍລິຫານ ແລະ ນະໂຍບາຍດ້ານຕ່າງໆຕໍ່ເດັກນັກຮຽນກິນນອນຊົນເຜົ່າວ່າ: ໂຮງຮຽນກິນນອນຊົນເຜົ່າສວນຫຼວງ ສ້າງຕັ້ງຂື້ນ ໃນປີ 1993 ເປັນໂຮງຮຽນມັດທະຍົມສົມບູນ ມີແຕ່ຊັ້ນ ມ.1 ຮອດ ມ.7, ມີຄູອາຈານ ທັງໝົດ 56 ທ່ານ ຍິງ 32 ທ່ານ, ມີນັກຮຽນທັງ​ໝົດ 740 ຄົນ ຍິງ 333 ຄົນ, ເປັນເຜົ່າກຶມມຸ 481 ຄົນ ຍິງ 223 ຄົນ, ມົ້ງອິວມ່ຽນ 128 ຄົນ ຍິງ 47​ຄົນ, ເຜົ່າລາວ 131 ຄົນ ຍິງ 63 ຄົນ; ເປົ້າໝາຍ ຮັບນັກຮຽນ ແມ່ນຮັບເອົາຜູ້ດ້ອຍໂອກາດ ກໍ້າພ້າ, ກໍາພອຍ, ເດັກທຸກຍາກ ຈາກ 7 ເມືອງພາຍໃນ ແຂວງຫລວງພະບາງ ຄື: ເມືອງຫລວງພະບາງ, ຊຽງເງິນ, ນານ, ພູຄູນ, ໂພນໄຊ, ປາກແຊງ ແລະ ຈອມເພັດ; ລະບົບການຮຽນ-ການສອນ ແມ່ນປະຕິບັດຕາມຫຼັກສູດຂອງກະຊວງສຶກສາ, ໄດ້ຮັບການຊີ້ ນໍາ-ນໍາພາ ຈາກພະແນກສຶກສາຢ່າງໃກ້ຊິດ, ມີລະບົບການຈັດຕັ້ງຄົບຊຸດໃນການນໍາພາແຕ່ລະຫຼັກສູດ, ມີຄູອາຈານພຽງພໍສໍາລັບສິດສອນໃນແຕ່ລະວິຊາ, ມີອາຄານຮຽນ, ຫໍພັກ ທີ່ພຽງພໍ, ມີເນື້ອທີ່ສໍາລັບທໍາ ການປູກຝັງ ແລະ ລ້ຽງສັດສໍາລັບໂຮງຮຽນ ເພື່ອເປັນສະບຽນອາຫານຮັບໃຊ້ໂຮງຮຽນ, ນອກຈາກນັ້ນ ຍັງໄດ້ຮັບ ໂຄງການຊ່ວຍເຫຼືອເດັກປະຈໍາແຂວງຫຼວງພະບາງ ໄດ້ສະໜອງຊ່ວຍອາຫານເພີ່ມ 2 ມື້ ຕໍ່ອາ ທິດ, ມື້ລະ 1 ຄາບ ແລະ ຊ່ວຍໃນການປິ່ນປົວນັກຮຽນເຈັບເປັນໃນເວລາເຂົ້າປິ່ນປົວຢູ່ໂຮງໝໍ; ຄຽງຄູ່ ກັນນັ້ນ ໂຮງຮຽນຍັງມີຂໍ້ຫຍຸ້ງຍາກຫຼາຍພໍສົມຄວນເປັນຕົ້ນ: ອາຄານສໍາລັບຮຽນ, ຫໍພັກນັກຮຽນ, ຫ້ອງການຄູອາຈານ ຍັງເປັນອາຄານເກົ່າຊຸດໂຊມຫຼາຍ, ເດັກທີ່ມາຮຽນຍັງເຂີນເຄື່ອງນຸ່ງຖື ແລະ ອຸປະກອນການສຶກສາ;

ທ່ານ ຄໍາຈັນ ໂສຕາປະເສີດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະອໍານວຍການ, ຄູອາຈານ ທີ່ໄດ້ເອົາໃຈໃສ່ຢ່າງໃກ້ຊິດ ຕໍ່ຊີວິດການເປັນຢູ່ຂອງນັກຮຽນໝົດທຸກຄົນ, ພ້ອມທັງຖ່າຍທອດຄວາມຮູ້ ແລະ ແບບແຜນການດໍາລົງຊິວີດໃນການຢູ່ຮ່ວມກັນໃຫ້ນັກຮຽນ ແລະ ສືບຕໍ່ກໍ່ສ້າງ ແລະ ຕິດຕາມ ຊ່ວຍເຂົ້າເຈົ້າໃຫ້ໄດ້ຮັບການສຶກສາໃນສາຍວິຊາຊີບ ເພື່ອນໍາໄປພັດທະນາຕົນເອງໃນອານາຄົດ.

                           (ເຂັມທອງ ດວງວິໄລແກ້ວ)